2 Corintios 6 - Jiñi Tsiji' bʌ Wen T'añ cha'añ Estudio

¹ Joñon lojon tem x'e'telon lojon i cha'añ Dios, mic xic'beñetla ti uts'at ame lolomic jach mi la' ch'ʌmben i yutslel i pusic'al Dios,

² come Dios tsi' yʌlʌ: “Tsa'ix c ñʌch'tʌbeyetla la' t'añ che' woli ti sujbel la' coltʌntel. Tsa'ix j coltayetla ti' yorajlel coltaya”. Awilan, wʌle i yorajlelix mi la cochel, wʌle i yorajlelix mi laj coltʌntel.

³ Mic mel lojon chuqui toj ame añic majqui mi cʌc' lojon ti yajlel, ame wajlentic que'tel lojon.

⁴ Ti pejtelel que'tel lojon tsiquil x'e'telon lojon i cha'añ Dios, che' mic cha'len lojon pijt ti' xuc'tʌlel c pusic'al, che' mic ñusan lojon wocol, che' añ to chuqui yom c cha'añ lojon, che' añ lojon j c'oj-ol,

⁵ che' mi cu'bin lojon asiyal, che' añon lojon ti mʌjquibʌl, che' mij contrajintel lojon, che' mic cha'len lojon wocol e'tel, che' ma'añic mic wʌyel lojon, che' mi cu'bin lojon wi'ñal,

⁶ ti' sʌclel lojon c pusic'al yic'ot c ña'tʌbal lojon mij cuchben lojon i mul wiñicob x'ixicob yic'ot cutslel lojon, cha'añ ti jiñi Ch'ujul bʌ Espíritu, mij c'uxbin lojon wiñicob ti isujm,

⁷ yic'ot jiñi isujm bʌ t'añ, yic'ot i p'ʌtʌlel Dios, yic'ot toj bʌ c melbal lojon, i wentajʌch e'tijibʌl tac cha'añ guerra cha'añ mic mʌctañ lojon j contra yic'ot cha'añ mic puts'tesan lojon.

⁸ Mic pʌs lojon c bʌ ti uts'at che' mic ts'a'lentel lojon yic'ot che' mi cʌ'lentel lojon yic'ot che' mic sujbel lojon ti uts'at; mic sujbel lojon ti xlot pero isujm chuqui mic su'b lojon.

⁹ Mi' lon alob mach cʌmbiloñic lojon che' wen cʌmbilon lojon, woliyon lojon ti chʌmel pero cuxulon lojon, mi cʌjq'uel lojon ti wocol pero ma'añic mic tsʌnsʌntel lojon.

¹⁰ Ch'ijiyem lojon c pusic'al pero chʌn tijicñayon lojon, ma'añic c chu'bʌañ lojon, pero wen chumulob yaño' bʌ cha'añ que'tel lojon ti subt'añ, ma'añic mi ts'ita'ic c chu'bʌañ lojon, pero c cha'añʌch lojon pejtelel chuqui tac añ.

¹¹ Quermañujob ti Corinto, woli c laj su'beñetla chuqui woli c ña'tan tic pusic'al lojon. Tsa'ix c jambeyet lojon pusic'al.

¹² Ca'bʌl mij c'uxbiñet lojon, pero woli la' ñup'beñon lojon la' pusic'al.

¹³ Yom mi la' q'uextʌbeñon lojon j c'uxbiya che' bajche' yom, woli c pejcañetla che' bajche' calobiletla, jambeñon lojon la' pusic'al.

I templojonla jiñi cuxul bʌ Dios

¹⁴ Mach mi la' cha'len ñujpuñel yic'ot jiñi mach bʌ añic mi' ñop Dios, come ¿bajche' mi mejlel i tem ajñel chuqui toj yic'ot chuqui mach tojic? ¿Bajche' mi mejlel i tem ajñel i sʌclel pañimil yic'ot ac'ʌlel?

¹⁵ ¿Bajche' mi' caj ti ajñel ti ñʌch'ʌl Cristo yic'ot jiñi xi'ba? ¿Lajal ba chuqui mi' ña'tañob jiñi mu' bʌ i ñopob Cristo yic'ot jiñi mach bʌ añic mi' ñopob?

¹⁶ I templo Dios ¿jim ba i pi'ʌl jiñi dios tac? Joñonla i templojonla jiñi cuxul bʌ Dios che' bajche' tsi' yʌlʌ Dios: “Mi caj c chumtʌl ti' tojlelob. Ya' mij caj ti ajñel. Mi caj cochel ti' Dios. Mi caj cotsañob tic cha'añ”.

¹⁷ Jiñi cha'añ, “Loq'uenla ti' tojlel mach bʌ añic mi' ñopob. Tʌts'ʌ la' bʌ ba'añob, che'en lac Yum. Mach mi la' ñochtan chuqui tac bi'bi'. Mi caj c ch'ʌmetla tic wenta.

¹⁸ Mi caj cochel ti la' Tat, che'en lac Yum, mach bʌ añic i p'isol i p'ʌtʌlel. Mi caj la' wochel ti calobil, che'en lac Yum, jiñi mach bʌ añic i p'isol i p'ʌtʌlel”.