2 Pedro 2 - Jiñi Tsiji' bʌ Wen T'añ cha'añ Estudio

Lot bʌ x'alt'añob yic'ot lot bʌ xcʌntesajob

¹ Añ ja'el lot bʌ x'alt'añob ti' tojlel israelob; che' ja'el mi caj i tejchel lot bʌ xcʌntesajob mu' bʌ caj i mucul otsañob jiñi sojquem bʌ i cʌntesa mu' bʌ i yʌq'uetla ti sajtel, woli' ñusañob lac Yum tsa' bʌ i mʌñʌyob; woli' bʌc' pʌyob tilel i wocol mu' bʌ caj i jisañob.

² Ca'bʌlob mu' bʌ caj i jac'ob ti' colosojlel i pusic'al, jiñi cha'añ ti' cajob i melbal, mi' yʌc'ob ti p'ajtʌl jiñi isujm bʌ bij.

³ Wo'ob jax ti taq'uiñ jiñi xcʌntesajob, mi caj i lotiñetla cha'añ mi' chilbeñetla la' chu'bʌañ. Wajalix yic'ot c'ʌlʌl wʌle ña'tʌbil i cha'añ Dios cha'añ mi caj i yʌq'ueñob i toj i mul. Chajpʌbilix ya' ba' mi caj i jilelob.

⁴ Dios ma'añic tsi' ñusʌbeyob i mul ángelob tsa' bʌ i cha'leyob mulil, pero tsi' chocoyob ochel ti c'ajc ba' tsi' yʌc'ʌ ti cʌjchel ti ic'ch'ipan bʌ pañimil c'ʌlʌl jinto ti' yorajlel meloñel;

⁵ Dios ma'añic tsi' p'unta jiñi oñiyi bʌ pañimil, pero cojach tsi' colta Noé tsa' bʌ i su'bu isujmlel ili t'añ ti toj, yic'ot wuctiquil yaño' bʌ, che' bʌ tsi' choco tilel but'ja' cha'añ mi' jisan xñusa Diosob ti pañimil,

⁶ tsi' junyajlel pulu Sodoma yic'ot Gomorra, tsi' yʌc'ʌ ti jisʌntel cha'añ mi lac ña'tan ti pejtelelonla cha'añ che'ʌch mi caj i yujtelob jiñi mach bʌ añic mi' bʌc'ñañob Dios,

⁷ pero tsi' colta loq'uel Lot jiñi toj bʌ wiñic tsa' bʌ i wen mele i pusic'al cha'añ i bi'bi'lel yic'ot i jontolil jiñi xñusa mandarob,

⁸ (ili toj bʌ wiñic añ chuqui tsi' q'uele yic'ot chuqui tsi' yu'bi ya' ba' tem chumulob yic'ot, jiñi cha'añ tsi' wen mele i pusic'al ti jujump'ejl q'uiñ cha'añ i melbal jiñi mach bʌ tojobic).

⁹ Lac Yum mi' coltañ jiñi xuc'ulo' bʌ che' woli' yilʌbentelob i pusic'al, che' ja'el mi yʌc'ob ti tojmulil jiñi mach bʌ tojobic che' ti yorajlel meloñel;

¹⁰ cojco jiñi mu' bʌ i jac'beñob i colosojlel i pusic'al yic'ot i bi'bi'lel, mi' ts'a'leñob jiñi año' bʌ i ye'tel, ch'ejl mi' melob i bʌ, mi' melob bajche' jach yomob ti' bajñel pusic'al, ma'añic mi' bʌc'ñañob i cha'len t'añ ti' contra jiñi año' bʌ ñuc bʌ i ye'tel ti panchan,

¹¹ jiñi ángelob año' bʌ ñuc bʌ i p'ʌtʌlel yic'ot i ye'tel, ma'añic mi' cha'leñob t'añ ti' contra jiñi jontolo' bʌ ti' tojlel lac Yum.

¹² Pero ili wiñicob mi' cha'leñob t'añ ti' contra jiñi mach bʌ añic mi' ch'ʌmbeñob isujm, tontojob che' bajche' bʌte'el mu' bʌ i yilan pañimil mi' yʌc' i bʌ ti chujquel cha'añ mi' tsʌnsʌntel, mi caj i jilelob ti' bi'bi'lel,

¹³ mi caj i tajob i chobejtʌbal cha'añ i jontolil, tijicñajax mi' yu'biñob che' woliyob ti leco bʌ q'uiñijel ti jujump'ejl q'uiñ. Bi'bi'ob jax, añob i yoc'beñal, wen tijicñajax mi' yu'biñob cha'añ i sajtemal che' mi' c'uxob waj la' wic'ot.

¹⁴ But'ulob i pusic'al ti' ts'i'lel, mach mejlic i cʌyob i mul, mi' pʌyob ti mulil jiñi mach bʌ xuc'ulobic i pusic'al, ñʌmʌlobix ti' ts'i'lel i wut; chocbilobix ti Dios.

¹⁵ Tsa'ix i cʌyʌyob jiñi toj bʌ bij, sajtemob, tsi' tsajcʌbeyob i bijlel Balaam, i yalobil Beor tsa' bʌ i mulʌbe i chobejtʌbal jontolil,

¹⁶ jiñi burro mach bʌ yujilic t'añ tsa' caji ti t'añ che' bajche' wiñic, tsi' tic'be i tontojlel jiñi x'alt'añ.

¹⁷ Lajal ili wiñicob bajche' tiquiñix bʌ i jol ja', lajalob bajche' tocal ñijcʌbil bʌ ti colem sutujt ic'; cʌybilobix ti c'ax i'ic' bʌ ac'ʌlel ti pejtelel ora.

¹⁸ Mi' to'ol chañ-esañob i bʌ ti lolom jach bʌ t'añ, ti bi'bi' bʌ i colosojlel i pusic'al mi' pʌyob ti mulil jiñi woli bʌ i ñopob Cristo, maxto bʌ jali tsi' cʌyʌ i tsajcʌbeñob i sajtemal i pi'ʌlob.

¹⁹ Mi' su'beñob i mul mu' bʌ caj i jisañob, pero ñumen chucbilob ti majtañ e'tel cha'añ tsucul bʌ i melbal. Come majqui jach mi' cha'len mulil chucbilʌch ti' p'ʌtʌlel mulil ti' wenta xi'ba.

²⁰ Che' mi' puts'elob loq'uel wiñicob ti' bi'bi'lel jiñi pañimil, che' mi' cʌñob lac Yum Jesucristo jiñi la caj Coltaya, mi tsa' cha' chujquiyob ti' bi'bi'lel, mi tsa' cha' yajliyob ti mulil, ñumen leco mi' yajñelob ti wi'il che' bajche' ti ñaxan.

²¹ Uts'at machic tsi' cʌñʌyob jiñi toj bʌ bij, come che' bʌ tsa'ix i cʌñʌyob, tsi' cha' cʌyʌyob jiñi ch'ujul bʌ t'añ tsa' bʌ aq'uentiyob.

²² Tsi' meleyob che' bajche' mi' yʌl jiñi proverbio: “Jiñi ts'i' mi' cha' sujtel i mʌc' i xej, jiñi chitam pocbilix bʌ mi' cha' jujc'un i bʌ ti oc'ol”, che'en.