2 Corintios 8 - Jiñi Tsiji' bʌ Wen T'añ cha'añ Estudio

2. OFRENDA CHA'AÑ I COLTɅNTEL HERMAÑUJOB TI JERUSALÉN ( 8.1—9.15 ) Isujmlel chucoch tsi' yʌc'ʌyob ofrenda

¹ Che' ja'el quermañujob, com mi la' ña'tan Dios tsi' yʌq'ueyob i yutslel i pusic'al jiñi xñopt'añob ya' ti Macedonia,

² come che' bʌ tsa' ilʌbentiyob i pusic'al ti ca'bʌl wocol, tsa' wen p'ojliyob i p'ejwlel yic'ot i tijicñʌyelob i pusic'al anquese c'ax pobrejob.

³ Testigojon cha'añ ti' bajñel pusic'al tsi' ña'tayob i yʌc'ob ofrenda che' bajche' tsa' mejliyob, ñumen oñ tsi' yʌc'ʌyob che' bajche' tsa' mejliyob,

⁴ ca'bʌl tsi' c'ajtibeyon lojon ti wocol t'añ cha'añ mic ch'ʌm majlel jiñi ofrenda ti Jerusalén cha'añ mi' coltʌntelob i cha'año' bʌ Dios ya'i.

⁵ Mach che'ic jach tsi' cha'leyob, pero ñaxan tsi' yʌc'ʌyob i bʌ ti' wenta lac Yum, wi'il tic tojlel lojon, cha'añ mi' melob chuqui yom Dios,

⁶ jiñi cha'añ tsa' c xic'be lojon Tito cha'añ mi' majlel i tempan jiñi ofrenda tsa' bʌ i teche ti yam bʌ ora, cha'añ mi' yujtel jiñi wen bʌ e'tel ti' yutslel la' pusic'al.

⁷ Come che'ʌch woli la' wen pʌs la' bʌ ti uts'at ti' xuc'tʌlel la' pusic'al, yic'ot ti la' t'añ, yic'ot ti la' ña'tʌbal, wen bʌxetla, c'ux mi la' wu'biñon lojon. Che'ʌch yom mi la' wen pʌs i yutslel la' pusic'al yic'ot la' wofrenda ja'el.

⁸ Ma'añic mi cʌq'ueñetla mandar, pero mic su'beñetla bajche' mi' melob yaño' bʌ, cha'añ mi la' pʌs la' c'uxbiya ti isujm.

⁹ Come cʌñʌlix la' cha'añ i yutslel i pusic'al lac Yum Jesucristo, jiñi wen chumul bʌ tsa' ochi ti p'ump'un come c'ux tsi' yu'biyetla, jiñi cha'añ tsa' ochi ti p'ump'un cha'añ wen chumul mi la' wajñel.

¹⁰ Cha'añ iliyi, mi caj c su'beñetla bajche' yom mi la' mel, come che'ʌch yom cha'añetla, mach cojic jaxto tsa' caji la' ña'ta la' tempan jiñi taq'uiñ, che'ʌch tsa' la' ña'ta ja'el c'ʌlʌl ti yam bʌ ja'bil tsa'ix bʌ ñumi,

¹¹ wʌle yom mi la' wujtesan la' tempan che' bajche' tsa' la' ña'ta, che' bajche' tsa' la' ña'ta ti jump'ejl la' pusic'al, che'ʌch yom ja'el ti jump'ejl la' pusic'al mi la' wujtesan che' bajche' c'amel añ la' cha'añ,

¹² come mi añʌch i tijicñʌyel la' pusic'al cha'añ mi la' wʌc' majtañʌl loq'uem bʌ ti la' chu'bʌañ, Dios mi' ch'ʌm, che' bajche' añ la' cha'añ, come ma'añic woli c'ajtin jiñi mach bʌ añic la' cha'añ.

¹³ Ma'añic woli c su'beñetla ili t'añ, cha'añ mi la' taj wocol cha'añ i coltʌntel yaño' bʌ,

¹⁴ pero com cha'añ junlajal mi la' coltañ la' bʌ, che' añ i ñumel la' chu'bʌañ, yom mi la' wʌq'ueñob yaño' bʌ chuqui tac añ to yom i cha'añob, che'ʌch ja'el yom mi' yʌq'ueñetla i chu'bʌañ che' bʌ añ to yom la' cha'añ, cha'añ che' jiñi junlajal la' chu'bʌañ.

¹⁵ Che' bajche' ts'ijbubil: “Jiñi tsa' bʌ i tempa ca'bʌl i chu'bʌañ, ma'añic i ñumel, jiñi tsa' bʌ i tempa ts'ita', jasʌlʌch i cha'añ ja'el”.

Jiñi tsa' bʌ i chocoyob majlel Pablo

¹⁶ Wocolix i yʌlʌ Dios jiñi tsa' bʌ yʌq'ue ti' pusic'al Tito jiñi lajal bʌ c mel pusic'al lojon cha'añetla.

¹⁷ Isujm Tito tsi' wen jac'beyon c t'añ che' bʌ tsa' c su'be majlel ba'añetla, come ca'bʌl mi' ña'tañetla ja'el, jiñi cha'añ tsi' c'ʌñʌ i pusic'al ja'el cha'añ mi' majlel ya' ba'añetla.

¹⁸ Tsa' c choco lojon majlel Tito yic'ot yam bʌ la quermañu jiñi mu' bʌ i q'uejlel ti ñuc ti' tojlel xñopt'añob cha'añ jiñi wen t'añ.

¹⁹ Mach cojic jach iliyi, tsa' yajcʌnti jiñi la quermañu ti' tojlel xñopt'añob cha'añ mi' majlel quic'ot lojon ti xʌmbal cha'añ mic ch'ʌm lojon majlel jiñi taq'uiñ. Woli c tempan lojon ili taq'uiñ cha'añ mic puc lojon, cha'añ mi' wen tsictiyel i ñuclel lac Yum yic'ot cha'añ mi' tsictiyel i yutslel la' pusic'al.

²⁰ Temel mic majlel lojon cha'añ mi' wen tsictiyel uts'at bajche' mic puc lojon, ame añic majqui mi' yʌ'leñon lojon cha'añ ca'bʌl ili taq'uiñ woli bʌ la' wʌc'.

²¹ Com c mel lojon chuqui toj, mach cojic jach ti' wut lac Yum, pero ti' wut wiñicob x'ixicob ja'el.

²² Woli c choc lojon majlel ja'el yam bʌ la quermañu, come tsa'ix j q'uele lojon wen bʌx ti pejtelel i ye'tel, ca'bʌlix tsa' j q'uele lojon ti yan tac bʌ e'tel tsa' bʌ i mele wʌle ñumen bʌx come yujil cha'añ mi caj la' wʌc' jiñi ofrenda che' bajche' tsa' la' ña'ta.

²³ Tito jiñʌch c pi'ʌl ti e'tel mu' bʌ i coltañon ti la' tojlel. Jiñi la quermañujob tsa' bʌ i chocoyob majlel jiñi xñopt'añob mu' bʌ i tempañob i bʌ, mi' tsictesañob i ñuclel Cristo.

²⁴ Pʌsʌla ti' tojlel jiñi xñopt'añob che' bajche' mi la' c'uxbiñob, cha'añ che' jiñi mi' ña'tañob mach lolomic jach mi' ñuc añ c pusic'al ti la' tojlel.