2 Corintios 5 - Jiñi Tsiji' bʌ Wen T'añ cha'añ Estudio

¹ La cujil mi tsa' jisʌnti lac bʌc'tal ba' woli ti chumtʌl lac ch'ujlel, mi caj la cʌq'uentel lac bʌc'tal ti panchan aq'uebilon bʌ la ti Dios, jiñʌch la cotot mach bʌ melbilic ti c'ʌbʌl, mach yujilic jilel.

² Jiñi cha'añ mi lac cha'len ajcʌn che' añon to la ti lac bʌc'tal. La comix lac bʌc'tal am bʌ ti panchan mu' bʌ caj lac lʌp che' bajche' bujcʌl,

³ come ma'añic mi caj la cajñel che' bajche' espíritu mach bʌ añic i bʌc'tal.

⁴ Che' wʌ' to añonla ti lac bʌc'tal ila ti pañimil mi lac cha'len ajcʌn yic'ot tsic pusic'al, mach la comic lac chilbentel, pero la comix chumtʌl ti tsiji' bʌ lac bʌc'tal cha'añ mi' pʌntʌyel jiñi yujil bʌ chʌmel ti jiñi mach bʌ yujilic chʌmel, cha'añ cuxul mi la cajñel ti pejtelel ora.

⁵ Jiñi cha'añ Dios tsi' meleyonla cha'añ che'ʌch yom mi la cajñel, tsi' yʌq'ueyonla jiñi Espíritu i tejchibal bʌ i ye'tel ti lac pusic'al.

⁶ Jiñi cha'añ mi lac chʌn xuc'chocon lac pusic'al, come la cujil maxto ya'ic añonla la quic'ot lac Yum che' wʌ' to añonla ti lac bʌc'tal.

⁷ Come xuc'ul mi la cajñel cha'añ jiñi mu' bʌ lac ñop, mach cha'añic chuqui mi laj q'uel.

⁸ Añʌch lac pijtaya, la com laj cʌy lac bʌc'tal cha'añ mi la cajñel yic'ot lac Yum.

⁹ Jiñi cha'añ mi lac cha'len wersa ja'el cha'añ mi' q'uelonla ti uts'at lac Yum mi wʌ' to añonla ti lac bʌc'tal o mi mach wʌ'ix añonla,

¹⁰ come ti pejtelelonla wersa mi caj lac pʌs lac bʌ ti melobʌjʌl i cha'añ Cristo, cha'añ mi la cʌq'uentel lac tojol ti jujuntiquilonla, cha'añ lac melbal tsa' bʌ lac mele ti lac bʌc'tal, mi wen o mi jontol.

Jiñi t'añ mu' bʌ i yuts-esañonla

¹¹ Jiñi cha'añ mi lac xic'ben wiñicob x'ixicob ti uts'at, come mi lac wen bʌc'ñan lac Yum, cʌmbil i cha'añ Dios c pusic'al lojon, mi cʌl cʌñʌl la' cha'añ ja'el i wiñicon lojon ti isujm.

¹² Ma'añic woli c cha' su'beñet cha'añ mi la' q'uelon lojon ti uts'at, pero cha'añʌch mi la' taj la' ñuclel tic tojlel lojon, che' jiñi añ chuqui mi mejlel la' su'ben jiñi wiñicob mu' bʌ i lon q'uelob i bʌ ti ñuc che' leco i pusic'al.

¹³ Mi tonto mi' q'uelon lojon wiñicob, com jach c tsictesan lojon i ñuclel Dios. Mi uts'at mi' q'uelob c ña'tʌbal lojon, woli jach c sʌclan lojon la' wenlel.

¹⁴ Come i c'uxbiya Cristo mi' wersa xic'beñon lojon, come mic ña'tan lojon mi tsa' chʌmi juntiquil wiñic cha'añ pejtelel wiñicob x'ixicob, che' jiñi, ti Cristo tsa' laj chʌmiyonla cha'añ mi' jilel i p'ʌtʌlel mulil ti lac tojlel,

¹⁵ tsa' chʌmi Cristo cha'añ pejtelel wiñicob x'ixicob, cha'añ mach yomic mi lac sʌclan lac bajñel wenlel joñonla tsa' bʌ aq'uentiyonla laj cuxtʌlel. Pero yom mi lac ñuq'uesan Cristo tsa' bʌ chʌmi cha'añonla, tsa' bʌ cha' ch'ojyi.

¹⁶ Jiñi cha'añ ma'añix mi lac chʌn q'uel lac bʌ che' bajche' ti yam bʌ ora che' sajtemontola, mi tsa' laj cʌñʌ Cristo che' bajche' wiñic che' bʌ tsa' ñumi ti pañimil, mach chʌn che'ix mi laj cʌn.

¹⁷ Jiñi cha'añ majqui jach añ ti Cristo tsijib melbilix. Tsa'ix jili jiñi tsucul tac bʌ. Awilan tsijib melbil ti' pejtelel.

¹⁸ Ch'oyol ti Dios jiñi tsijib tac bʌ, Dios tsa'ix i yuts-esa lac pusic'al la quic'ot cha'añ tsi' mʌñʌyonla Cristo, tsa'ix i yʌq'ueyon lojon que'tel ti jiñi t'añ mu' bʌ i yuts-esʌbeñonla lac pusic'al yic'ot Dios.

¹⁹ Mic su'b lojon ili t'añ, Dios tsi' pʌsʌ i bʌ ti Cristo che' bʌ tsi' yuts-esʌbeyob i pusic'al jiñi año' bʌ ti pañimil, tsi' cuchbeyob i mul, tsi' yʌq'ueyon lojon tic wenta jiñi t'añ mu' bʌ i yuts-esʌbeñonla lac pusic'al yic'ot Dios.

²⁰ Jiñi cha'añ wa'chocobilon lojon ti' q'uexol Cristo, come Dios woli' pejcañetla tic tojlel lojon, mic su'beñet lojon ti wocol t'añ che' bajche' Cristo: La' uts-esʌntic la' pusic'al yic'ot Dios.

²¹ Come Cristo ma'añic tsi' wis ñopo mulil, pero Dios tsi' yʌq'ue i cuch pejtelel lac mul ti' bʌc'tal ya' ti cruz cha'añ mi' yʌq'ueñonla toj bʌ lac pusic'al ti Cristo.