2 Timoteo 2 - Jiñi Tsiji' bʌ Wen T'añ cha'añ Estudio

Juntiquil wen bʌ soldado i cha'añ Jesucristo

¹ Jiñi cha'añ, calobil, la' chʌn p'ʌt-aquet ti' yutslel i pusic'al Cristo Jesús.

² Jiñi t'añ tsa' bʌ la' wu'bi ti' tojlel ca'bʌlob, aq'ueñob ti' wenta xuc'ul bʌ wiñicob mu' bʌ caj i cʌntesañob yaño' bʌ.

³ Ñusan wocol che' bajche' xuc'ul bʌ soldado i cha'añ Jesucristo.

⁴ Jiñi soldado woli bʌ ti guerra, ma'añic mi' mel i ye'tel ti' yotot come yom i tijicñesan jiñi tsa' bʌ i yotsa ti soldado.

⁵ Che' ja'el jiñi x'alas ma'añic mi' yʌq'uentel corona mi ma'añic tsi' cha'le alas ti toj.

⁶ Jiñi xpac' wersa mi' ñaxan cha'len e'tel ti lum cha'añ mi' ch'ʌmben i wut.

⁷ Ña'tan ti a pusic'al chuqui woli c su'b, lac Yum mi caj i yʌq'ueñet a ch'ʌmben isujm ti pejtelel.

⁸ Ña'tan Jesucristo loq'uem bʌ ti' p'olbal David, tsa' ch'ojyi loq'uel ba'añ chʌmeño' bʌ che' bajche' mic su'b ti jiñi wen t'añ,

⁹ woliyon ti wocol, cʌchʌlon che' bajche' xjontolil, pero mach cʌchʌlic i t'añ Dios.

¹⁰ Jiñi cha'añ woli c lʌt' pejtelel jiñi wocol, come c'ux mi cu'bin jiñi yajcʌbilo' bʌ, cha'añ com mi' tajob i coltʌntel ti Cristo Jesús yic'ot i ñuclel mach bʌ añic mi' jilel.

¹¹ Xuc'ulʌch ili t'añ: Mi tsa' chʌmiyonla yic'ot Cristo Jesús, cuxul mi caj la cajñel yic'ot.

¹² Mi woli lac lʌt' wocol, mux caj lac tem cha'len yumʌl la quic'ot. Mi tsa' la cʌlʌ mach laj cʌñʌyic, ma'añic mi caj i cʌñonla ja'el.

¹³ Mi mach xuc'uloñicla, Cristo xuc'ul mi yajñel, come mach yujilic lot.

Jiñi uts'at bʌ x'e'tel

¹⁴ C'ajtesʌbeñob ili t'añ. Xic'beñob ti' wut lac Yum cha'añ ma'añic mi' cʌlʌx pejcañob i bʌ ti to'ol t'añ jach mach bʌ añic i c'ʌjñibal. Che' jiñi mi' sojquelob jiñi mu' bʌ i yu'biñob.

¹⁵ Cha'len wersa cha'añ ma' pʌs a bʌ ti uts'at ti' wut Dios che' bajche' x'e'tel mach bʌ añic chuqui mi' quisñin, mu' bʌ i c'ʌn ti uts'at jiñi isujm bʌ t'añ.

¹⁶ Mach ma' majlel ba' ma' wu'bin lolom jach bʌ i t'añ pañimil, come mi' yutsi p'ojlesan i jontolil wiñicob.

¹⁷ Come mi' p'ojlel majlel jiñi t'añ che' bajche' leco bʌ tsoy. Che'ʌch yilal i cʌntesa jiñi Himeneo yic'ot Fileto,

¹⁸ come tsi' tʌts'ʌyob i bʌ ti jiñi isujm bʌ t'añ, woli' socbeñob i pusic'al xñopt'añob, come mi' lon alob tsa'ix ñumi i yorajlel mi caj lac tejchel ch'ojyel, mi' yʌlob ma'añix lac pijtaya.

¹⁹ Pero tsʌts wa'chocobilonla ti Dios. Tsi' yʌq'ueyonla lac sellojlel ba' ts'ijbubil: “Lac Yum mi' cʌn i cha'año' bʌ”. Jiñi cha'añ la' i cʌy i jontolil jujuntiquil mu' bʌ i pejcʌben i c'aba' Cristo.

²⁰ Ti mal colem otot añ plato tac melbil bʌ ti oro yic'ot ti sʌsʌc taq'uiñ yic'ot añ ja'el melbil tac bʌ ti te' yic'ot ti lum; ti' chajp ti' chajp añ i c'ʌjñibal. Lamital añ jach i yorajlel mi' c'ʌjñel, yam bʌ mi' c'ʌjñel ti jujump'ejl q'uiñ.

²¹ Mi añ majqui mi' cʌy chuqui tac mach weñic, mi' sʌc-esan i bʌ. Che' jiñi añ i c'uxbintel, ch'ujul, ca'bʌl i c'ʌjñibal ti lac Yum. Chajpʌbil i pusic'al cha'añ mi' mel pejtelel chuqui wen.

²² Mach ma' jac'ben i colosojlel a pusic'al che' bajche' yam bʌ ch'itoñ wiñicob; tsajcan chuqui toj, yic'ot c'uxbiya, yic'ot i ñʌch'tʌlel a pusic'al. Chʌn ñopo Dios yic'ot pejtelel mu' bʌ i pejcañob lac Yum ti' sʌclelob i pusic'al.

²³ Mach ma' ñʌch'tʌbeñob i t'añ jiñi sajtemo' bʌ mu' bʌ i cʌlʌx pejcañob i bʌ ti lolom t'añ mach bʌ añic isujmlel. Sojquem jax i t'añ, awujil mi' tech leto.

²⁴ Mach yomic mi' bʌc' letsan i t'añ ti leto jiñi x'e'tel i cha'añ lac Yum, yom uts mi' pejcan pejtelel i pi'ʌlob, yom ch'ejl i pusic'al ti cʌntesa, yom mi' ñusʌbeñob i sajtemal yaño' bʌ.

²⁵ Yom mi' toj-esan i contrajob yic'ot uts bʌ t'añ. Tic'ʌl mi Dios mi caj i yʌq'ueñob i cʌy i mul cha'añ mi' ñopob chuqui isujmlel,

²⁶ cha'añ mi' puts'elob ti' yac xi'ba, tsa' bʌ i chucuyob cha'añ mi' wersa jac'beñob i mandar.