3 Juan 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Ancianojon, mic ts'ijbubeñet ili juñ c'uxbibilet bʌ Gayo mu' bʌ j c'uxbin ti isujm.

² C'uxbibilet bʌ, com cha'añ wen uts'at ma' ñusan q'uiñ, yic'ot cha'añ chʌn c'oq'uet che' bajche' uts'at añet ti a ch'ujlel.

³ Wen tijicña tsa' cu'bi che' bʌ tsa' juliyob la quermañujob i su'beñon cha'añ xuc'ulet ti isujm, woliyet ti xʌmbal ti isujmlel Dios.

⁴ Che' mi cu'bin woliyob ti xʌmbal ti isujmlel jiñi calobilob, wen tijicñayon, ma'añic chuqui mi' ñumen tijicñesañon cojach che' mi cu'bin añob ti isujmlel Dios.

Wen bʌ i melbal Gayo

⁵ C'uxbibilet bʌ, xuc'ul woli' a mel che' ma' p'untan la quermañujob yic'ot jiñi mach bʌ cʌmbilobic a cha'añ.

⁶ Woli' pam su'bob ti' tojlel xñopt'añob bajche' añ a c'uxbiya. Uts'at woli' a mel che' ma' coltañob majlel ti xʌmbal che' bajche' yom cha'añ i ye'tel Dios.

⁷ Come tsa' loq'uiyob majlel cha'añ ti' c'uxbintel i c'aba' Jesús, ma'añic chuqui tsi' ch'ʌmbeyob ti' c'ʌb jiñi gentilob.

⁸ Joñonla yom mi lac pʌyob ochel ti lac cotot cha'añ che' jiñi tem x'e'telonla yic'otob ti isujmlel.

Mach bʌ uts'atic i melbal Diótrefes

⁹ Tsa'ix c ts'ijbubeyob jiñi mu' bʌ i tempañob i bʌ. Pero jiñi Diótrefes mu' bʌ i mulan i wa'chocon i bʌ che' bajche' yumʌl ti' tojlelob, ma'añic mi' p'ison lojon ti' wenta.

¹⁰ Cha'añ ti' caj iliyi, che' mic majlel, mi caj c cha' c'ajtesʌbeñob i melbal yic'ot jontol bʌ i t'añ Diótrefes ti j contra lojon; mach cojic jach jiñi, ma'añic mi' ch'ʌm ti' wenta lac quermañujob ja'el. Mi' tic' ja'el jiñi yomo' bʌ i pʌyob ochel ti yotot, mi' chocob loq'uel ti' tojlel xñopt'añob.

Jiñi uts'at bʌ i melbal Demetrio

¹¹ C'uxbibilet bʌ, mach a tsajcan jontolil, tsajcan chuqui uts'at. Jiñi mu' bʌ i mel chuqui uts'at i cha'añʌch Dios, pero jiñi mu' bʌ i cha'len jontolil, mach i cʌñʌyic Dios.

¹² Uts'at bajche' woli' mel jiñi Demetrio, ti' pejtelel wiñicob x'ixicob mi' yʌlob uts'at mi' mel che' bajche' cʌntesʌbil cha'añ isujmlel Dios. Che'ʌch mic su'b lojon ja'el. La' wujil isujmʌch chuqui mic c su'b lojon.

I yujtibal i yutslel i t'añ

¹³ Añ to ca'bʌl chuqui com c ts'ijbubeñet, pero mach comic c ts'ijban ti tinta yic'ot ti pluma.

¹⁴ Come com j q'uelet ti ora cha'añ mi lac pejcan lac bʌ che' temel añonla.

¹⁵ La' ajñic i ñʌch'tʌlel i pusic'al Dios ti a pusic'al. Lac pi'ʌlob mi' yʌq'ueñet cortesía. Aq'uen cortesía lac pi'ʌlob ti' c'aba' ti jujuntiquil.