2 Pedro 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Simón Pedrojon, i wiñicon Jesucristo, apóstolon i cha'añ. Mic ts'ijbubeñetla ili juñ come junlajal tsa' aq'uentiyetla la' ñop Cristo quic'ot lojon. Come toj la caj Coltaya Dios, i c'aba' Jesucristo. Yom mi lac wen c'uxbin jiñi wen t'añ woli bʌ lac ñop.

² La' p'ojlic i yutslel yic'ot i ñʌch'tʌlel la' pusic'al come la' cʌñʌyʌch Dios yic'ot lac Yum Jesús.

Tsi' yʌq'ueyonla laj cʌn lac Yum

³ Ti ñuc bʌ i p'ʌtʌlel Dios tsi' yʌq'ueyonla pejtelel chuqui añ to yom lac cha'añ che' bʌ tsi' yʌq'ueyonla laj cʌn lac Yum Jesús cha'añ mi la cajñel ti ch'ujul. Tsi' pʌyʌyonla cha'añ mi laj cʌmben i ñuclel yic'ot i yutslel.

⁴ Jiñi cha'añ tsi' yʌq'ueyonla jiñi albil bʌ t'añ, wen ñuc bʌ, c'ax uts'at bʌ. Che' mi la' ñopben i t'añ mi' yʌq'uetla ti colel ba' chuculetla ti' colosojlel la' pusic'al ti' wenta pañimil cha'añ mi la' taj la' cuxtʌlel ch'oyol bʌ ti Dios.

⁵ Jiñi cha'añ yom mi la' cha'len wersa cha'añ mi la' pʌs la' bʌ ti uts, come tsa'ix la' ñopo Dios. Che' utsetla yom wen bʌ la' ña'tʌbal;

⁶ che' añ la' ña'tʌbal yom mi la' tic' la' pusic'al, che' mi la' tic' la' pusic'al yom mi la' cuch wocol ti xuc'ul; che' mi la' cuch wocol ti xuc'ul mi la' wʌc' ti cʌjñel Dios;

⁷ che' mi la' wʌc' ti cʌjñel Dios yom mi la' p'untan la' pi'ʌlob; che' mi la' p'untañob yom mi la' c'uxbiñob ja'el.

⁸ Mi che'ʌch mi la' mel mi caj la' p'ʌt-an majlel, mi caj i yutsi p'ojlel la' c'ʌjñibal. Che' jiñi mach lolomic jach tsa' la' cʌñʌ lac Yum Jesucristo.

⁹ Jiñi mach bʌ añic mi' mel che' bajche' jiñi, xpots' yilal. Ma'añic mi' c'otel i wut. Mach c'ajalix i cha'añ mi tsa'ix pocbenti i mul tsa' bʌ i mele ti yam bʌ ora.

¹⁰ Jiñi cha'añ hermañujob, cha'lenla wersa cha'añ mi' tsictiyel pʌybiletla, yajcʌbiletla. Mi che'ʌch mi la' mel, ma'añic ba' ora mi caj la' yajlel.

¹¹ Che' jiñi mi caj la' pʌjyel ochel ti' yumʌntel Dios mach bʌ añic mi' jilel, yic'ot lac Yum Jesucristo, xColtaya lac cha'añ.

¹² Jiñi cha'añ mi caj c chʌn c'ajtesʌbeñetla pejtelel jiñi t'añ, anquese la' wujilix, anquese xuc'chocobiletla ti isujmlel woli bʌ la' ñop.

¹³ Che' cuxulonto tic bʌc'tal mi cʌl uts'at mic chʌn xic'beñetla, yom mic chʌn c'ajtesʌbeñetla bajche' yom mi la' mel.

¹⁴ Come cujil mach jalix mi caj j cʌy c bʌc'tal che' mic chʌmel, che' bajche' tsi' su'beyon lac Yum Jesucristo.

¹⁵ Jiñi cha'añ mic cha'len wersa ti la' tojlel cha'añ mi la' chʌn ña'tan jiñi t'añ ti pejtelel ora che' chʌmeñoñix.

Tsa' laj q'uelbe i ñuclel Cristo

¹⁶ Ma'añic tsa' c jop'o lojon mayajax bʌ t'añ che' bʌ tsa' c su'beyet lojon i p'ʌtʌlel lac Yum Jesucristo mu' bʌ caj i cha' tilel ti' ñuclel i yumʌntel, pero tsa' c su'beyetla jiñi tsa' bʌ j q'uele lojon tic wut.

¹⁷ Ya' añon lojon ba' ora Dios tsi' yʌq'ue i ñuclel i Yalobil. Tsa' yʌjñi i wut ti' ñuclel Dios i Tat. Tsa' cu'bibe i t'añ Dios loq'uem bʌ ti' yumʌntel ti panchan che' bʌ tsi' yʌlʌ: “Jiñʌch c'uxbibil bʌ Calobil, tijicña mij q'uel”, che'en.

¹⁸ Tsa' cu'bi lojon jiñi t'añ ch'oyol bʌ ti panchan che' ya'añon lojon yic'ot Jesús ya' ti ch'ujul bʌ wits.

¹⁹ Jiñi cha'añ ñumen xuc'ulonla cha'añ ti' t'añ x'alt'añob, come woli ti ts'ʌctiyel ti' tojel lac wut, yom mi la' wen p'is ti' wenta i t'añ, come lajalʌch i c'ʌjñibal bajche' lámpara mu' bʌ i pʌsbeñonla i sʌclel ti ac'ʌlel jinto mi' sʌc'an pañimil, jinto mi' tsictiyel Cristo che' bajche' Ñoj Ec' ti la' pusic'al.

²⁰ Ñaxan yom mi la' ch'ʌmben isujm, ma'añic t'añ ti' Ts'ijbujel Dios tsa' bʌ i bajñel ña'tayob jiñi x'alt'añob,

²¹ come c'ʌlʌl ti' cajibal ma'añic tsi' bajñel cha'leyob t'añ wiñicob ti' bajñel pusic'al, pero jiñi [ch'ujul bʌ] wiñicob ñijcʌbilo' bʌ i cha'añ Ch'ujul bʌ Espíritu tsi' cha' su'buyob chuqui tsi' yu'biyob ti Dios.