Apocalipsis 10 - Jiñi Tsiji' bʌ Wen T'añ cha'añ Estudio

Jiñi ángel yic'ot jiñi alʌ juñ

¹ Tsa' j q'uele tsa' loq'ui ti panchan yam bʌ p'ʌtʌl bʌ ángel, tsa' ju'bi tilel, añ tocal ti' joytʌlel, añ t'oxja' ti' chañelal i jol. Che' yilal i wut bajche' q'uiñ. Che'ʌch i yoc bajche' wa'al bʌ c'ajc.

² Ya' ti' c'ʌb añ bʌlbil bʌ alʌ juñ, jambil, tsi' yʌc'ʌ ñoj bʌ i yoc ti' pam jiñi mar, tsi' yʌc'ʌ ts'ej bʌ i yoc ti' pam jiñi lum,

³ wen c'am tsi' cha'le oñel che' bajche' mi' cha'len t'añ colem bajlum, che' bʌ tsa' ujti ti oñel, wucyajl tsi' cha'le t'añ chajc.

⁴ Che' wucyajl tsa' ujti ti t'añ chajc, tsa' cʌlʌ cajel ti ts'ijb, pero tsa' cu'bi t'añ loq'uem bʌ ti panchan, tsi' su'beyon: “Ñup'u ti sello chuqui tsi' su'bu che' wucyajl tsi' cha'le t'añ chajc. Mach a ts'ijban”, che'en.

⁵ Jiñi ángel tsa' bʌ j q'uele, jiñi xat wa'al bʌ ti mar yic'ot ti lum, tsi' letsa i c'ʌb ti panchan.

⁶ Tsi' su'bu t'añ ti' c'aba' jiñi cuxul bʌ ti pejtelel ora, tsa' bʌ i mele panchan yic'ot i bʌl, yic'ot pañimil yic'ot i bʌl, yic'ot colem mar yic'ot i bʌl, tsi' yʌlʌ mach chʌn jalix mi caj i jilel pañimil.

⁷ Che' mi' cha'len t'añ i wucticlel ángel, che' mi' cajel i wus trompeta, mi' caj ti ts'ʌctiyel isujmlel Dios maxto bʌ tsictiyemic ti yam bʌ ora che' bajche' Dios tsi' su'be i wiñicob, jiñi x'alt'añob, che'en.

⁸ Jiñi t'añ tsa' bʌ cu'bi loq'uem bʌ ti panchan tsi' cha' pejcayon, tsi' yʌlʌ: Cucu, ch'ʌmʌ jiñi jamʌl bʌ juñ am bʌ ti' c'ʌb jiñi ángel xat wa'al bʌ ti' pam jiñi mar yic'ot ti' pam jiñi lum, che'en.

⁹ Jiñi cha'añ tsa' majliyon ya' ba'añ jiñi ángel, tsa' c su'be yom mi' yʌq'ueñon jiñi alʌ juñ. Jiñi ángel tsi' su'beyon: Ch'ʌmʌ, c'uxu. Ch'aj mi caj a wu'bin ti a ñʌc', pero tsaj mi caj a wu'bin ti a wej lajal bajche' i tsajel cha'b, che'en.

¹⁰ Jiñi cha'añ tsa' c ch'ʌmʌ jiñi alʌ juñ am bʌ ti' c'ʌb ángel, tsa' j c'uxu. Tsa' cu'bi ti quej tsaj che' bajche' cha'b, che' bʌ tsa' ujti j c'ux, ch'aj tsa' cu'bi tic ñʌc'.

¹¹ Tsi' su'beyon: Wersa ma' cha' su'b chuqui mi caj i tajob ca'bʌl wiñicob x'ixicob yic'ot i reyob ca'bʌl tejclum tac, yujilo' bʌ t'añ ti' chajp ti' chajp, che'en.