Apocalipsis 11 - Jiñi Tsiji' bʌ Wen T'añ cha'añ Estudio

Jiñi cha'tiquil mu' bʌ i yʌc'ob ti cʌjñel Jesucristo

¹ Jiñi cha'añ tsa' aq'uentiyon junts'ijt tam bʌ te' cha'añ p'isoñib, tsa' su'bentiyon: Ch'ojyen. P'isi i Templo Dios yic'ot i pulʌntib i majtañ Dios yic'ot jiñi mu' bʌ i ch'ujutesañob Dios ya' ti Templo.

² Mach a p'is i pam Templo am bʌ ti' mal corral, la' to ajñic come aq'uebilobix gentilob. Cha'p'ejl i yuxc'al (42) uw mi caj i t'uchtañob jiñi ch'ujul bʌ tejclum.

³ Mi caj cʌq'uen i p'ʌtʌlel cha'tiquil testigo mu' bʌ caj i yʌc'oñob ti cʌjñel. Uxc'al i chʌmbajc' (1,260) q'uiñ mi caj i cha'leñob subt'añ, lʌpʌl i cha'añob i pislel melbil bʌ ti' tsutsel chivo.

⁴ Jiñi cha'tejc olivo te' yic'ot cha'ts'ijt i yajñib ñichim i yejtalobʌch jiñi cha'tiquil testigojob wa'alo' bʌ ti' tojel i Yum pañimil.

⁵ Che' añ majqui yom i lowob mi' loc'sañob c'ajc ti' yej cha'añ mi' jisan i contrajob, che'ʌch mi' caj ti wersa chʌmel jiñi yom bʌ i low jiñi cha'tiquil.

⁶ Añob i p'ʌtʌlel jiñi cha'tiquil cha'añ mi' ñup'ob panchan cha'añ ma'añic mi' yajlel ja'al ba' ora woliyob ti subt'añ, añob i p'ʌtʌlel cha'añ mi' pʌntesan ti ch'ich' i loq'uib ja'. Añob i p'ʌtʌlel cha'añ mi' tic'lañob pañimil ti ca'bʌl wocol che' bajche' jayajl yomob.

⁷ Che' mi' yujtel i ye'tel jiñi cha'tiquil testigo, mi caj i tilel jiñi jontol bʌ bʌte'el mu' bʌ i letsel loq'uel ti ch'eñ mach bʌ añix mi' tajben i ye'bal, mi caj i tech guerra ti' contra jiñi cha'tiquil, mi caj i mʌjlel i cha'añ, mi caj i tsʌnsan jiñi cha'tiquil.

⁸ Mi caj i ñol cʌytʌlob i bʌc'tal jiñi chʌmeño' bʌ ti colem bij ti colem tejclum ya' ba' tsa' ch'ijle ti cruz i Yum, añ i c'aba' ti lajiya Sodoma yic'ot Egipto.

⁹ Ca'bʌl wiñicob ch'oyolo' bʌ ti ca'bʌl tejclum ti ca'bʌl lum yujilo' bʌ t'añ ti' chajp ti' chajp mi caj i q'uelbeñob i bʌc'tal jiñi chʌmeño' bʌ ojlil i chʌmp'ejl q'uiñ, come mach yomobic i yʌc'ob i t'añ cha'añ mi' mujquelob.

¹⁰ Tijicñayob i pusic'al jiñi chumulo' bʌ ti pañimil ti' tojlelob, mi' yʌq'ueñob i bʌ i majtañ tac, come ñucob i pusic'al cha'añ tsa' jiliyob jiñi cha'tiquil, come tsi' tic'layob jiñi chumulo' bʌ ti pañimil.

¹¹ Che' ñumeñix ojlil i chʌmp'ejl q'uiñ, Dios tsi' cha' otsʌbeyob i ch'ujlel cha'añ mi' cuxtʌyelob, tsa' wa'leyob ti' yoc, wen ca'bʌl tsi' cha'leyob bʌq'uen jiñi tsa' bʌ i q'ueleyob.

¹² Jiñi cha'añ jiñi cha'tiquil x'alt'añob tsi' yu'biyob c'am bʌ t'añ loq'uem bʌ ti panchan, tsi' su'beyob: ¡Letsenla tilel ilayi! Tsa' letsiyob majlel ti panchan ti tocal, jiñi i contrajob tsi' q'ueleyob.

¹³ Ti jim bʌ ora tsa' tili colem yujquel, tsa' t'oxle yilal tejclum ti lujumpejt; jumpejt tsa' jili. Tsa' chʌmiyob ojlil i waxʌclujumbajc' (7,000) wiñicob cha'añ jiñi yujquel. Jiñi cuxulob to bʌ tsa' wen cajiyob ti bʌq'uen, tsi' su'buyob i ñuclel Dios am bʌ ti panchan.

¹⁴ Tsa' ujti ti ñumel i cha'yajlel wocol. Awilan, mi caj i tilel ti ora i yuxyajlel wocol.

I wucts'ijtlel bʌ trompeta

¹⁵ Jiñi wucticlel ángel tsi' wusu i trompeta, tsa' cajiyob ti c'am bʌ t'añ ti panchan, tsi' yʌlʌyob: “I yumʌntel tac pañimil tsa'ix ochi ti' wenta lac Yum yic'ot ti' wenta Cristo. Mi caj i cha'len yumʌl ti pejtelel ora”.

¹⁶ Jiñi chʌntiquil i cha'c'al (24) ancianojob buchulo' bʌ ti ye'tel ti' tojel Dios tsi' pʌcchocoyob i bʌ, tsi' ch'ujutesayob Dios,

¹⁷ tsi' yʌlʌyob: “Wocolix a wʌlʌ c Yum Dios mach bʌ añic i p'isol a p'ʌtʌlel. Añet bʌ wʌle yic'ot ti wajali yic'ot mu' bʌ caj a cha' tilel, come tsa'ix a ch'ʌmʌ ñuc bʌ a p'ʌtʌlel yic'ot a yumʌntel.

¹⁸ Tsa' mich'ayob jiñi año' bʌ ti pañimil, jiñi cha'añ wolix a pʌs a mich'ajel. I yorajlelix ma' mel jiñi chʌmeño' bʌ. I yorajlelix ma' wʌq'ueñob i chobejtʌbal a wiñicob yic'ot x'alt'añob a cha'añ, yic'ot pejtelel a cha'año' bʌ mu' bʌ i bʌc'ñañob a c'aba', jiñi ch'och'oco' bʌ yic'ot jiñi ñuco' bʌ. I yorajlelix ma' jisan jiñi mu' bʌ i jisañob pañimil”.

¹⁹ Tsa' jajmi i templo Dios ya' ti panchan. I yArcajlel jiñi xuc'ul bʌ i t'añ Dios tsa' q'uejli ti' mal templo. Tsa' caji ti tsictiyel i xu'il tac chajc, yic'ot c'am bʌ t'añ tac, yic'ot i t'añ tac chajc, yic'ot yujquel lum, yic'ot colem bʌ i tuñija'.