Apocalipsis 12 - Jiñi Tsiji' bʌ Wen T'añ cha'añ Estudio

4. I YEJTAL TAC ( 12.1—14.20 ) Jiñi x'ixic yic'ot colem ajin

¹ Tsa' tsictiyi ñuc bʌ i yejtal i p'ʌtʌlel Dios ti panchan: Juntiquil x'ixic lʌpʌl bʌ i cha'añ q'uiñ. Añ uw ti' ye'bal i yoc. C'ʌcʌl ti' jol jump'ejl corona melbil bʌ ti lajchʌmp'ejl (12) ec'.

² Cʌntʌbil to i yalobil jiñi x'ixic, tsa' caji ti wocol, tsi' cha'le oñel che' woli ti bajq'uel, come i yorajlelix mi' yilan pañimil i yalobil.

³ Tsa' tsictiyi yam bʌ i yejtal i p'ʌtʌlel ti panchan. Awilan, añ colem ajin chʌchʌc bʌ, añ wucp'ejl i jol yic'ot lujunts'ijt i xulub, añ wucxojt i corona.

⁴ I ñej tsi' tujc'a ca'bʌl ec' ti panchan, tsi' choco ju'bel ti lum jujump'ejl ec' loq'uem bʌ ti u'uxp'ejl, jiñi colem ajin tsa' wa'le ti' tojel x'ixic che' woli ti bajq'uel cha'añ mi' c'uxben i yalobil che' mi' yilan pañimil.

⁵ Tsi' yila pañimil ch'itoñ bʌ i yalobil mu' bʌ caj i cha'len yumʌl ti pejtelel tejclum tac, chucul i cha'añ bara yilal melbil bʌ ti tsucu taq'uiñ, tsa' pʌjyi letsel i yalobil ba'añ Dios c'ʌlʌl ti' buchlib Dios.

⁶ Tsa' puts'i majlel jiñi x'ixic ti jochol bʌ lum ba' chajpʌbil i yajñib ti Dios cha'añ ya'i mi' we'sʌntel jiñi x'ixic uxc'al i chʌmbajc' (1,260) q'uiñ.

⁷ Ti wi'il tsa' caji guerra ti panchan. Miguel yic'ot i yángelob tsi' cha'leyob guerra ti' contra jiñi colem ajin yic'ot i yángelob jiñi ajin.

⁸ Tsa' mʌjli i cha'añ Miguel, ma'añix i yajñib jiñi ajin ya' ti panchan yic'ot i yángelob.

⁹ Tsa' chojqui ju'bel jiñi colem ajin, jiñʌch jiñi oñiyix bʌ lucum, am bʌ cha'chajp i c'aba', xi'ba yic'ot Satanás, jiñʌch mu' bʌ i lotin pejtelel wiñicob x'ixicob ti pañimil, tsa' chojqui ju'bel ti lum yic'ot pejtelel i yángelob.

¹⁰ Che' jiñi tsa' cu'bi c'am bʌ t'añ ti panchan, tsi' yʌlʌ: “Wʌle tsa'ix tili i coltʌntel wiñicob x'ixicob yic'ot i p'ʌtʌlel yic'ot i yumʌntel lac Dios yic'ot i p'ʌtʌlel Cristo. Come tsa'ix chojqui ju'bel jiñi mu' bʌ i su'b i mul la quermañujob, jiñi mu' bʌ i su'b lac mul ti' tojlel Dios ti q'uiñil ti ac'ʌlel.

¹¹ Jiñi hermañujob tsi' mʌlbeyob xi'ba cha'añ ti' ch'ich'el jiñi Tʌñʌme' yic'ot i t'añ tsa' bʌ i su'beyob. Ma'añic tsi' c'uxbiyob i cuxtʌlel che' bʌbʌq'uen mi' yʌjq'uelob ti chʌmel.

¹² Yom tijicña panchan yic'ot chumulo' bʌ ti panchan, che'en. O'bol la' bʌ añet bʌ la ti pañimil yic'ot ti mar, come jiñi xi'ba tsa'ix ju'bi tilel ba'añetla. Añ ca'bʌl i mich'ajel come yujil lʌc'ʌlix i yorajlel”.

¹³ Jiñi colem ajin che' bʌ tsi' q'uele chocbilix ju'bel ti lum, tsa' caji i yajñesan majlel jiñi x'ixic tsa' bʌ i yʌc'ʌ ti pañimil ch'itoñ bʌ i yalobil.

¹⁴ Tsa' aq'uenti jiñi x'ixic cha'q'uejl i wich' che' bajche' i wich' colem xiye' cha'añ mi' puts'tan xi'ba, tsi' cha'le wejlel majlel ti jochol bʌ lum ti' yajñib, ya'i tsa' we'sʌnti uxp'ejl ja'b yic'ot ojlil.

¹⁵ Jiñi lucum tsi' beq'ue loq'uel ja' ti' yej che' bajche' colem ja', tsi' chocbe majlel ti' pat jiñi x'ixic cha'añ mi' jisan ti but'ja'.

¹⁶ Jiñi lum tsi' colta jiñi x'ixic, jiñi lum tsi' cawa i yej yilal, tsi' japʌ jiñi colem ja' tsa' bʌ bejq'ui loq'uel ti' yej colem ajin.

¹⁷ Che' jiñi, jiñi colem ajin ca'bʌl tsi' mich'le jiñi x'ixic, tsa' majli i cha'len guerra ti' contra pejtelel i p'olbal jiñi x'ixic mu' bʌ i jac'beñob i mandar Dios, mu' bʌ i ñopbeñob i t'añ Jesucristo.