2 Corintios 2 - Jiñi Tsiji' bʌ Wen T'añ cha'añ Estudio

¹ Tsa' c ña'ta tic pusic'al ma'añix mic majlel ba'añetla cha'añ ma'añic mic cha' p'olbeñetla i ch'ijiyemlel la' pusic'al.

² Mi tsa' c techbeyetla i ch'ijiyemlel la' pusic'al, ¿majqui mi caj i cha' ñuq'uesan c pusic'al? Cojach jatetla, pero mach mejliquetla mi ch'ijiyemetla cha'añ c t'añ.

³ Jiñi cha'añ tsa' c ts'ijbubeyetla che' bajche' tsa' mele cha'añ ma'añic mi la' wʌq'ueñon i ch'ijiyemlel c pusic'al che' mij c'otel ba'añetla, pero ñumen uts'atax che' muq'uic la wʌq'ueñon i tijicñʌyel c pusic'al, cujil i tijicñʌyel c pusic'al jiñʌch i tijicñʌyel la' pusic'al ti la' pejtelel.

⁴ Wocol tsa' cu'bi che' bʌ tsa' c ts'ijbubeyetla ili juñ, come ca'bʌl tsa' c cha'le ña'tʌbal ame c techbeñetla i ch'ijiyemlel la' pusic'al. Ca'bʌl tsa' cu'bi wocol, tsa' c cha'le uq'uel. Pero wersa tsa' c ts'ijbu cha'añ mi la' ña'tan mic wen c'uxbiñetla.

Pablo mi' ñusʌben i mul i contra

⁵ Pero mi añ majqui tsi' i techbeyon i ch'ijiyemlel c pusic'al mach joñoñic jach, pero tsi' techbeyetla ja'el i ch'ijiyemlel la' pusic'al.

⁶ Jasʌlix tsi' yu'bi wocol jiñi am bʌ i mul, come ca'bʌl la quermañujob tsi' tiq'uiyob.

⁷ Yomix mi la' ñusʌben i mul, yomix mi la' cha' ñuq'uesʌben i pusic'al ame junyajlel ochic i ch'ijiyemlel.

⁸ Jiñi cha'añ mic su'beñetla ti wocol t'añ, pʌsbenla c'uxbiya.

⁹ Jiñi cha'añ tsa' c ts'ijbubeyetla ili juñ cha'añ com c ña'tan mi woli la' jac'beñon c t'añ ti' pejtelel.

¹⁰ Majqui jach mi la' ñusʌben i mul, joñon ja'el mic ñusʌben i mul, come jiñi mulil tsa' bʌ c ñusʌbe, mi añ i mul, tsa' c ñusʌbe ti' tojlel Cristo cha'añ mi la' taj la' wenlel,

¹¹ ame p'ʌt-ac Satanás ti laj contra, come la cujil maña jax bajche' mi' mel i ye'tel xi'ba.

Jiñi yom bʌ Pablo ya' ti Troas

¹² Che' bʌ tsa' c'otiyon ti Troas cha'añ mic su'b i wen t'añ Cristo, tsa' jambentiyon jump'ejl puerta yilal cha'añ i ye'tel lac Yum.

¹³ Pero ma'añic tsa' ñʌjch'i c pusic'al, come ma'añic tsa' c taja quermañu Tito, jiñi cha'añ tsa' loq'uiyon, tsa' majliyon ti Macedonia.

Mi' chʌn mʌjlel lac cha'añ ti Cristo

¹⁴ Pero wocolix i yʌlʌ Dios come ti Cristo Jesús mi' coltañonla cha'añ mi' chʌn mʌjlel lac cha'añ, yic'ot mi' c'ʌñonla ti' pucol jiñi xojocña bʌ che' mi la cʌc' ti cʌjñel i ña'tʌbal Cristo ti pejtelel lum,

¹⁵ come xojocña mi' yu'biñonla Dios cha'añ woli' yajñel Cristo ti lac pusic'al, xojocña i yutslel Cristo ti' tojlel jiñi woli bʌ i coltʌntelob yic'ot ti' tojlel jiñi woliyo' bʌ ti sajtel.

¹⁶ Che' mi' yu'biñob jiñi sajtemo' bʌ, mi' ña'tañob woli' majlelob ti tojmulil, che' mi' yu'biñob jiñi año' bʌ i cuxtʌlel, mi' ña'tañob añobʌch i cuxtʌlel. ¿Majqui añ i bajñel p'ʌtʌlel cha'añ mi' mel jiñi e'tel?

¹⁷ Come mach lajaloñic lojon bajche' ca'bʌlob mu' bʌ i c'ʌñob i t'añ Dios cha'añ yomob ganar che' bajche' xchoñoñelob, come Dios tsi' chocoyon lojon tilel. Jiñi cha'añ mic cha'len lojon subt'añ ti isujm yic'ot i p'ʌtʌlel Cristo ti jump'ejl lojon c pusic'al ti' wut Dios.