Apocalipsis 2 - Jiñi Tsiji' bʌ Wen T'añ cha'añ Estudio

I cʌntesʌntel jiñi año' bʌ ti Éfeso

¹ Ts'ijbuben juñ xcʌntaya i cha'añ jiñi xñopt'añob mu' bʌ i tempañob i bʌ ya' ti Éfeso: “Jiñi chucul bʌ i cha'añ wucp'ejl ec' ti ñoj bʌ i c'ʌb, jiñi mu' bʌ i cha'len xʌmbal ti' yojlil jiñi wucts'ijt lámpara melbil bʌ ti oro, jiñʌch mu' bʌ i yʌl ili t'añ:

² Cʌmbil c cha'añ la' melbal yic'ot wocol bʌ la' we'tel yic'ot i p'ʌtʌlel la' pusic'al ti' cuchol wocol, cujil mi la' ts'a'len jontol bʌ wiñicob, tsa'ix la' wen q'uelbe i ye'tel jiñi mu' bʌ i lon cuyob i bʌ ti apóstolob, tsa'ix la' ña'ta xlotiyajobʌch.

³ Cʌmbil c cha'añ la' p'ʌtʌlel ti' cuchol wocol, woli' lʌjt'el la' cha'añ, cha'añ tij c'aba', ma'añic tsa' lujb-ayetla.

⁴ Pero añ chuqui mach weñic ti la' tojlel, ma'añix mi la' wen c'uxbiñon che' bajche' ti ñaxan.

⁵ Ña'tanla bajche' tsa' ajñiyetla che' maxto añic yajlemetla. Cʌyʌ la' mul, cha' melela che' bajche' ti ñaxan, mi ma'añic mi la' cʌy la' mul mi caj c bʌc' tilel ba'añetla cha'añ mic chilbeñetla la' lámpara.

⁶ Pero añ chuqui uts'at mi la' mel, mi la' ts'a'liben i melbal nicolaítajob, mic ts'a'len ja'el.

⁷ Jiñi am bʌ i chiquin la' i yu'biben i t'añ i yEspíritu Dios mu' bʌ i su'ben xñopt'añob mu' bʌ i tempañob i bʌ. Jiñi mu' bʌ i mʌjlel i cha'añ mi caj cʌq'uen i c'uxben i wut jiñi te' i yejtal bʌ laj cuxtʌlel am bʌ ti' yojlil i paraíso Dios”.

I cʌntesʌntel jiñi año' bʌ ti Esmirna

⁸ Ts'ijbuben juñ jiñi xcʌntaya i cha'añ xñopt'añob mu' bʌ i tempañob i bʌ ya' ti Esmirna: “Joñon añon ti ñaxan. Añon ti' yujtibal, tsa' chʌmiyon, tsa' cha' cuxtʌyiyon, woliyon ti t'añ.

⁹ Cʌmbil c cha'añ la' melbal yic'ot la' wocol. Ma'añic la' chu'bʌañ, pero ca'bʌlʌch la' wenlel, cʌmbil c cha'añ ja'el bajche' mi' ts'a'leñetla jiñi mu' bʌ i lon cuyob i bʌ ti israelob, mach israelobic, pero i cha'añob Satanás.

¹⁰ Mach la' bʌc'ñan jiñi wocol mu' bʌ caj i tajetla, awilan jiñi xi'ba mi caj i lamital otsañetla ti ñujp'ibʌl cha'añ i yilʌbentel la' pusic'al yic'ot mi caj la' tic'lʌntel lujump'ejl q'uiñ. Xuc'ul yom mi la' wajñel anquese mi la' wʌjq'uel ti chʌmel, mi caj cʌq'ueñetla la' cuxtʌlel che' bajche' corona.

¹¹ Jiñi am bʌ i chiquin la' i yu'biben i t'añ jiñi Espíritu mu' bʌ i su'ben xñopt'añob. Jiñi mu' bʌ i mʌjlel i cha'añ ma'añic mi caj i chʌmel ti' cha'yajlel”.

I cʌntesʌntel jiñi año' bʌ ti Pérgamo

¹² Ts'ijbuben juñ xcʌntaya i cha'añ xñopt'añob mu' bʌ i tempañob i bʌ ya' ti Pérgamo: “Jiñi am bʌ i yespada jay bʌ i yej ti' cha'wejlel, mi' yʌl ili t'añ:

¹³ Cʌmbil c cha'añ la' melbal ya' ba' chumuletla ba' woli' cha'len yumʌl Satanás. Pero woli la' chʌn ña'tan j c'aba', ma'añic tsa' la' cʌyʌ la' ñopon, xuc'uletla ja'el che' bʌ tsa' tsʌnsʌnti Antipas, xuc'ul bʌ testigo c cha'añ tsa' bʌ i yʌc'ʌyon ti cʌjñel ya' ba'añetla ba' chumul Satanás.

¹⁴ Pero mic su'beñetla chuqui tac mach weñic ti la' tojlel. Ya'añob la' wic'ot mu' bʌ i ñopob i cʌntesʌbal Balaam, jiñi Balaam tsa' bʌ i su'be Balac cha'añ mi' yʌc' ti yajlel i yalobilob Israel che' bʌ tsi' pʌyʌyob cha'añ mi' c'uxob we'elʌl aq'uebil bʌ dios tac, cha'añ mi' cha'leñob ts'i'lel.

¹⁵ Ya'añob la' wic'ot ja'el mu' bʌ i ñopob i cʌntesʌbal nicolaítajob mu' bʌ c ts'a'len.

¹⁶ Jiñi cha'añ cʌyʌla la' mul, mi ma'añic mi la' cʌy la' mul mi caj c bʌc' tilel ba'añetla, mi caj j contrajin jiñi nicolaítajob yic'ot jiñi espada am bʌ ti quej.

¹⁷ Jiñi am bʌ i chiquin la' i yu'biben i t'añ jiñi Espíritu mu' bʌ i su'ben xñopt'añob. Jiñi mu' bʌ i mʌjlel i cha'añ mi caj cʌq'uen i c'ux mucul bʌ maná, mi caj cʌq'uen jump'ejl sʌsʌc bʌ alʌ xajlel, ba' otsʌbil tsiji' bʌ i c'aba', ma'añic majqui yujil chuqui otsʌbil, cojach jiñi mu' bʌ i ch'ʌm”.

I cʌntesʌntel jiñi año' bʌ ti Tiatira

¹⁸ Ts'ijbuben xcʌntaya i cha'añ xñopt'añob mu' bʌ i tempañob i bʌ ya' ti Tiatira: “I Yalobil Dios, jiñi woli bʌ ti lejmel i wut bajche' c'ajc, jiñi am bʌ i yoc che' bajche' c'ʌnc'ʌn taq'uiñ c'ʌn tsʌñan bʌ ti c'ajc. Jiñʌch mu' bʌ i yʌl ili t'añ:

¹⁹ Cʌmbil c cha'añ la' melbal, mi la' c'uxbiñon, mi la' ñopon, cʌmbil c cha'añ la' we'tel yic'ot i p'ʌtʌlel la' pusic'al ti' cuchol wocol, jiñi la' melbal tsa' bʌ la' mele ti wi'il ñumen ca'bʌl bajche' ti ñaxan.

²⁰ Mic su'beñetla ja'el chuqui mach weñic ti la' tojlel, mi la' cuchben i jontolil jiñi x'ixic Jezabel, mu' bʌ i cuy i bʌ ti x'alt'añ, mi' cʌntesan c wiñicob, mi' socbeñob i pusic'al cha'añ mi' cha'leñob ts'i'lel, cha'añ mi' c'uxob we'elʌl aq'uebil bʌ dios tac.

²¹ Tsa' c pijta cha'añ mi' cʌy i mul, pero mach yomic i cʌy i ts'i'lel.

²² Awilan, woli c choc jiñi x'ixic ti' wʌyibʌl ba' mi caj i yu'bin ca'bʌl wocol yic'ot jiñi tsa' bʌ i pi'leyob ti ts'i'lel, mi ma'añic mi' cʌyob i mul.

²³ Mi caj c tsʌnsan i yalobilob Jezabel, pejtelel xñopt'añob baqui jach mi' tempañob i bʌ mi caj i ña'tañob joñoñʌch mu' bʌ c wen q'uelbeñob i pusic'al yic'ot i ña'tʌbal, ti jujuntiquiletla mi caj cʌq'ueñetla la' tojol che' bajche' añ la' melbal.

²⁴ Mic su'beñetla pejtelel añet bʌ la ti Tiatira, mach bʌ ñopolic la' cha'añ i cʌntesʌbal Jezabel yic'ot jiñi mucul tac bʌ i cʌntesʌbal Satanás mu' bʌ i lon q'uelob ti ñuc la' pi'ʌlob: Ma'añic mi cʌq'ueñetla yam bʌ la cuch.

²⁵ Jiñi jach yom mi la' chʌn lot ti la' pusic'al jiñi am bʌ la' cha'añ jinto mic tilel.

²⁶ Jiñi mu' bʌ i mʌjlel i cha'añ yic'ot jiñi mu' bʌ i melbeñon que'tel c'ʌlʌl ti' jilibal mi caj cotsan ti' yum colem tejclumob.

²⁷ Tsʌts mi caj i mel i yumʌntel chucul bʌ i cha'añ bara melbil bʌ ti tsucul taq'uiñ, mi caj i jisan jiñi xñusa t'añob che' bajche' mi' bic'ti tojp'el p'ejt; che'ʌch i p'ʌtʌlel bajche' c p'ʌtʌlel tsa' bʌ i yʌq'ueyon c Tat.

²⁸ Mi caj cʌq'uen jiñi ec' wen tsiquil bʌ ti sʌc'ajel.

²⁹ Jiñi am bʌ i chiquin la' i yu'biben i t'añ jiñi Espíritu mu' bʌ i su'ben xñopt'añob”.