2 Tesalonicenses 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-12 ) I yutslel i t'añ

¹ Joñon Pablo quic'ot Silvano yic'ot Timoteo, woli c ts'ijbubeñet lojon ili juñ xñopt'añet bʌ la ya' ti Tesalónica, ochemet bʌ la ti Dios lac Tat yic'ot ti lac Yum Jesucristo:

² La' aq'uentiquetla i yutslel yic'ot i ñʌch'tʌlel la' pusic'al ch'oyol bʌ ti Dios lac Tat yic'ot ti lac Yum Jesucristo.

Dios mi' cha'len meloñel ti' tojlel xmulilob che' ba' ora mi' tilel Cristo

³ Yom mic chʌn su'ben lojon Dios wocolix i yʌlʌ cha'añetla, hermañujob, che' bajche' yom, come woli la' colel ti ñopol lac Yum yic'ot woli ti p'ojlel la' c'uxbiya yic'ot yaño' bʌ lac pi'ʌlob.

⁴ Jiñi cha'añ mi cu'bin lojon c tijicñʌyel che' mic tajet lojon ti t'añ ti' tojlel xñopt'añob, come chʌn xuc'ul woli la' ñop; ti' p'ʌtʌlel la' pusic'al woli la' cuch la' tic'lʌntel yic'ot la' wocol.

⁵ Iliyi jiñʌch i tsictesʌntel toj bʌ i meloñel Dios, cha'añ uts'at mi caj la' q'uejlel ti' yumʌntel Dios, jiñi cha'añ woli la' cuch ca'bʌl wocol.

⁶ Dios mi caj i cha'len meloñel ti toj, mi' caj i yʌq'ueñob wocol jiñi woli bʌ i tic'lañetla,

⁷ Dios mi caj i yʌq'ueñetla la' c'aj la' woj jatetla woli bʌ la' wu'bin wocol temel quic'ot lojon che' ba' ora mi' tsictiyel lac Yum Jesús ti panchan yic'ot jiñi ángelobti' p'ʌtʌlel,

⁸ Mi caj i tilel yic'ot c'ajc cha'añ mi' q'uextʌbeñob i jontolil jiñi mach bʌ añic mi' cʌñob Dios yic'ot jiñi mach bʌ añic mi' jac'beñob i wen t'añ lac Yum Jesucristo.

⁹ Mi caj i tojob i mul ti c'ajc ti pejtelel ora, mi caj i chojquelob loq'uel ti' tojlel lac Yum yic'ot ti' p'ʌtʌlel i ñuclel.

¹⁰ Che' ba' ora mi caj i tilel lac Yum cha'añ mi' sujbel i ñuclel ti' tojlel i cha'año' bʌ, mi caj i q'uejlel ti ñuc lac Yum ti' tojlel pejtelel tsa' bʌ i ñopoyob; come jatetla tsa'ix la' ñopo c t'añ lojon che' bʌ tsa' c su'beyetla.

¹¹ Jiñi cha'añ woli c chʌn ña'tañet lojon ti oración, cha'añ uts'at mi la' q'uejlel ti Dios tsa' bʌ i pʌyʌyetla, cha'añ mi' ts'ʌctesan pejtelel wen tac bʌ ti la' tojlel yic'ot jiñi wen bʌ e'tel che' bajche' woli la' ñop Dios ti' p'ʌtʌlel.

¹² Cha'añ che' jiñi mi caj i ñuq'uesʌntel i c'aba' lac Yum Jesucristo ti la' tojlel, jatetla ja'el mi caj la' ñuq'uesʌntel ti' tojlel lac Yum, cha'añ ti' yutslel i pusic'al Dios yic'ot lac Yum Jesucristo.