Apocalipsis 21 - Jiñi Tsiji' bʌ Wen T'añ cha'añ Estudio

7. TSIJI' BɅ JERUSALÉN ( 21.1—22.5 ) Tsiji' bʌ panchan yic'ot tsiji' bʌ pañimil

¹ Ti wi'il tsa' j q'uele tsiji' bʌ panchan yic'ot tsiji' bʌ pañimil, come jiñi ñaxan bʌ panchan yic'ot jiñi ñaxan bʌ pañimil tsa' jili yic'ot jiñi mar tsa'ix jili.

² Joñon, Juan, tsa' j q'uele jiñi Ch'ujul bʌ Tejclum, jiñi tsiji' bʌ Jerusalén, woli' ju'bel tilel ti panchan ch'oyol bʌ ti Dios, ch'ʌlbil bajche' xch'oc mu' bʌ i taj i ñoxi'al.

³ Tsa' cu'bi c'am bʌ t'añ tsa' bʌ loq'ui ti panchan, tsi' yʌlʌ: “Awilan, wʌ'ix añ i Tabernáculo Dios yic'ot wiñicob x'ixicob. Mi caj i chumtʌl yic'otob, wiñicob x'ixicob mi caj i yochelob ti' cha'añ bʌ Dios, mi caj i yajñel Dios yic'otob.

⁴ Dios mi caj i sujcubeñob i ya'lel i wut; ma'añix majqui mi' caj ti chʌmel, ma'añix uc'taya mi ch'ijiyemlel mi wocol ti pejtelel ora, come tsa'ix ñumi jiñi ñaxan tac bʌ”, che'en.

⁵ Jiñi buchul bʌ ti' yumʌntel tsi' yʌlʌ: “Awilan, mic mel ti tsijib pejtelel chuqui tac añ”. Tsi' su'beyon ja'el: “Ts'ijban, come ili t'añ, xuc'ulʌch yic'ot isujm ja'el”, che'en.

⁶ Tsi' su'beyon: “Ts'ʌctiyemix ti pejtelel. Joñon tsa' cʌq'ue i tejchibal pejtelel chuqui tac añ, mi cʌq'uen i jilibal. Añon ti' tejchibal, añon ti' jilibal. Jiñi am bʌ i tiquinti', ti' majtañ jach mi caj cʌq'uen ja' loq'uem bʌ ti' loq'uib ja' i yejtal bʌ i cuxtʌlel.

⁷ Jiñi mu' bʌ i mʌjlel i cha'añ mi caj i ch'ʌm pejtelel chuqui tac añ. Joñon i Dioson, jiñi mi caj i yochel ti calobil.

⁸ Pero jiñi muc'o' bʌ ti bʌq'uen, yic'ot jiñi mach bʌ añic mi' ñopob, yic'ot jiñi bi'bi'o' bʌ, yic'ot xtsʌnsajob, yic'ot mu' bʌ i cha'leñob ts'i'lel, yic'ot xwujtob, yic'ot xch'ujutesa dioste'ob, yic'ot pejtelel xlotob mi caj i tajob i yajñib ya' ti c'ajc woli bʌ ti pulel yic'ot azufre, jiñʌch i cha'yajlel mi' chʌmelob”, che'en.

Tsiji' bʌ Jerusalén

⁹ Che' jiñi tsa' tili juntiquil ángel ba'añon, i pi'ʌl jiñi wʌctiquil ángelob, año' bʌ i cha'añ jiñi wucp'ejl taza but'ul bʌ ti jiñi wucyajl cojix bʌ wocol tac, tsi' su'beyon: “La' ilayi, mi caj c pʌsbeñet jiñi xch'oc mu' bʌ cajel ti ñujpuñijel, jiñʌch i yijñam jiñi Tʌñʌme'”, che'en.

¹⁰ Tsi' pʌyʌyon majlel ti Espíritu c'ʌlʌl ti jump'ejl chañ bʌ wits, tsi' pʌsbeyon jiñi colem bʌ tejclum jiñi ch'ujul bʌ Jerusalén woli bʌ i ju'bel tilel ti panchan ch'oyol bʌ ti Dios.

¹¹ Añ i cha'añ i ñuclel Dios, che'ʌch i c'ʌc'al bajche' jump'ejl c'ax uts'at bʌ xajlel, che' bajche' jaspe xajlel, sʌctsʌñan bajche' espejo.

¹² Joyol ti colem ts'ajc, wen chañ bʌ, añ lajchʌmp'ejl (12) i ti', ya' ti ti' añ lajchʌntiquil ángelob, ts'ijbubil i c'aba' jiñi lajchʌnmojt i p'olbal Israel ti ti' jiñi ts'ajc.

¹³ Ya' ti pasibal q'uiñ añ uxp'ejl i ti', añ uxp'ejl i ti' ti norte, añ uxp'ejl i ti' ti sur, ti bʌjlibal q'uiñ añ uxp'ejl i ti'.

¹⁴ Añ lajchʌmp'ejl i c'ʌclib jiñi ts'ajc ya' ti' joytʌlel tejclum, ya' ts'ijbubil i c'aba'ob jiñi lajchʌntiquil apóstolob i cha'añ jiñi Tʌñʌme'.

¹⁵ Ya' ti' c'ʌb jiñi ángel tsa' bʌ i pejcayon añ junts'ijt te' melbil bʌ ti oro cha'añ mi' p'is jiñi tejclum yic'ot i ti' yic'ot jiñi colem ts'ajc ya' ti' joytʌlel.

¹⁶ Jiñi tejclum joy lajal ti' joytʌlel. Lajal i ñajtlel bajche' i jawticlel. Tsi' p'isi jiñi tejclum ojlil i wʌcbajc' (2,200) kilómetro ti jujunwejl. Lajal i ñajtlel yic'ot i chañlel yic'ot i jawticlel.

¹⁷ Tsi' p'isi jiñi ts'ajc ti' joytʌlel tejclum jo'p'ejl i waxʌcc'al (65) metro i pimlel, jiñi ángel tsi' p'isi che' bajche' mi' p'isob wiñicob.

¹⁸ Melbil jiñi ts'ajc ti jaspe xajlel, jiñi tejclum puro oro, wen sʌctsʌñan bajche' espejo.

¹⁹ Ch'ʌlbil i c'ʌclib jiñi ts'ajc yic'ot jujunchajp c'ax uts'at bʌ xajlel. Jiñi ñaxan bʌ i c'ʌclib jiñʌch diamante, i cha'p'ejlel jiñʌch zafiro, i yuxp'ejlel jiñʌch ágata, i chʌmp'ejlel jiñʌch esmeralda.

²⁰ I jo'p'ejlel jiñʌch ónice, i wʌcp'ejlel jiñʌch rubí, i wucp'ejlel jiñʌch crisólito, i waxʌcp'ejlel jiñʌch berilo, i bolomp'ejlel jiñʌch topacio, i lujump'ejlel jiñʌch crisólito, i junlujump'ejlel jiñʌch jacinto, i lajchʌmp'ejlel jiñʌch amatista.

²¹ Jiñi lajchʌmp'ejl i ti' jiñʌch lajchʌmp'ejl perla tac. Ti jujump'ejl i ti' melbil i puertajlel ti jujump'ejl perla. Jiñi bij ti tejclum puro oro, wen sʌctsʌñan bajche' espejo.

²² Ma'añic tsa' j q'uele templo ti ili tejclum come lac Yum Dios, jiñi Mach bʌ Añic i P'isol i P'ʌtʌlel, yic'ot jiñi Tʌñʌme' i templojʌch.

²³ Ma'añic i c'ʌjñibal q'uiñ ti ili tejclum, ma'añic i c'ʌjñibal uw, come i ñuclel Dios mi' yʌq'ueñ i sʌclel, jiñi Tʌñʌme' i lámparajʌch jiñi tejclum.

²⁴ Jiñi año' bʌ ti pañimil mi caj i cha'leñob xʌmbal ti' sʌclel, jiñi reyob ti pañimil mi caj i ch'ʌmob ochel i ñuclel yic'ot i wenlel.

²⁵ Ma'añic ba' ora mi caj i ñujp'el tac i ti', come ma'añic ac'ʌlel ya'i.

²⁶ Mi caj i ch'ʌmob ochel i ñuclel yic'ot i wenlel jiñi año' bʌ ti pañimil.

²⁷ Ma'añic mi caj i wis ochel chuqui tac bi'bi' mi jiñi mu' bʌ i cha'len jontolil yic'ot lot, cojach mi caj i yochelob jiñi ts'ijbubilo' bʌ i c'aba' ti' juñilel Tʌñʌme' ba' ts'ijbubil i c'aba' jiñi año' bʌ i cuxtʌlel.