Apocalipsis 17 - Jiñi Tsiji' bʌ Wen T'añ cha'añ Estudio

6. JIÑI WOCOL TAC MU' TO BɅ CAJ I TILEL ( 17.1—20.15 ) Mi caj i yʌjq'uel ti tojmulil jiñi ñuc bʌ xts'i'lel x'ixic

¹ Tsa' tili juntiquil ángel i pi'ʌl jiñi wʌctiquil chucul bʌ i cha'añob wucp'ejl taza, tsi' pejcayon, tsi' yʌlʌ: La' ilayi, mi caj c pʌsbeñet bajche' mi caj i yʌjq'uel ti tojmulil jiñi ñuc bʌ xts'i'lel x'ixic buchul bʌ ti' yumʌntel ba'añ i xʌc' colem ja' tac.

² Jiñi reyob ti pañimil tsi' cha'leyob ts'i'lel yic'ot, jiñi chumulo' bʌ ti pañimil tsa' yʌc-ayob ti vino i yejtal bʌ i ts'i'lel, che'en.

³ Tsa' bujt'i c pusic'al ti jiñi Espíritu, tsi' pʌyʌyon majlel ti jochol bʌ lum. Tsa' j q'uele x'ixic buchul ti chʌcts'eran bʌ bʌte'el, añ ca'bʌl i c'aba' tac jiñi bʌte'el mu' bʌ i p'aj Dios, añ wucp'ejl i jol jiñi jontol bʌ bʌte'el yic'ot lujunts'ijt i xulub.

⁴ Lʌpʌl i cha'añ chʌccojan bʌ yic'ot chʌchʌc bʌ i pislel jiñi x'ixic, ch'ʌlbil ti oro yic'ot ti c'ax uts'at bʌ alʌ xajlel tac, yic'ot ti perla tac, chucbil i cha'añ jump'ejl taza melbil bʌ ti oro, but'ul jiñi taza ti' bi'bi'lel tsa' bʌ i taja ti' ts'i'lel yic'ot pejtelel ts'a'lebil bʌ.

⁵ Ts'ijbubil i c'aba' ti' jol, cʌmbil isujmlel ti Dios: “Jiñi ñuc bʌ Babilonia, i ña'al xts'i'lel x'ixicob, i ña'al xjontolil am bʌ ti pañimil”.

⁶ Tsa' j q'uele yʌc jiñi x'ixic cha'añ tsi' japʌ i ch'ich'el i cha'año' bʌ Dios yic'ot i ch'ich'el jiñi tsa' bʌ chʌmiyob cha'añ Jesús. Che' bʌ tsa' j q'uele tsa' toj sajti c pusic'al.

⁷ Jiñi ángel tsi' su'beyon: ¿Chucoch mi' toj sajtel a pusic'al? Mi caj c su'beñet isujmlel jiñi x'ixic yic'ot jiñi jontol bʌ bʌte'el am bʌ wucp'ejl i jol yic'ot lujunts'ijt i xulub, woli bʌ i cuch jiñi x'ixic.

⁸ Jiñi jontol bʌ bʌte'el tsa' bʌ a q'uele jiñʌch am bʌ ti wajali, pero ma'añix tsiquil wʌle, mi caj i letsel loq'uel ti ch'eñ mach bʌ añix mi' tajben i ye'bal cha'añ mi' majlel ba' mi' jisʌntel. Mi caj i toj sajtel i pusic'al jiñi chumulo' bʌ ti lum, mach bʌ otsʌbilic i c'aba' ti juñ ba' ts'ijbubil i c'aba' tac jiñi año' bʌ i cuxtʌlel c'ʌlʌl ti' tejchibal pañimil, mi caj i toj sajtelob i pusic'al che' mi' q'uelob jiñi jontol bʌ bʌte'el am bʌ ti wajali, ma'añix tsiquil wʌle, mu' bʌ caj i tilel.

⁹ “La' i ch'ʌmben isujm jiñi am bʌ ca'bʌl i pusic'al. Jiñi wucp'ejl i jol bʌte'el jiñʌch i yejtal wucp'ejl wits ba' buchul jiñi x'ixic,

¹⁰ jiñʌch i yejtal wuctiquil reyob. Tsa'ix jiliyob i yumʌntel jo'tiquil; juntiquil añ wʌle, yam bʌ mu' to caj i tilel. Che' mi' tilel mach jalic mi' caj i yajñel.

¹¹ Jiñi jontol bʌ bʌte'el am bʌ ti wajali, mach bʌ añic wʌle, jiñʌch i waxʌcticlel, i pi'ʌlʌch jiñi wuctiquil, mi' majlel ba' mi' jisʌntel.

¹² Jiñi lujunts'ijt xulub tsa' bʌ a q'uele jiñʌch lujuntiquil reyob maxto bʌ añic tsa' aq'uentiyob i yumʌntel, pero mi caj i tem aq'uentelob i p'ʌtʌlel ti rey yic'ot jiñi jontol bʌ bʌte'el cha'añ mi' cha'len yumʌl jump'ejl ora.

¹³ Ti jump'ejl i pusic'al mi caj i yʌq'ueñob i ye'tel jiñi bʌte'el yic'ot i p'ʌtʌlel.

¹⁴ Mi caj i contrajiñob jiñi Tʌñʌme' ti guerra. Jiñi Tʌñʌme' mi caj i mʌl come i Yumʌch yumʌlob, i Reyʌch reyob. Pejtelel mu' bʌ i yajñelob yic'ot jiñi Tʌñʌme' jiñobʌch pʌybilo' bʌ, yajcʌbilo' bʌ, xuc'ulo' bʌ i pusic'al”, che'en.

¹⁵ Jiñi ángel tsi' cha' su'beyon: “Jiñi ca'bʌl ja' tac tsa' bʌ a q'uele ba' buchul jiñi xts'i'lel x'ixic jiñʌch bajc'ʌl wiñicob x'ixicob año' bʌ ti ca'bʌl tejclum tac yujilo' bʌ t'añ ti' chajp ti' chajp.

¹⁶ Jiñi lujunts'ijt xulub tsa' bʌ a q'uele yic'ot jiñi jontol bʌ bʌte'el mi caj i ts'a'leñob jiñi xts'i'lel x'ixic, mi caj i chilbeñob i chu'bʌañ yic'ot i pislel, mi caj i c'uxbeñob i bʌc'tal, mi caj i pulob ti c'ajc.

¹⁷ Come Dios tsi' ñijcʌbeyob i pusic'al cha'añ mi' melob chuqui yom Dios. Mi caj i temob i t'añ cha'añ mi' yʌq'ueñob i yumʌntel jiñi jontol bʌ bʌte'el jinto mi' ts'ʌctiyel i t'añ Dios.

¹⁸ Jiñi x'ixic tsa' bʌ a q'uele jiñʌch jiñi colem tejclum mu' bʌ i yumʌntel ti' tojlel jiñi reyob ti pañimil”.