Apocalipsis 15 - Jiñi Tsiji' bʌ Wen T'añ cha'añ Estudio

5. JIÑI WUCP'EJL COPA ( 15.1—16.21 ) Jiñi ángelob yic'ot wucchajp wocol tal to bʌ

¹ Tsa' j q'uele yam bʌ i yejtal i p'ʌtʌlel Dios ti panchan, wen ñuc, wen bʌbʌq'uen: Wuctiquil ángelob yic'ot wucchajp tal to bʌ wocol cha'añ mi' tic'lan wiñicob, x'ixicob, come jiñʌch i ts'ʌctʌyib i mich'ajel Dios.

² Che' ja'el tsa' j q'uele mar melbil bʌ ti espejo yilal, xʌ'bʌl ti c'ajc, ya'añob wiñicob tsa'ix bʌ i mʌlbeyob jontol bʌ bʌte'el yic'ot i yejtal, yic'ot i númerojlel i c'aba'. Wa'alobix ti' pam jiñi mar melbil bʌ ti espejo, añ i cha'añob arpa tac aq'uebilo' bʌ i cha'añ Dios.

³ Tsi' c'ʌyiyob i c'ay Moisés, i wiñic Dios, yic'ot i c'ay jiñi Tʌñʌme', tsi' yʌlʌyob: “Wen ñuc, wen uts'at pejtelel a melbal c Yum Dios, jatet Mach bʌ Añic i P'isol a P'ʌtʌlel. Toj a bijlel, isujm ja'el. Jatet i Reyet pejtelel i cha'año' bʌ Dios.

⁴ C Yum, ¿am ba wiñic mach bʌ añic mi caj i bʌc'ñʌbeñet a c'aba', mach bʌ añic mi caj i ñuq'uesʌbeñet a c'aba'? Come jatet jach ch'ujulet. Jiñi cha'añ pejtelel año' bʌ ti pañimil mi caj i tilelob i ch'ujutesañet, come tsa' tsictiyi toj bʌ a meloñel”.

⁵ Ti wi'il tsa' j q'uele, tsa' jajmi ya' ti panchan jiñi Ch'ujul bʌ Tabernáculo ba' lotol jiñi Mandar.

⁶ Tsa' loq'uiyob ti Templo wuctiquil ángelob chucul i cha'añob wucchajp wocol, jiñi ángelob lʌpʌlob i cha'añ sʌc bʌ i pislel, c'ax uts'atax bʌ, sʌsʌc jax, cʌchbil oro ti' tajñ.

⁷ Juntiquil querubín am bʌ i ye'tel yic'ot jiñi uxtiquil tsi' yʌq'ueyob jiñi wuctiquil ángelob wucp'ejl taza melbil bʌ ti oro, but'ul bʌ ti' mich'ajel Dios, jiñi cuxul bʌ ti pejtelel ora.

⁸ Tsa' bujt'i jiñi Templo ti buts' cha'añ i ñuclel Dios yic'ot cha'añ i p'ʌtʌlel. Ma'añic majqui tsa' mejli ti ochel ti Templo jinto tsa' ujti jiñi wucchajp wocol tsa' bʌ i ch'ʌmʌyob tilel jiñi wuctiquil ángelob.