Apocalipsis 14 - Jiñi Tsiji' bʌ Wen T'añ cha'añ Estudio

I c'ay jiñi 144 mil

¹ Ti wi'il tsa' j q'uele ya'añ jiñi Tʌñʌme' ti' pam wits i c'aba' Sión yic'ot waxʌclujumpic (144,000) wiñicob x'ixicob, ts'ijbubilob ti' pam i c'aba' jiñi Tʌñʌme' yic'ot i c'aba' i Tat.

² Tsa' cu'bi t'añ loq'uem bʌ ti panchan lajal bajche' i t'añ ca'bʌl ja' yic'ot c'am bʌ i t'añ chajc. Lajal jiñi t'añ tsa' bʌ cu'bi che' bajche' i t'añ arpa che' woli' ñijcʌntel.

³ Tsi' cha'leyob tsiji' bʌ c'ay ti' tojel i buchlib Dios yic'ot ti' tojel jiñi chʌntiquil querubín yic'ot ti' tojel jiñi ancianojob. Ma'añic majqui tsa' mejli i cʌn jiñi c'ay, cojach jiñi waxʌclujumpic wiñicob x'ixicob tsa' bʌ mʌjñiyob loq'uel ti' tojlel año' bʌ ti pañimil.

⁴ Jiñobʌch sʌco' bʌ mach bʌ añic tsi' cha'leyob ts'i'lel. Mi' tsajcañob jiñi Tʌñʌme' baqui jach mi' majlel. Tsa' mʌjñiyob loq'uel ti' tojlel i pi'ʌlob. Jiñobʌch jiñi ñaxan bʌ pac' ti' tojlel Dios yic'ot jiñi Tʌñʌme'.

⁵ Ma'añic tsa' tajbentiyob i lot, come ma'añobic i bi'bi'lel [ti' tojel i buchlib Dios.]

Jiñi tijicña bʌ t'añ cha'añ uxtiquil ángelob

⁶ Tsa' j q'uele yam bʌ ángel woli bʌ ti wejlel ti ojlil panchan, chucul i cha'añ jiñi wen t'añ am bʌ ti pejtelel ora cha'añ mi' su'beñob jiñi chumulo' bʌ ti pañimil yic'ot jiñi año' bʌ ti pejtelel tejclum tac yic'ot pejtelel wiñicob x'ixicob yujilo' bʌ t'añ ti' chajp ti' chajp.

⁷ C'am tsi' cha'le t'añ, tsi' yʌlʌ: ¡Bʌc'ñanla Dios. Su'benla i ñuclel, tsa'ix tili i yorajlel cha'añ mi' cha'len meloñel. Ch'ujutesanla jiñi tsa' bʌ i mele panchan yic'ot pañimil, yic'ot mar, yic'ot i loq'uib ja' tac! Che'en.

⁸ Yam bʌ ángel, i cha'ticlel bʌ, tsi' tsajca tilel, tsi' yʌlʌ: Jejmeñix, jejmeñix Babilonia, jiñi colem tejclum, come tsi' yʌq'ueyob i jap vino pejtelel año' bʌ ti pañimil, jiñi vino jiñʌch i yejtal i ts'i'lel Babilonia, che'en.

⁹ Yam bʌ ángel, i yuxticlel bʌ, tsi' tsajca tilel, tsi' yʌlʌ ti c'am bʌ t'añ: Mi añ majqui mi' ch'ujutesan jiñi jontol bʌ bʌte'el yic'ot i yejtal, mi añ majqui mi' ch'ʌmben i marcajlel ti' pam mi ti' c'ʌb,

¹⁰ mi caj i yʌq'uentel i jap vino i yejtal bʌ i mich'ajel Dios, mach xʌbʌlic yic'ot ja' i mich'ajel mu' bʌ caj i choc tilel; mi caj i tic'lan ti c'ajc yic'ot azufre ti' tojel jiñi ch'ujul bʌ ángelob, yic'ot ti' tojel jiñi Tʌñʌme'.

¹¹ I buts'il i wocol jiñi wiñicob mi' letsel majlel ti pejtelel ora. Jiñi mu' bʌ i ch'ujutesañob jiñi jontol bʌ bʌte'el yic'ot i yejtal yic'ot jiñi mu' bʌ i ch'ʌmbeñob i c'aba' ma'añic mi' c'ajob i yoj, ti q'uiñil mi jiñic ti ac'ʌlel, che'en.

¹² Jiñi cha'añ la' i cuchob wocol ti' xuc'tʌlel i pusic'al i cha'año' bʌ Dios mu' bʌ i jac'beñob i mandar Dios yic'ot i cʌntesʌbal Jesús.

¹³ Tsa' cu'bi t'añ loq'uem bʌ ti panchan, tsi' su'beyon: “Ts'ijban: Tijicñayob ti pejtelel ora jiñi chʌmeño' bʌ tsa' bʌ chʌmiyob che' añob ti lac Yum. Tijicñayob cu, che'en jiñi Espíritu, come mi caj i c'ajob i yoj, tsi' cha'leyob wocol e'tel pero woli' c'ajbeñob i wut i melbal”, che'en.

I yorajlel c'ajbal ti pañimil

¹⁴ Awilan, tsa' j q'uele tocal wen sʌsʌc bʌ. Ya' buchul ti tocal tsa' j q'uele i Yalobil Wiñic, c'ʌcʌl ti' jol i corona melbil bʌ ti oro, chucul ti' c'ʌb rocol bʌ machit, jay bʌ i yej.

¹⁵ Ti jiñi jach bʌ ora tsa' loq'ui yam bʌ ángel ti Templo, c'am tsi' cha'le t'añ, tsi' pejca ti c'am bʌ t'añ jiñi buchul bʌ ti tocal: ¡Wejlun majlel a machit, cha'len c'ajbal, come tsa'ix tili i yorajlel, wen tiquiñix i wut ti pañimil! Che'en.

¹⁶ Jiñi buchul bʌ ti tocal tsa' caji i wejlun majlel jiñi machit ti pañimil, i wut i pʌc'ʌbob tsi' loto jiñi wiñicob x'ixicob.

¹⁷ Yam bʌ ángel tsa' loq'ui ti Templo am bʌ ti panchan, chucul i cha'añ ja'el rocol bʌ machit, jay bʌ i yej.

¹⁸ Yam bʌ ángel tsa' loq'ui ba'añ i pulʌntib i majtañ Dios, añ i p'ʌtʌlel cha'añ mi' jisan pañimil ti c'ajc, c'am tsi' cha'le t'añ, tsi' pejca jiñi am bʌ i machit jay bʌ i yej, tsi' yʌlʌ: ¡Wejlun majlel a machit jay bʌ i yej, tempan jiñi tsoc'ol bʌ ts'usub ti pañimil, come c'ʌñix jiñi ts'usub! Che'en.

¹⁹ Jiñi ángel tsi' wejlu majlel rocol bʌ i machit ti pañimil, tsi' laj tempa i wut ts'usubil ti pañimil tsi' choco ochel ts'usub ti' yʌjts'ib, i yejtal bʌ i mich'ajel Dios.

²⁰ Tsa' t'uchtʌnti ts'usub ya' ti' yʌjts'ib ti junwejl tejclum, tsa' loq'ui ch'ich' ti' yʌjts'ib ts'usub, tsa' tam-a letsel c'ʌlʌl ti' frenojlel i yej caballo, jo'lujunc'al (300) kilómetro i ñajtlel.