2 Timoteo 4 - Jiñi Tsiji' bʌ Wen T'añ cha'añ Estudio

Su'bu jiñi wen t'añ

¹ Jiñi cha'añ mic su'beñet ti' tojlel Dios yic'ot lac Yum Jesucristo mu' bʌ caj i tilel i mel jiñi cuxulo' bʌ yic'ot jiñi chʌmeño' bʌ che' mi' wa'chocon i yumʌntel,

² su'bu jiñi wen t'añ, yom chajpʌbilet ti' yorajlel subt'añ yic'ot che' mach i yorajlelic. Xic'beñob i ñop, su'beñob i mul, xic'beñob ti uts'at ti' yutslel a pusic'al yic'ot i cʌntesa Dios.

³ Come tal i yorajlel che' ma'añic mi caj i mulañob toj bʌ cʌntesa, mi caj i mulañob i yu'bin yam bʌ t'añ, mi caj i pʌyob ca'bʌl i maestrojob mu' bʌ i su'bob chuqui mi' mulañob,

⁴ mi caj i cʌyob i yu'bin chuqui tac isujm, mi caj i jac'beñob i sajtemal i ñojte'elob.

⁵ Ti pejtelel chuqui tac mi' yujtel chʌcʌ q'uele a bʌ, cuchu wocol, cha'len e'tel ti subt'añ, ts'ʌcʌl yom ma' mel a we'tel.

⁶ Come mach jalix mi caj cʌjq'uel ti' majtañ Dios. Lʌc'ʌlix i yorajlel cha'añ mij cʌy pañimil.

⁷ Tsa' c cha'le wen bʌ guerra, wʌle, c'otemoñix ba' jaxʌl c bijlel, tsa' c wen cʌnta jiñi mu' bʌ lac ñop.

⁸ Ixcu jiñi mu' bʌ caj i yujtel, woli c pijtan jiñi corona mu' bʌ caj i tsictesan toj bʌ lac pusic'al, mu' bʌ caj i yʌq'ueñon lac Yum, jiñi toj bʌ xmeloñel, mach cojic jach joñon pero pejtelel yomo' bʌ i q'uel lac Yum che' mi' tilel.

I su'bentel Timoteo

⁹ Cha'len wersa cha'añ ma' tilel ti ora a q'uelon,

¹⁰ come Demas tsi' cʌyʌyon cha'añ tsi' mula pañimil, tsa' majli ti Tesalónica, Crescente tsa' majli ti Galacia, Tito tsa' majli ti Dalmacia.

¹¹ Jiñi jach Lucas wʌ'an quic'ot. Pʌyʌ tilel Marcos a wic'ot, come añ i c'ʌjñibal cha'añ mi' coltañon.

¹² Tsa' c choco majlel Tíquico ti Éfeso.

¹³ Che' ma' tilel ch'ʌmʌ tilel jiñi pʌl bʌ tsuts bujcʌl tsa' bʌ j cʌyʌ ti' yotot Carpo ya' ti Troas, yic'ot jiñi juñ tac. Wersa yom ja'el jiñi bʌlbil bʌ pʌchi ba' mic cha'len ts'ijb.

¹⁴ Alejandro, jiñi xten tsucu taq'uiñ, ca'bʌl tsi' cha'le jontolil tij contra; la' i yʌq'ueñ lac Yum i tojol che' bajche' añ i melbal.

¹⁵ Chʌcʌ q'uele a bʌ ja'el ti' tojlel Alejandro come ca'bʌl tsi' contraji lac t'añ.

¹⁶ Ma'añic majqui tsi' coltayon che' bʌ tsa' c ñaxan mele c bʌ, ti pejtelelob tsi' cʌyʌyoñob; la' ñusʌbenticob i mul.

¹⁷ Pero lac Yum tsa' wa'le tic t'ejl, tsi' yʌq'ueyon c p'ʌtʌlel cha'añ ts'ʌcʌl mic su'b jiñi wen t'añ, cha'añ mi' yu'biñob pejtelel gentilob. Che'i tsi' coltayon loq'uel ti' yej colem bajlum yilal.

¹⁸ Lac Yum mi caj i coltañon loq'uel ti pejtelel jontolil. Mi caj i cʌntañon c'ʌlʌl mi cochel ti' yumʌntel panchan. La' tsictiyic i ñuclel lac Yum ti pejtelel ora. Amén.

I yujtibal i yutslel i t'añ

¹⁹ Aq'uen cortesía Prisca yic'ot Aquila yic'ot jiñi año' bʌ ti' yotot Onesíforo.

²⁰ Tsa' cʌle Erasto ya' ti Corinto. C'am tsa' j cʌyʌ Trófimo ya' ti Mileto.

²¹ Cha'len wersa cha'añ ma' tilel che' maxto i yorajlelic tsʌñal. Mi' yʌq'ueñet cortesía Eubulo yic'ot Pudente, yic'ot Lino, yic'ot Claudia, yic'ot pejtelel la quermañujob.

²² La' ajñic ti a pusic'al lac Yum Jesucristo. La' ajñic la' wic'ot i yutslel i pusic'al Dios. [Amén.]