2 Corintios 4 - Jiñi Tsiji' bʌ Wen T'añ cha'añ Estudio

¹ Jiñi cha'añ ma'añic mic lujb-an lojon, come Dios cha'añ tsi' p'untayon lojon tsi' yʌq'ueyon lojon tic wenta ili e'tel.

² Ma'añic chuqui mic mel lojon ti mucul mi jiñic quisintic bʌ, ma'añic mic lotin lojon wiñicob, ma'añic mic socben lojon i t'añ Dios. Mic su'b lojon isujmlel jiñi wen t'añ ti' tojlel Dios. Yujilob pejtelel wiñicob x'ixicob tojon lojon.

³ Pero mi mucul to jiñi wen t'añ, mucul ti' tojlelob jiñi woliyo' bʌ ti sajtel.

⁴ Satanás, jiñʌch i dios jiñi jontolo' bʌ ti pañimil, tsa'ix i mʌcbeyob i ña'tʌbal jiñi mach bʌ añic mi' ñopob Cristo, ame i q'uelob i sʌclel jiñi wen t'añ ba' tsiquil i ñuclel Cristo i yejtal bʌ Dios.

⁵ Ma'añic mic bajñel su'b lojon c bʌ che' mic cha'len lojon subt'añ, mic su'b lojon cha'añ Jesucristo jiñʌch lac Yum. Joñon lojon la' waj e'telon lojon cha'añ woli j c'uxbin lojon Jesús.

⁶ Come Dios tsa' bʌ i yʌc'ʌ mandar cha'añ mi' tsictiyel i sʌclel pañimil ti ic'ch'ipan bʌ, jiñʌch i sʌclel tsa' bʌ i yʌc'ʌ ti tsictiyel ti lac pusic'al cha'añ mi lac ch'ʌmben isujm woli' pʌsbeñonla i ñuclel Dios ti Jesucristo.

Añob ti' xuc'tʌlel

⁷ Uts'atʌch i sʌclel Cristo am bʌ ti lac pusic'al, che' yilal bajche' c'ax letsem tac bʌ i tojol lotol bʌ ti uc'um, come melbilonla ti lum che' bajche' uc'um, tsiquil mach ch'oyolic ti joñonla jiñi ñuc bʌ lac p'ʌtʌlel, pero ch'oyol ti Dios.

⁸ Joy ñet'bilon lojon ti wocol, pero añ bajche' mi caj c loq'uel lojon, mach cujilic lojon bajche' mi' caj ti ujtel, pero chʌn xuc'ul mic ñop lojon,

⁹ tic'lʌbilon lojon pero mach cʌybiloñic lojon, mic jajts'el lojon pero ma'añic mic jisʌntel lojon.

¹⁰ Baqui jach mic majlel lojon woli c ch'ʌm lojon majlel tic bʌc'tal che' bajche' tsa' chʌmi Jesús cha'añ mi' tsictiyel cuxul Jesús tic bʌc'tal lojon.

¹¹ Come joñon lojon cuxulon bʌ lojon mi cʌjq'uel lojon ti chʌmel ti pejtelel ora cha'añ woli c melben lojon i ye'tel Jesús, cha'añ mi' tsictiyel i cuxtʌlel Jesús tic bʌc'tal lojon yujil bʌ chʌmel.

¹² Che' mic su'b lojon jiñi wen t'añ, woli c chʌmel lojon, pero ti' caj jiñi wen t'añ woli la' taj la' cuxtʌlel.

¹³ Lajal mic ñop lojon tic pusic'al bajche' jiñi tsa' bʌ i ts'ijbu jiñi t'añ: “Tsa' c ñopo. Jiñi cha'añ tsa' c cha'le t'añ”. Joñon lojon ja'el mic ñop lojon. Jiñi cha'añ mic cha'len lojon t'añ.

¹⁴ Come cujil lojon ti isujm, Dios tsi' teche ch'ojyel lac Yum Jesús, mi caj i techon lojon ch'ojyel ja'el yic'ot Jesús, Dios mi caj i tempañon lojon yic'otetla ti' tojlel Jesús.

¹⁵ Come mi cu'bin lojon pejtelel ili wocol cha'añ mi la' taj la' wenlel, che' mi' tajbeñob i yutslel i pusic'al Dios ca'bʌlob mi caj i su'beñob Dios wocolix i yʌlʌ cha'añ mi' yutsi tsictiyel i ñuclel Dios.

¹⁶ Jiñi cha'añ ma'añic mic lujb-an lojon, woli' p'ʌt-an majlel lac pusic'al ti jujump'ejl q'uiñ, anquese woli ti chʌmel lac bʌc'tal.

¹⁷ Come sejb lac wocol mu' bʌ la cu'bin, poj jumuc' jach mi' ñumel, wolix i p'ojlesʌbeñonla c'ax oñ bʌ lac ñuclel mach bʌ añic mi' jilel ti pejtelel ora.

¹⁸ Come ma'añic mi lac xuc'chocon lac pusic'al ti chuqui tac mi laj q'uel ti pañimil, pero mi lac xuc'chocon ti jiñi mach bʌ tsiquilic am bʌ ti panchan, come jiñi tsiquil tac bʌ ñumel jach woli, jiñi mach bʌ tsiquilic ma'añic mi' jilel ti pejtelel ora.