Apocalipsis 20 - Jiñi Tsiji' bʌ Wen T'añ cha'añ Estudio

Ojlil i yuxbajc' ja'b

¹ Tsa' j q'uele tsa' ju'bi tilel ángel loq'uem bʌ ti panchan, chucul i cha'añ colem cadena yic'ot i llavejlel colem ch'eñ mach bʌ añic i ye'bal.

² Tsi' chucu jiñi colem ajin, jiñi oñiyi bʌ lucum, jiñi xi'ba, Satanás, tsi' cʌchʌ cʌytʌl lujunc'al i yuxbajc' (1,000) ja'b.

³ Tsi' choco ochel ti ch'eñ mach bʌ añic i ye'bal, tsi' ñup'u, tsi' yʌq'ue i sellojlel cha'añ ma'añic mi' chʌn lotin tejclumob ti pañimil c'ʌlʌl jinto mi' ts'ʌctiyel lujunc'al i yuxbajc' ja'b. Che' ñumeñix, wersa mi' colel jumuc'.

⁴ Tsa' j q'uele ca'bʌl buchlibʌl, jiñi tsa' bʌ buchleyob ya'i, tsa' aq'uentiyob i ye'tel ti meloñel. Yic'ot tsa' j q'uele i ch'ujlel wiñicob x'ixicob tsa' bʌ set' t'ojbentiyob loq'uel i bic' cha'añ isujmlel Jesús yic'ot cha'añ i t'añ Dios, ma'añic tsi' ch'ujutesayob jiñi jontol bʌ bʌte'el yic'ot i yejtal, ma'añic tsi' ch'ʌmbeyob i ts'ijbal ti' pam mi ti' c'ʌb, tsa' cha' cuxtʌyiyob, tsi' cha'leyob yumʌntel yic'ot Cristo lujunc'al i yuxbajc' ja'b.

⁵ Jiñobʌch tsa' bʌ ñaxan ch'ojyiyob. Jiñi yaño' bʌ chʌmeño' bʌ, ma'añic tsa' cha' cuxtʌyiyob jinto che' ñumeñix lujunc'al i yuxbajc' ja'b.

⁶ Tijicñayob mu' bʌ i tejchelob ch'ojyel ti ñaxan, ch'ujulob; ma'añic mi caj i chʌmelob ti' cha'yajlel, mi caj i yochelob ti motomaj ti' tojlel Dios yic'ot ti' tojlel Cristo, mi caj i tem cha'leñob yumʌntel yic'ot Cristo lujunc'al i yuxbajc' ja'b.

⁷ Che' ñumeñix lujunc'al i yuxbajc' ja'b mi caj i colel Satanás ba' ñup'ul.

⁸ Mi caj i loq'uel tilel i lotin jiñi tejclumob año' bʌ ti chʌnwejlel pañimil yic'ot Gog yic'ot Magog cha'añ mi' tempañob tilel ti guerra. Che'ʌch i tsicol bajche' i ji'il mar.

⁹ Tsi' cha'leyob marcha ti' pamol pañimil, tsi' joyoyob jiñi c'uxbibil bʌ tejclum ba' tempʌbilob i cha'año' bʌ Dios, pero tsa' ju'bi tilel c'ajc ti Dios ya' ti panchan. Tsi' jisa jiñi xcontrajob.

¹⁰ Jiñi xi'ba tsa' bʌ i lotiyob tsa' chojqui ochel ya' ti colem c'ajc woli bʌ ti lejmel yic'ot azufre, ya' ba'añob jiñi jontol bʌ bʌte'el yic'ot jiñi lot bʌ x'alt'añ, mi caj i tic'lʌntelob ti q'uiñil yic'ot ti ac'ʌlel ti pejtelel ora.

Mi caj i melob i bʌ jiñi sajtemo' bʌ

¹¹ Tsa' j q'uele colem bʌ i buchlib Dios sʌsʌc bʌ, yic'ot jiñi tsa' bʌ buchle ya'i, jiñi pañimil yic'ot panchan tsa' puts'i ti' tojel ma'añic tsiquil baqui tsa' majli.

¹² Tsa' j q'uele jiñi chʌmeño' bʌ, jiñi ñuco' bʌ yic'ot ch'och'oco' bʌ wa'alo' bʌ ti' tojel Dios. Tsa' jajmi jiñi juñ tac, tsa' jajmi yam bʌ juñ ba' ts'ijbubil i c'aba'ob año' bʌ i cuxtʌlel. Lac Yum tsi' c'ʌñʌ jiñi juñ cha'añ mi' mel jiñi chʌmeño' bʌ che' bajche' añ i melbalob, come ya' ts'ijbubil i melbalob ti jiñi juñ tac.

¹³ Jiñi mar tsi' cha' colo jiñi chʌmeño' bʌ año' bʌ ti ja', yic'ot jiñi i yajñib chʌmeño' bʌ tsi' colo jiñi ya' bʌ añob ti mucoñibʌl. Lac Yum tsi' meleyob ti jujuntiquil che' bajche' añ i melbalob.

¹⁴ Jiñi i p'ʌtʌlel chʌmel yic'ot i yajñib chʌmeño' bʌ tsa' chojquiyob ochel ti' yajñib colem c'ajc. Jiñʌch i cha'yajlel mi' chʌmelob, che' mi' yochelob ti colem c'ajc.

¹⁵ Majqui jach mach ts'ijbubilic i c'aba' ti juñ ba' ts'ijbubil i c'aba' jiñi año' bʌ i cuxtʌlel, tsa' chojqui ochel ti colem c'ajc.