2 Juan 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Ancianojon, mic ts'ijbubeñet ili juñ, yajcʌbilet bʌ x'ixic yic'ot a walobilob, mij c'uxbiñetla ti isujm; mach joñoñic jach, pero che' ja'el pejtelel jiñi tsa' bʌ i cʌñʌyob isujmlel,

² cha'añ ti' caj isujmlel mu' bʌ i yajñel ti joñonla, mi' caj i yajñel la quic'ot ti pejtelel ora.

³ La' i yʌq'ueñonla i yutslel i pusic'al, yic'ot lac p'untʌntel, yic'ot i ñʌch'tʌlel lac pusic'al, ch'oyol bʌ ti Dios lac Tat, yic'ot ti lac Yum Jesucristo i Yalobil lac Tat cha'añ mi la cajñel ti isujmlel yic'ot c'uxbiya.

Ajñenla ti' cʌntesa Cristo

⁴ Wen tijicñayon cha'añ tsa' c taja cha'tiquil uxtiquil a walobilob woliyo' bʌ ti xʌmbal ti isujmlel Dios, che' bajche' tsi' yʌq'ueyonla mandar lac Tat.

⁵ Wʌle, x'ixic, mic su'beñet ti wocol t'añ, ma'añic woli c ts'ijbubeñet tsiji' bʌ mandar, pero jiñʌch mandar tsa' bʌ aq'uentiyonla c'ʌlʌl ti' cajibal, cha'añ yom mi laj c'uxbin lac bʌ ti lac pejtelel.

⁶ Jiñʌch laj c'uxbiya che' mi lac cha'len xʌmbal che' bajche' mi' yʌl i mandar. Tsa' la' wu'bi jiñi mandar c'ʌlʌl ti' cajibal: Yom mi laj c'uxbin lac bʌ.

⁷ Come añ ca'bʌl xlotiya ti pañimil mu' bʌ i yʌlob ma'añic tsi' ch'ʌmʌ i bʌc'tal Jesucristo. Majqui mi' su'b bajche' jiñi, xlotiyajʌch, xcontra Cristojʌch.

⁸ Chʌcʌ q'uele la' bʌ cha'añ ma'añic mi la' wʌc' ti sajtel jiñi wen t'añ che' bajche' tsa' cʌntesayet lojon cha'añ ts'ʌcʌl mi la' taj la' chobejtʌbal.

⁹ Majqui jach mi tʌts' i bʌ yic'ot jiñi mach bʌ añic mi' yajñel ti' cʌntesa Cristo, mach i cha'añic Dios. Jiñi mu' bʌ i yajñel ti' cʌntesa Cristo, i cha'añʌch lac Tat yic'ot i Yalobil.

¹⁰ Mi añ majqui mi' c'otel i su'beñetla yam bʌ cʌntesa, mach mi la' wotsan ti la' wotot, yic'ot mach mi la' wʌq'uen cortesía,

¹¹ come jiñi mu' bʌ i yʌq'ueñ cortesía, i pi'ʌlʌch ti jontol bʌ i melbal.

Woli c ña'tan cula'tañetla

¹² Añ to ca'bʌl chuqui com c ts'ijbubeñetla, mach comic c pejcañetla ti juñ, woli c ña'tan c jula'tañetla cha'añ mi lac pejcan lac bʌ che' temel añonla cha'añ mi la cu'bin i tijicñʌyel lac pusic'al.

¹³ I yalobilob a chich, jiñi yajcʌbil bʌ ti Dios, mi' yʌq'ueñetla cortesía. [Amén.]