2 Timoteo 3 - Jiñi Tsiji' bʌ Wen T'añ cha'añ Estudio

Che' bajche' yilal jiñi wiñic ti cojix bʌ q'uiñ

¹ Che' ja'el yom ma' ch'ʌmben isujm: Ti cojix bʌ q'uiñ tal i yorajlel bʌbʌq'uen tac bʌ.

² Come jujuntiquil mi caj i bajñel c'uxbin i bʌ, mi caj i mulañob taq'uiñ, mi caj i chañ-esañob i bʌ, ñuc mi caj i q'uelob i bʌ, mi caj i cha'leñob p'ajoñel, mi caj i ñusʌbeñob i t'añ i tat i ña'. Ma'añic mi' su'beñob Dios wocolix i yʌlʌ, mach i cʌñʌyobic Dios.

³ Mach yujilobic c'uxbiya mi p'untaya, x'u'yajob, ma'añic mi' tic'ob i pusic'al, wen jontolob, mi' ts'a'leñob chuqui uts'at.

⁴ Mi' yʌc'ob i pi'ʌlob ti' c'ʌb i contra, bʌbʌq'uen jax i melbalob, c'ax ñuc mi' pʌsob i bʌ, mi' mulañob pejtelel chuqui tac yom i pusic'al, ma'añic mi' c'uxbiñob Dios,

⁵ mi lon pʌsob i bʌ woli ch'ujutesañob Dios, pero ma'añic mi' cʌmbeñob i p'ʌtʌlel. Tʌts'ʌ a bʌ ti' tojlel wiñicob mu' bʌ i melob che' bajche' jiñi.

⁶ Come ti mayajax yic'ot leco bʌ i cʌntesa mi' socbeñob i pusic'al tonto bʌ x'ixicob teñelo' bʌ ti mulil, woli jach i jac'beñob i colosojlel i pusic'al.

⁷ Pejtelel ora woli' ñʌch'tañob i cʌntesʌntel, pero ma'añic mi ñopob jiñi mero isujm bʌ.

⁸ Che' bajche' tsi' contrajiyob Moisés jiñi Janes yic'ot Jambres, che' ja'el jiñi wiñicob mi' contrajiñob isujmlel, jontol chuqui mi' ña'tañob ti' pusic'al, tsi' junyajlel cʌyʌyob jiñi woli bʌ lac ñop.

⁹ Pero mach ti pejtelelic ora mi caj i melob, come mi' caj i cʌjñel i tontojlel ti' tojlel yaño' bʌ, che' bajche' tsa' cʌjñi i tontojlel jiñi yam bʌ cha'tiquil.

¹⁰ Pero jatet tsa'ix a ñopo j cʌntesa yic'ot c melbal, yic'ot jiñi com bʌ c mel, yic'ot c ñopbal, yic'ot bajche' mij cuchben i mul yaño' bʌ, yic'ot j c'uxbiya, yic'ot i xuc'tʌlel c pusic'al ti pijt,

¹¹ yic'ot c tic'lʌntel, yic'ot c wocol, yic'ot jiñi tsa' bʌ c ñusa ya' ti Antioquía yic'ot ti Iconio, yic'ot ti Listra; tsa' cuchu pejtelel c tic'lʌntel, pero lac Yum tsi' coltayon loq'uel ti pejtelel.

¹² Majqui jach yom i yajñel ti ch'ujul ti Cristo Jesús, mux i tic'lʌntel ja'el,

¹³ pero jiñi jontolo' bʌ yic'ot xlotiyajob, utsi utsijax mi' chʌn melob i jontolil, mi caj i lotiñob yaño' bʌ, mi caj i lotintelob ja'el.

¹⁴ Ixcu jatet, ajñen che' bajche' tsa' cʌntesʌntiyet come tsa' wen ch'ʌmbe isujm, awujil ja'el majqui tsi' cʌntesayet.

¹⁵ C'ʌlʌl che' alʌlet to, cʌmbilix a cha'añ jiñi Ch'ujul bʌ i Ts'ijbujel Dios, mu' bʌ i cʌntesañet cha'añ ma' ñop Cristo Jesús cha'añ ma' coltʌntel.

¹⁶ Ch'oyol ti Dios pejtelel i Ts'ijbujel añ i c'ʌjñibal ti cʌntesa cha'añ lac tic'ol, yic'ot cha'añ lac toj-esʌntel, cha'añ mi lac mel chuqui toj,

¹⁷ cha'añ chajpʌbil i wiñic Dios ti pejtelel chuqui wen, cha'añ uts'at mi' mel i ye'tel ti pejtelel.