2 Tesalonicenses 2 - Jiñi Tsiji' bʌ Wen T'añ cha'añ Estudio

I SU'BENTELOB ( 2.1—3.15 ) Mi caj i tsictiyel jiñi wiñic but'ul bʌ ti' jontolil

¹ Jiñi cha'añ quermañujob che' bʌ mi' caj i tilel lac Yum Jesucristo, mi caj lac tempʌyel majlel ya' ba'añ, jiñi cha'añ la' wocolic, hermañujob,

² mach yomic mi' bʌc' tejchel tilebixel bʌ la' pusic'al, mach la' cha'len bʌq'uen, mach la' jac'ben espíritu, mi t'añ, mi juñ mu' bʌ i yʌl tsa'ix tili i q'uiñilel lac Yum, mi' lon alob che'ʌch tsa' c ts'ijba lojon.

³ Mach la' wʌc' la' bʌ ti lotintel mi ts'ita'ic, come maxto talic i q'uiñilel, jinto mi' cha' cʌyob jiñi wen t'añ, jinto mi' tsictiyel jiñi wiñic but'ul bʌ ti jontolil, jiñi wiñic mu' bʌ i majlel ti toj mulil,

⁴ iliyi jiñʌch xcontra, mu' bʌ i contrajin pejtelel i c'aba' Dios yic'ot pejtelel chuqui tac mi' ch'ujutesʌntel; mi caj i buchtʌl ti' Templo Dios, mi' caj i cuy i bʌ ti Dios.

⁵ ¿Mach ba c'ajalic la' cha'añ tsa' c su'beyetla ili t'añ che' ya' to añon la' wic'ot?

⁶ Wʌle la' wujil chuqui woli' i mʌctañ jiñi wiñic cha'añ ma'añic mi' tsictiyel jinto che' i yorajlelix.

⁷ Wʌle wolix i mel i ye'tel jiñi xjontolil mach bʌ tsictiyemic ti yam bʌ ora; pero wʌle añ woli bʌ i mʌctañ, mu' to caj i chʌn mʌctañ jinto che' mi' tʌts' i bʌ ti' tojlel.

⁸ Che' jiñi mi' caj ti tsictiyel jiñi xjontolil. Lac Yum Jesús mi caj i tsʌnsan ti' yiq'uilel jach i yej, mi caj i jisan ti' sʌclel che' mi' tilel;

⁹ mi' caj i tilel jiñi xjontolil yic'ot i p'ʌtʌlel Satanás; mi' caj ti lot yic'ot i yejtal tac i p'ʌtʌlel yic'ot bʌbʌq'uen tac bʌ i melbal,

¹⁰ yic'ot pejtelel jontol bʌ i lotiya ti' tojlel jiñi woli bʌ i sajtelob, come ma'añic tsi' ch'ʌmʌyob ti' wenta i c'uxbintel isujmlel cha'añ i coltʌntel.

¹¹ Jiñi cha'añ Dios mi' yʌc'ob ba' mi' wen tajob i lotintel, cha'añ mi' jac'ob i lotintel,

¹² cha'añ mi' yochelob ti tojmulil pejtelel mach bʌ añic tsi' ñopbeyob isujmlel, come tsi' tajayob i tijicñʌyel che' bʌ tsi' meleyob chuqui mach tojic.

Yajcʌbilob cha'añ mi' tajob i coltʌntel

¹³ Pero yom mic chʌn su'ben lojon wocolix i yʌlʌ Dios cha'añetla hermañujob, c'uxbibilet bʌ la i cha'añ lac Yum, come ti' cajibal pañimil Dios tsi' yajcayetla cha'añ mi la' coltʌntel, ti' p'ʌtʌlel jiñi Espíritu woli' yotsañetla ti ch'ujul, come woli la' ñopben isujmlel Dios.

¹⁴ Jiñi cha'añ tsi' pʌyʌyetla yic'ot jiñi wen t'añ mu' bʌ c su'b lojon, cha'añ mi la' taj i ñuclel lac Yum Jesucristo.

¹⁵ Jiñi cha'añ hermañujob, yom chʌn xuc'uletla, wen ac'ʌla ti la' pusic'al jiñi cʌntesa tsa' bʌ la' wu'bi mi tic t'añ lojon, o mi tic juñ lojon.

¹⁶ Jiñi lac Yum Jesucristo, yic'ot Dios lac Tat tsa' bʌ i c'uxbiyonla, jiñi tsa' bʌ i yʌq'ueyonla i ñuclel lac pusic'al mach bʌ añic mi' jilel yic'ot wen bʌ lac pijtaya ti' yutslel i pusic'al,

¹⁷ la' i ñuq'uesʌbeñetla la' pusic'al, la' i xuc'chocoñetla ti pejtelel wen bʌ t'añ yic'ot ti pejtelel wen bʌ e'tel.