2 Corintios 9 - Jiñi Tsiji' bʌ Wen T'añ cha'añ Estudio

¹ Mach wersajic mic ts'ijbubeñetla bajche' yom mi la' wʌq'uen ofrenda jiñi i cha'año' bʌ Dios.

² Come cujil la' wom la' coltañob ti jump'ejl la' pusic'al che' bajche' tsa' c su'beyob jiñi año' bʌ ti Macedonia, come tsa' c su'beyob añix jump'ejl ja'b tsa' caji la' chajpan la' pusic'al añet bʌ la ti Acaya, ca'bʌl ti Macedonia tsa' ñijcʌntiyob i pusic'al che' bʌ tsi' yu'biyob chuqui tsa' la' ña'ta.

³ woli c choc majlel ili la quermañujob ame to'o lolomic jach c t'añ tsa' bʌ c su'beyob jiñi año' bʌ ti Macedonia, jiñi cha'añ che' bajche' tsa' c su'beyetla, yom chajpʌbiletla che' bajche' tsa' c su'beyob,

⁴ mi tsa' c'otiyon lojon yic'ot jiñi ch'oyolo' bʌ ti Macedonia che' mach chajpʌbileticla, quisintic jax mi caj cu'bin lojon, quisintic jax mi caj la' wu'bin ja'el, come tsa' c su'beyob uts'at woli la' mel.

⁵ Jiñi cha'añ tsa' c ña'ta wersa yom mic xic'ben la quermañujob cha'añ mi' ñaxan majlelob ba'añetla, mi caj i q'uelob bajche' woli la' tempan jiñi ofrenda ña'tʌbil bʌ la' cha'añ. Yom chajpʌbil jiñi ofrenda che' mi' c'otelob. Ac'ʌla ti' yutslel la' pusic'al, mach cha'añic xic'biletla.

Xic'bentel cha'añ p'ejwlel

⁶ Pero mic su'beñetla ili t'añ: Jiñi ts'ita' jach bʌ mi' pʌc', ts'ita' jach mi' c'aj ja'el, jiñi oñ bʌ mi' pʌc', oñ mi' caj i c'aj ja'el.

⁷ Ti jujuntiquil la' i yʌc' che' bajche' tsi' ña'ta ti' pusic'al, mach ti' ch'ijiyemlelic yic'ot mach cha'añic xic'bebil jach, pero Dios mi' c'uxbin jiñi mu' bʌ i yʌc' ti' tijicñʌyel i pusic'al.

⁸ Yic'ot p'ʌtʌlʌch Dios cha'añ mi' yʌq'ueñetla pejtelel chuqui tac yom cha'añ jasʌl la' cha'añ ti pejtelel ora yic'ot cha'añ mi la' coltañ la' bʌ ti pejtelel chuqui wen;

⁹ che' bajche' ts'ijbubil: “Dios mi' puc majtañʌl, mi' yʌq'ueñob jiñi mach bʌ añobic i chu'bʌañ. Toj i pusic'al ti pejtelel ora”, che'en.

¹⁰ Dios mi' yʌq'ueñ pac' jiñi xpʌc'oñel, mi' yʌq'ueñetla la' waj cha'añ mi la' c'ux, mi caj i yutsi aq'ueñetla pac' yic'ot waj cha'añ mi la' wʌq'ueñob yaño' bʌ ti' yutslel la' pusic'al, mi caj i p'ojlesʌbeñetla la' chobejtʌbal,

¹¹ che' jiñi Dios mi caj i yʌq'ueñetla pejtelel chuqui tac yom cha'añ mi la' p'ewbeñob la' chu'bʌañ jiñi mach bʌ añobic i cha'añ, cha'añ mi' su'beñob wocolix i yʌlʌ Dios che' mic pucbeñob i majtañ.

¹² Come che' mi la' coltañ i cha'año' bʌ Dios, mi' tajob chuqui añ to yom i cha'añob, che' jiñi ca'bʌl mi caj i su'beñob wocolix i yʌlʌ Dios.

¹³ Che' bʌ tsa' la' colta i cha'año' bʌ Dios yic'ot yaño' bʌ, ca'bʌlob mi caj i su'bob i ñuclel Dios cha'añ tsa' la' jac'be i t'añ Cristo woli bʌ la' ñop, tsa' la' p'ejwbeyob la' chu'bʌañ.

¹⁴ Mi caj i tajetla ti oración ja'el, come c'ux mi' yu'biñetla cha'añ ñuc bʌ i yutslel i pusic'al Dios woli bʌ la' tsictesan.

¹⁵ ¡Wocolix i yʌlʌ Dios cha'añ tsi' yʌq'ueyonla lac majtañ c'ax letsem bʌ i tojol!