Apocalipsis 16 - Jiñi Tsiji' bʌ Wen T'añ cha'añ Estudio

Wucp'ejl taza but'ul bʌ ti' mich'ajel Dios

¹ Che' jiñi tsa' cu'bi wen c'am bʌ t'añ loq'uem bʌ ti templo, tsi' su'be jiñi wuctiquil ángelob: “Cucula, beq'uela ju'bel ti lum i bʌl jiñi wucp'ejl taza but'ul bʌ ti' mich'ajel Dios”, che'en.

² Tsa' tili jiñi ñaxan bʌ ángel, tsi' beq'ue i bʌl taza ti pañimil, tsa' p'ojli leco jax bʌ tsoy ti' tojlel jiñi wiñicob am bʌ i cha'añob i ts'ijbal jiñi jontol bʌ bʌte'el, jiñi wiñicob tsa' bʌ i ch'ujutesʌbeyob i yejtal.

³ I cha'ticlel ángel tsi' beq'ue i bʌl taza ti mar, tsa' pʌntʌyi colem mar ti ch'ich' che' bajche' i ch'ich'el chʌmeñ bʌ wiñic, tsa' chʌmi pejtelel cuxul tac bʌ am bʌ ti mar.

⁴ I yuxticlel ángel tsi' beq'ue i bʌl taza ti colem ja' tac yic'ot ti' loq'uib tac ja', tsa' pʌntʌyi ti ch'ich'.

⁵ Tsa' cu'bibe i t'añ jiñi ángel am bʌ ti' wenta ca'bʌl ja' tac, tsi' yʌlʌ: Tojet, c Yum, añet bʌ wʌle yic'ot ti wajali, ch'ujulet come tsa'ix a cha'le meloñel ti' tojlelob.

⁶ Come jiñi tsa' bʌ i bec'beyob i ch'ich'el i cha'año' bʌ Dios yic'ot i ch'ich'el jiñi x'alt'añob. Wʌle tsa'ix a wʌq'ueyob i jap ch'ich', che'ʌch yom cha'añ i mulob, che'en.

⁷ Che' jiñi tsa' cu'bi t'añ tsa' bʌ loq'ui ti' pulʌntib i majtañ Dios, tsi' yʌlʌ: ¡Melel, c Yum Dios, mach bʌ Añic i P'isol a P'ʌtʌlel, come ma' cha'len meloñel ti' isujm yic'ot ti toj! Che'en.

⁸ I chʌnticlel ángel tsi' beq'ue i bʌl taza ti q'uiñ, tsa' aq'uenti i p'ʌtʌlel q'uiñ cha'añ mi' pul wiñicob ti c'ajc.

⁹ Tsa' puliyob ti ca'bʌl ticwal, tsi' p'ajbeyob i c'aba' Dios am bʌ i p'ʌtʌlel cha'añ mi' yʌc' jiñi wocol, ma'añic tsi' cʌyʌyob i mul cha'añ mi' q'uelob ti ñuc Dios.

¹⁰ I jo'ticlel ángel tsi' beq'ue i bʌl taza ti' buchlib jontol bʌ bʌte'el, tsa' ic'a ba' woli i mel i yumʌntel. Wiñicob x'ixicob tsi' c'uxuyob i yac' cha'añ i c'uxel i wocol,

¹¹ yic'ot tsi' p'ajayob Dios am bʌ ti panchan cha'añ i wocol yic'ot i tsoy, pero ma'añic tsi' cʌyʌyob i jontolil.

¹² I wʌcticlel ángel tsi' beq'ue i bʌl taza ti jiñi ñuc bʌ colem ja' i c'aba' Éufrates. Tsa' tiqui i ya'lel cha'añ mi' chajpʌbentelob i bijlel reyob ch'oyolo' bʌ ba' mi' pasel q'uiñ.

¹³ Tsa' j q'uele: Tsa' loq'ui bi'bi' bʌ espíritu ti' yej colem ajin yic'ot ti' yej jontol bʌ bʌte'el yic'ot ti' yej jiñi lot bʌ x'alt'añ, che' yilal bajche' xpequejc jiñi uxtiquil bi'bi' bʌ espíritujob.

¹⁴ Jiñi espíritujob jiñʌch xi'bajob mu' bʌ i pʌsob i yejtal tac i p'ʌtʌlel, mi' majlelob ba'añ reyob ti pejtelel pañimil cha'añ mi' tempañob tilel ti guerra mu' bʌ caj i yujtel ti jiñi ñuc bʌ i q'uiñilel Dios Mach bʌ Añic i P'isol i P'ʌtʌlel.

¹⁵ “Awilan, talon che' bajche' xujch'. Tijicña jiñi yʌxʌl bʌ i yoj woli bʌ i cʌntan i pislel, ame pits'ilic mi' cha'len xʌmbal, ame quisintiquic mi' yu'bin che' pits'il”, che'en.

¹⁶ Jiñi espíritujob tsi' tempayob tilel jiñi reyob ti lum, i c'aba' Armagedón ti' t'añ hebreo.

¹⁷ I wucticlel ángel tsi' beq'ue i bʌl taza ti ic'. Tsa' loq'ui c'am bʌ t'añ ti' buchlib Dios ya' ti templo am bʌ ti panchan, tsi' yʌlʌ: ¡Tsa'ix ujti! Che'en.

¹⁸ Che' jiñi tsa' tsictiyi i xu'il chajc yic'ot ju'ucña bʌ t'añ yic'ot i t'añ chajc, tsa' tili wen p'ʌtʌl bʌ yujquel lum, c'ʌlʌl ti' cajibal wiñicob ti pañimil ma'añic p'ʌtʌl bʌ yujquel che' bajche' jiñi.

¹⁹ Jiñi colem bʌ tejclum tsa' t'oxle ti uxpejt, jiñi tejclum tac ti pejtelel pañimil tsa' jejmi, Dios tsi' c'ajtesʌbe i mul Babilonia, tsi' yʌq'ue i jap jiñi vino am bʌ ti taza i yejtal bʌ i mich'ajel.

²⁰ Tsa' sʌc jili wits yic'ot lum tac joyol bʌ ti ja', ma'añic tsiquil ba' tsa' majli.

²¹ Tsa' yajli ti' tojlel wiñicob colem tuñija' loq'uem bʌ ti panchan. Ti jujump'ejl tuñija' añ i yalel che' bajche' juncujch (40 kilo), jiñi wiñicob tsi' p'ajayob Dios come wocol jax tsi' yu'biyob cha'añ tuñija'.