Apocalipsis 18 - Jiñi Tsiji' bʌ Wen T'añ cha'añ Estudio

Jejmeñix Babilonia

¹ Ti wi'il tsa' j q'uele yam bʌ ángel, tsa' ju'bi tilel ti panchan, añ ca'bʌl i p'ʌtʌlel, tsa' sʌc'a pañimil cha'añ i c'ʌc'al i ñuclel.

² Tsi' cha'le oñel ti c'am bʌ t'añ, tsi' yʌlʌ: ¡Jejmeñix, jejmeñix jiñi ñuc bʌ Babilonia! Ya'ix chumulob xi'bajob yic'ot pejtelel jontol bʌ espíritu. I yajñibix pejtelel bi'bi' bʌ te'lemut mu' bʌ i ts'a'lentel.

³ Come pejtelel año' bʌ ti pañimil tsa'ix i japbeyob i vino, i yejtal bʌ i ts'i'lel yic'ot i bi'bi'lel. Jiñi reyob ti pañimil tsi' cha'leyob ts'i'lel yic'ot año' bʌ ti Babilonia. Jiñi xchoñoñelob ti pañimil tsa' ochiyob ti rico come ca'bʌl jax tsi' jisʌbeyob i taq'uiñ jiñi año' bʌ ti Babilonia, che'en.

⁴ Tsa' cu'bi yam bʌ t'añ loq'uem bʌ ti panchan, tsi' yʌlʌ: “Loq'uenla ya'i, c cha'añet bʌ la. Cha'añ ma'añic mi la' tsajcan año' bʌ ti Babilonia ti mulil, ame aq'uentiquetla wocol lajal bajche'ob.

⁵ Come tsa'ix c'otiyob i mul c'ʌlʌl ti panchan. Ña'tʌbilix i cha'añ Dios i jontolilob.

⁶ Cha' aq'uenla che' bajche' tsi' yʌq'ueyetla. Tojola ti' cha'yajlel che' bajche' añob i melbal. Ti jiñi jach bʌ taza ba' tsi' yʌq'ueyetla la' jap vino, aq'uenla junyajl i ñumel cha'añ mi' jap.

⁷ Che' bajche' tsi' chañ-esa i bʌ che' bʌ tsa' wen chumle ti ca'bʌl i chu'bʌañ che'ʌch yom mi la' p'isben ca'bʌl i wocol yic'ot i yuq'uel, come mi' lon al ti' pusic'al: Buchulon tic yumʌntel che' bajche' x'ixic bʌ rey. Mach me'ba'oñic. Ma'añic mi caj cu'bin wocol yic'ot uq'uel”.

⁸ Jiñi cha'añ ti jump'ejl jach q'uiñ mi caj i tilel ca'bʌl i wocol. Mi caj i chʌmel, mi caj i cha'len uq'uel, mi caj i yu'bin wi'ñal. Mi caj i pulel ti c'ajc, come p'ʌtʌl lac Yum Dios mu' bʌ i mel Babilonia.

⁹ Jiñi reyob ti pañimil tsa' bʌ i cha'leyob ts'i'lel yic'ot, tsa' bʌ wen chumleyob cha'añ i chu'bʌañ, mi' cajelob ti uq'uel, mi caj i yuc'tañob che' mi' q'uelbeñob i buts'il che' mi' pulel.

¹⁰ Mi caj i ñajti wa'tʌlob ti bʌq'uen ame i tajob wocol, mi caj i yʌlob: ¡O'bol i bʌ, o'bol i bʌ, jiñi colem tejclum, Babilonia, jiñi p'ʌtʌl bʌ tejclum! Come ti jump'ejl jach ora tsa' bʌc' ajq'ui ti tojmulil.

¹¹ Jiñi xchoñoñelob ti pañimil mi' cajelob ti uq'uel, mi caj i yuc'tañob, come ma'añix majqui yom i chʌn mʌmben i choñoñel.

¹² Añ i choñoñel melbil bʌ ti oro ti plata yic'ot c'ax uts'at bʌ alʌ xajlel tac letsem bʌ i tojol, yic'ot perla tac yic'ot wen bʌ pisil, yic'ot chʌccojan bʌ yic'ot seda, yic'ot chʌcts'eran bʌ yic'ot xojocña bʌ te', yic'ot pejtelel plato melbil bʌ ti marfil yic'ot pejtelel melbil tac bʌ ti te' letsem bʌ i tojol, yic'ot c'ʌnc'ʌn taq'uiñ, yic'ot tsucu taq'uiñ, yic'ot mármol xajlel,

¹³ canela, yic'ot xojocña bʌ, yic'ot pom, yic'ot xojocña bʌ ts'ac, yic'ot xojocña bʌ pom, yic'ot vino, yic'ot olivo aceite, yic'ot wen juch'bil bʌ harina, yic'ot trigo, yic'ot alʌc'ʌl, yic'ot tʌñʌme', yic'ot caballo, yic'ot carreta tac, yic'ot ja'el wiñicob jiñi xmajtan e'telob.

¹⁴ Mach a chʌn tajax jiñi sumuc bʌ i wut te' mu' bʌ i mulan a pusic'al. Mi caj i laj jilel jiñi i t'ojol tac bʌ yic'ot chuqui tac c'uxbibil a cha'añ. Ma'añix mi caj a chʌn taj ti pejtelel ora.

¹⁵ Jiñi xchoñoñelob tsa' bʌ i choñoyob ili tac, tsa' bʌ wen ochiyob ti rico cha'añ i chu'bʌañ xts'i'lel x'ixic, mi caj i ñajti wa'tʌlob cha'añ bʌq'uen ame i tajob wocol, mi' cajelob ti uq'uel, jal mi caj i yuc'tañob,

¹⁶ mi caj i yʌlob: ¡O'bol i bʌ, o'bol i bʌ, jiñi colem tejclum lʌpbil bʌ i cha'añ wen bʌ i pislel, yic'ot chʌccojan bʌ yic'ot chʌcts'eran bʌ, yic'ot ch'ʌlbil bʌ ti oro yic'ot c'ax uts'at bʌ alʌ xajlel, yic'ot perla tac;

¹⁷ come ti jump'ejl ora tsa'ix laj jili i chu'bʌañ ti pejtelel! Pejtelel i yumob barco yic'ot wiñicob tsa' bʌ i cha'leyob xʌmbal ti barco yic'ot xñijca barcojob yic'ot pejtelel mu' bʌ i cha'leñob e'tel ti mar mi caj i ñajti wa'tʌlob.

¹⁸ Mi caj i cha'leñob oñel che' mi' q'uelbeñob i buts'il c'ajc ba' woli ti pulel, mi caj i yʌlob: ¿Am ba yam bʌ tejclum lajal bajche' jiñi colem tejclum?

¹⁹ Tsi' mujlayob i jol ti ts'u'bejn, tsi' cha'leyob c'am bʌ t'añ, tsi' yuc'tayob, yic'ot tsi' wen u'biyob i ch'ijiyemlel, tsi' yʌlʌyob: ¡O'bol i bʌ, o'bol i bʌ jiñi colem tejclum, come pejtelel i yumob barco tsa' ochiyob ti rico cha'añ i choñoñel ti mar, pero ti jump'ejl jach ora tsa' laj jili!

²⁰ La' ñuc-ac la' pusic'al, añet bʌ la ti panchan, yic'ot i cha'añet bʌ la Dios, apóstolob, yic'ot x'alt'añob, come Dios tsa'ix i cha'le meloñel ti' tojlel Babilonia, che'en.

²¹ Juntiquil ángel am bʌ i p'ʌtʌlel tsi' ch'uyu xajlel che' bajche' colem ña'atun, tsi' choco ochel ti mar, tsi' yʌlʌ: “Che'ʌch ja'el c'am mi caj i chojquel ju'bel jiñi colem tejclum Babilonia. Ma'añix mi caj i chʌn ña'tʌntel ti pejtelel ora.

²² Ma'añix música ya'i. Ma'añix majqui mi' ñijcan arpa mi yam bʌ música. Ma'añix majqui mi' wus flauta mi trompeta. Ma'añix x'e'tel yujilo' bʌ i melol pʌchi, mi pisil, mi ts'ac mi yam bʌ. Ma'añix mi caj i chʌn u'bintel i t'añ ña'atun.

²³ Ya'i ma'añix mi caj i tsictiyel i c'ʌc'al lámpara. Ma'añix mi caj i yu'bintel i t'añ xñujpuñelob. Come jiñi xchoñoñelob a cha'añ jiñobʌch ñuco' bʌ ti pañimil. Tsa' loti pejtelel tejclum tac ti' caj a lot.

²⁴ Ya' ti a tojlel tsa' bejq'ui i ch'ich'el x'alt'añob yic'ot i ch'ich'el i cha'año' bʌ Dios, yic'ot pejtelel tsa' bʌ tsʌnsʌntiyob ti pañimil”.