2 Corintios 7 - Jiñi Tsiji' bʌ Wen T'añ cha'añ Estudio

¹ C'uxbibil bʌ quermañujob, lac cha'añʌch jiñi albil bʌ i t'añ Dios, jiñi cha'añ la' lac poc loq'uel pejtelel bi'bi' tac bʌ am bʌ ti lac bʌc'tal yic'ot ti lac pusic'al, la' lac bʌc'ñan Dios cha'añ ch'ujul mi la cajñel ti' tojlel.

I tijicñʌyel Pablo cha'añ tsi' cʌyʌyob i mul jiñi Corintiojob

² Jambeñon lojon la' pusic'al, ma'añic majqui tsa' c chilbe lojon i chu'bʌañ, mi juntiquilic, ma'añic majqui tsa' c soco lojon. Ma'añic majqui tsa' c loti lojon.

³ Ma'añic mic su'beñetla jiñi t'añ cha'añ mi cʌ'leñetla, come tsa'ix c su'beyetla añetla tic pusic'al lojon cha'añ mic tem ajñel yic'otetla yic'ot cha'añ temel mi lac chʌmel.

⁴ Cujil mi la' wajñel ti xuc'ul; añ ca'bʌl c ñuclel cha'añetla. Tsa' la' wen ñuq'uesʌbeyon c pusic'al, añ ca'bʌl i tijicñʌyel c pusic'al ti pejtelel c wocol lojon.

⁵ Che' bʌ tsa' tiliyon lojon ti Macedonia, ma'añic tsa' c wis c'aja lojon co, tsa' c taja lojon wocol yic'ot ca'bʌl leto baqui jach añon lojon. Tic pusic'al tsa' c cha'le lojon bʌq'uen.

⁶ Pero Dios mu' bʌ i ñuq'uesʌbeñob i pusic'al jiñi ch'ijiyemo' bʌ tsi' ñuq'uesʌbeyon lojon c pusic'al Tito che' bʌ tsa' tili ja'el.

⁷ Ñuc lojon c pusic'al cha'añ tsa' tili Tito yic'ot cha'añ tsa' la' ñuq'uesʌbe i pusic'al, tsi' su'beyon lojon uts'at woli la' c'uxbiñon lojon, tsa' la' cha'le uq'uel, tsa' la' wen mele la' pusic'al cha'añon, jiñi cha'añ tsa' utsi p'ojli i tijicñʌyel c pusic'al.

⁸ Ma'añix mic chʌn mel c pusic'al, anquese tsa' c mele c pusic'al cha'añ tsa' cʌq'ueyetla i ch'ijiyemlel la' pusic'al cha'añ ti jiñi juñ, come isujm tsi' yʌq'ueyetla i ch'ijiyemlel la' pusic'al pero cha'p'ejl uxp'ejl jach q'uiñ.

⁹ Wʌle tijicñayon, mach cha'añic ch'ijiyem tsa' la' wu'bi, pero cha'añ tsa' la' cʌyʌ la' mul, come Dios tsi' c'ʌñʌ i ch'ijiyemlel la' pusic'al cha'añ mi' toj-esañetla, che' jiñi ma'añic tsa' la' taja wocol cha'añon lojon.

¹⁰ Come i ch'ijiyemlel lac pusic'al ch'oyol bʌ ti Dios mi' yʌq'ueñonla laj cʌy lac mul cha'añ mi laj coltʌntel, tijicñayonla che' añ i ch'ijiyemlel lac pusic'al ch'oyol bʌ ti Dios, pero jiñi ch'ijiyemlel tilem bʌ ti pañimil mi' yʌc'onla ti chʌmel.

¹¹ La' wilan, uts'atʌch i ch'ijiyemlel la' pusic'al ch'oyol bʌ ti Dios, tsa' la' toj-esa la' bʌ ti jump'ejl la' pusic'al, tsa' caji la' ts'a'len mulil, tsa' la' cha'le bʌq'uen, ca'bʌl tsa' caji la' cha' c'uxbiñon, tsa' bʌx-ayetla, tsa' la' ju'sʌbeyob i pusic'al jiñi año' bʌ i mul. Ti pejtelel tsa' bʌ la' cha'le tsa' la' pʌsʌ la' bʌ ti toj.

¹² Jiñi cha'añ tsa' c ts'ijbubeyetla, mach i cha'añic jach jiñi am bʌ i mul yic'ot jiñi tsa' bʌ contrajinti, pero cha'añ mi la' pʌsbeñon lojon c'ux mi la' wu'biñon lojon ti lac Yum.

¹³ Jiñi cha'añ tsa' ñuc-a lojon c pusic'al, come tsa' ñuc-a la' pusic'al. Pero ñumen ca'bʌl i tijicñʌyel lojon c pusic'al cha'añ tsa' la' ñuq'uesʌbe i pusic'al Tito.

¹⁴ Come tsa' c su'be Tito bajche' mi caj la' jac' ti uts'at. Ma'añic mic cha'len quisin, come che'ʌch tsa' la' mele. Isujm pejtelel chuqui tsa' c su'beyet lojon, che' ja'el isujmʌch chuqui tsa' c su'be Tito cha'añetla.

¹⁵ Wʌle ca'bʌl woli' c'uxbiñetla Tito, come woli' chʌn ña'tan bajche' tsa' la' jac'be i t'añ ti la' pejtelel. Tsiltsilñayetla ti bʌq'uen tsa' la' pʌyʌ ochel ba'añetla.

¹⁶ Tijicñayon come cujilix uts'at woli la' wajñel.