Apocalipsis 13 - Jiñi Tsiji' bʌ Wen T'añ cha'añ Estudio

Jiñi cha'cojt jontol bʌ bʌte'el

¹ Tsa' wa'leyon ti' ji'il mar, tsa' j q'uele jontol bʌ bʌte'el woli bʌ i loq'uel ti mar, añ wucp'ejl i jol yic'ot lujunts'ijt i xulub yic'ot lujunxojt corona ti' xulub. Ya' ti' jol tac ts'ijbubil t'añ mu' bʌ i p'aj Dios.

² Tsa' j q'uele lajalʌch jiñi jontol bʌ bʌte'el bajche' c'ʌnbo'lay, che' yilal i yoc bajche' i yoc oso. Lajal i yej bajche' i yej colem bajlum. Jiñi colem ajin tsi' yʌq'ue i p'ʌtʌlel yic'ot i buchlib yic'ot ñuc bʌ i ye'tel.

³ Tsa' j q'uele añ i lojwel ti jump'ejl i jol, colelix i chʌmel, pero tsa' cha' lajmi i lojwel. Pejtelel año' bʌ ti pañimil tsi' tsajcayob jiñi jontol bʌ bʌte'el, tsa' toj sajtiyob i pusic'al.

⁴ Tsi' ch'ujutesayob jiñi colem ajin, come jiñi ajin tsi' yʌq'ue i ye'tel jiñi jontol bʌ bʌte'el, jiñi cha'añ tsi' ch'ujutesayob jiñi jontol bʌ bʌte'el, tsi' yʌlʌyob: ¿Baqui añ yam bʌ lajal bajche' jiñi jontol bʌ bʌte'el? ¿Majqui mi mejlel i cha'len guerra ti' contra?

⁵ Che' ja'el tsa' aq'uenti i p'ʌtʌlel ti t'añ cha'añ mi' chañ-esan i bʌ cha'añ mi' p'aj Dios yic'ot tsa' aq'uenti i p'ʌtʌlel cha'añ mi' cha'len ye'tel cha'p'ejl i yuxc'al (42) uw.

⁶ Tsi' c'ʌñʌ i yej i contrajin Dios, tsi' p'aja Dios yic'ot i c'aba', yic'ot i chumlib, yic'ot jiñi chumulo' bʌ ti panchan.

⁷ Tsa' aq'uenti i cha'len guerra ti' contra i cha'año' bʌ Dios cha'añ mi' mʌlob; yic'ot ja'el tsa' aq'uenti i ye'tel ti yumʌl ti' tojlel wiñicob x'ixicob año' bʌ ti pejtelel tejclum tac yujilo' bʌ t'añ ti' chajp ti' chajp.

⁸ Pejtelel woliyo' bʌ ti chumtʌl ti pañimil, mach bʌ otsʌbilic i c'aba' ti jiñi juñ ba' otsʌbilob i c'aba' jiñi año' bʌ i cuxtʌlel c'ʌlʌl ti' tejchibal pañimil, mi caj i ch'ujutesañob jiñi bʌte'el, jiñi juñ i cha'añʌch jiñi Tʌñʌme' tsa' bʌ tsʌnsʌnti.

⁹ Jiñi am bʌ i chiquin la' i yu'bin:

¹⁰ “Jiñi mu' bʌ i cajel ti cʌjchel cʌchʌl mi' majlel. Jiñi mu' bʌ i cha'len tsʌnsa ti espada mi caj i tsʌnsʌntel ti espada”. Che' jiñi mi' tsictiyel i p'ʌtʌlel i cha'año' bʌ Dios ti' cuchol wocol, yic'ot i xuc'tʌlel i pusic'al che' mi' ñopob Dios.

¹¹ Ti wi'il tsa' j q'uele yam bʌ jontol bʌ bʌte'el, tsa' loq'ui tilel ti lum. Añ cha'ts'ijt i xulub lajal bajche' i xulub alʌ tat tʌñʌme', pero tsi' cha'le t'añ che' bajche' colem ajin.

¹² Lajal i p'ʌtʌlel bajche' jiñi ñaxan bʌ jontol bʌ bʌte'el, tsi' cha'le e'tel ti' tojlel jiñi ñaxan bʌ, tsi' xic'beyob pejtelel pañimil yic'ot pejtelel año' bʌ ti pañimil cha'añ mi' ch'ujutesañob jiñi ñaxan bʌ bʌte'el tsa' bʌ lajmi i lojwel.

¹³ Tsi' pʌsʌ ca'bʌl ñuc tac bʌ i yejtal i p'ʌtʌlel, tsi' pʌyʌ loq'uel c'ajc ti panchan, tsi' ju'sa ti lum ti' tojlel wiñicob.

¹⁴ Tsi' loti pejtelel chumulo' bʌ ti pañimil yic'ot i yejtal i p'ʌtʌlel tsa' bʌ aq'uenti i pʌs ti' tojlel jiñi jontol bʌ bʌte'el, tsi' yʌq'ueyob mandar jiñi chumulo' bʌ ti pañimil cha'añ mi' melob i yejtal jiñi jontol bʌ bʌte'el tsa' bʌ lojwi ti espada, tsa' bʌ cha' lajmi i lojwel.

¹⁵ Tsa' aq'uenti i p'ʌtʌlel cha'añ mi' yʌq'ueñ i ch'ujlel i yejtal jiñi ñaxan bʌ bʌte'el cha'añ mi' cha'len t'añ yic'ot cha'añ mi' yʌc' ti tsʌnsʌntel majqui jach mach yomic i ch'ujutesan.

¹⁶ Che' ja'el tsi' yʌc'ʌ i t'añ cha'añ mi' ts'ijbubentel i marcajlel pejtelel wiñicob x'ixicob ti ñoj bʌ i c'ʌb o ti' pam, jiñi ñuco' bʌ yic'ot ch'och'oco' bʌ, jiñi wen chumulo' bʌ yic'ot jiñi mach bʌ añobic i chu'bʌañ, jiñi librejo' bʌ yic'ot año' bʌ ti' yum,

¹⁷ yic'ot ma'añic majqui tsa' mejli i cha'len choñoñel yic'ot mʌñoñel che' ma'añic i marcajlel, i marcajlel jiñʌch i c'aba' jiñi jontol bʌ bʌte'el o i númerojlel i c'aba'.

¹⁸ Jiñʌch isujmlel yom bʌ mi la' ña'tan. Jiñi am bʌ i ña'tʌbal la' i sʌclan isujmlel i númerojlel jiñi jontol bʌ bʌte'el, jiñʌch i númerojlel i c'aba' wiñic, i númerojlel jiñʌch lujunc'al i cha'bajc' yic'ot wʌcp'ejl i chʌnc'al (666).