Apocalipsis 19 - Jiñi Tsiji' bʌ Wen T'añ cha'añ Estudio

¡Wen Ñuc lac Yum!

¹ Che' bʌ tsa' ujti ti t'añ tsa' cu'bibe i t'añ bajc'ʌl wiñicob x'ixicob ti panchan, c'am tsi' yʌlʌyob: ¡Aleluya! Tilem ti lac Yum Dios laj coltʌntel. La' sujbic i ñuclel yic'ot i c'uxbintel yic'ot i p'ʌtʌlel.

² Come mi' cha'len meloñel ti isujm yic'ot ti toj. Come tsa'ix i mele jiñi ñuc bʌ xts'i'lel x'ixic tsa' bʌ i yoc'mesa pañimil ti' ts'i'lel. Dios tsi' q'uextʌbe i jontolil jiñi xts'i'lel x'ixic cha'añ tsi' bec'be i ch'ich'el i wiñicob Dios.

³ Ti' cha'yajlel tsi' yʌlʌyob: ¡Aleluya! Mi' letsel i buts'il ts'i'lel x'ixic ti pejtelel ora.

⁴ Che' jiñi tsi' pʌcchocoyob i bʌ ti lum jiñi chʌntiquil i cha'c'al (24) ancianojob yic'ot chʌntiquil querubiñob, tsi' ch'ujutesayob Dios, buchul bʌ ti' yumʌntel, tsi' yʌlʌyob: ¡Amén! ¡Aleluya!

⁵ Tsa' loq'ui t'añ ti' buchlib Dios, tsi' yʌlʌ: “Su'benla i ñuclel lac Dios pejteletla i wiñiquet bʌ la mu' bʌ la' bʌc'ñan, ch'och'oquet bʌ la yic'ot ñuquet bʌ la”, che'en.

⁶ Tsa' cu'bi t'añ che' bajche' i t'añ bajc'ʌl wiñicob, che' bajche' i t'añ cholocña bʌ ja', che' bajche' i t'añ p'ʌtʌl bʌ chajc, tsi' yʌlʌ: ¡Aleluya! come woli ti yumʌntel lac Yum Dios, Mach bʌ Añic i P'isol i P'ʌtʌlel.

⁷ La' ñuc-ac lac pusic'al. La' la cu'bin i tijicñʌyel lac pusic'al. La' lac su'b i ñuclel lac Yum, come i yorajlelix mi' cha'len ñujpuñijel jiñi Tʌñʌme'. Tsa'ix i chajpa i bʌ jiñi xch'oc c'ajtibil bʌ i cha'añ.

⁸ Tsa'ix aq'uenti i lʌp wen uts'at bʌ sʌsʌc pisil i c'aba' lino, sʌsʌc jax bʌ, che'en. (Come jiñi wen uts'at bʌ pisil jiñʌch i yejtal toj bʌ i melbal i cha'año' bʌ Dios).

C'ux waj temel yic'ot jiñi tʌñʌme'

⁹ Jiñi ángel tsi' su'beyon: Ts'ijban ti juñ: “Tijicñayob jiñi mu' bʌ i pʌjyelob ti c'ux waj che' mi' cha'len ñujpuñijel jiñi Tʌñʌme'”. Jiñi ángel tsi' su'beyon: Iliyi jiñʌch isujm bʌ i t'añ Dios, che'en.

¹⁰ Tsa' c pʌcchoco c bʌ ti' tojel i yoc cha'añ mic ch'ujutesan jiñi ángel, pero tsi' su'beyon: “Q'uele, mach che'ic yom ma' cha'len. I wiñicon Dios lajal bajche'et yic'ot a wermañujob mu' bʌ i jac'beñob i t'añ Jesús. ¡Ch'ujutesan Dios!” (Come jiñi Espíritu tsa' bʌ i pejcayonla ti Jesús mi' ñijcañonla ti subt'añ).

Jiñi c'ʌchʌl bʌ ti' pat sʌsʌc caballo

¹¹ Che' jiñi tsa' j q'uele jajmen panchan, awilan, ya'añ juncojt sʌsʌc caballo. Jiñi c'ʌchʌl bʌ ti' pat i c'aba'ʌch jiñi Xuc'ul Bʌ, jiñi Isujm Bʌ, toj bʌ mi' cha'len meloñel yic'ot guerra.

¹² Lajal i wut bajche' c'ajc woli bʌ ti lejmel, añ ca'bʌl corona ti' jol, ts'ijbubil i c'aba' pero ma'añic majqui mi' cʌn, i bajñel jach mi' cʌn.

¹³ Lʌpbil i cha'añ i pislel ts'ajbil bʌ ti ch'ich'. I c'aba' jiñi c'ʌchʌl bʌ jiñʌch: I t'añ Dios.

¹⁴ Jiñi xguerrajob año' bʌ ti panchan tsi' tsajcayob, c'ʌchʌlob ti sʌsʌc caballo, lʌpʌlob i cha'añ wen bʌ i pislel i c'aba' lino, wen sʌc jiñi lino, sʌsʌc jax.

¹⁵ Ya' ti' yej mi' loq'uel junts'ijt jay bʌ espada cha'añ mi c'ʌn i low jiñi año' bʌ ti tejclum tac, che' ja'el mi caj i c'ʌn bara melbil bʌ ti tsucu taq'uiñ che' mi' cha'len i yumʌntel. Mi caj i t'uchtan i yʌjts'ib ts'usub yilal ti tsʌts bʌ i mich'ajel Dios Mach bʌ Añic i P'isol i P'ʌtʌlel.

¹⁶ Ts'ijbubil i c'aba' ti' pislel yic'ot ti' ya': I Rey jiñi reyob, i Yum jiñi yumʌlob.

¹⁷ Tsa' j q'uele ángel wa'al bʌ ti q'uiñ, jiñi ángel tsi' cha'le oñel ti c'am bʌ t'añ, tsi' pejca pejtelel te'lemut mu' bʌ ti wejlel ti ojlil panchan: ¡La' la, tempan la' bʌ ti we'el chajpʌbil bʌ i cha'añ Dios!

¹⁸ C'uxbenla i bʌc'tal reyob yic'ot i bʌc'tal i yaj capitañob yic'ot i bʌc'tal p'ʌtʌlo' bʌ yic'ot i bʌc'tal caballo yic'ot jiñi c'ʌchʌlo' bʌ yic'ot i bʌc'tal pejtelel wiñicob libre bʌ añob yic'ot año' bʌ ti' yum, jiñi ch'och'oco' bʌ yic'ot ñuco' bʌ, che'en jiñi ángel.

¹⁹ Tsa' j q'uele jiñi jontol bʌ bʌte'el yic'ot jiñi reyob ti pañimil yic'ot xguerrajob i cha'añ, tempʌbilob cha'añ mi' contrajiñob ti guerra jiñi c'ʌchʌl bʌ ti caballo yic'ot xguerrajob i cha'añ.

²⁰ Pero jiñi jontol bʌ bʌte'el tsa' chujqui temel yic'ot jiñi lot bʌ x'alt'añ, tsa' bʌ i pʌsʌ i yejtal tac i p'ʌtʌlel ti' wut jontol bʌ bʌte'el cha'añ mi' lotin wiñicob tsa' bʌ i ch'ʌmbeyob i marcajlel jiñi bʌte'el, che' bʌ tsi' ch'ujutesʌbeyob i yejtal. Ili cha'tiquil tsa' chojquiyob ochel ti' yajñib colem c'ajc che' cuxulob to ba' woli ti lejmel yic'ot azufre.

²¹ Jiñi c'ʌchʌl bʌ ti caballo tsi' tsʌnsa jiñi yaño' bʌ ti espada tsa' bʌ loq'ui ti' yej, pejtelel te'lemut tsa' ñaj-ayob ti' c'uxol bʌc'talʌl.