2 Corintios 13 - Jiñi Tsiji' bʌ Wen T'añ cha'añ Estudio

¹ I yuxyajlelix talon ba'añetla. Cha'añ ti' t'añ cha'tiquil uxtiquil testigojob mi caj i tsictiyel mi añ i mul wiñic x'ixic.

² Ti pejteletla yic'ot jiñi tsa' bʌ i cha'leyob mulil mic cha' su'beñetla che' bajche' tsa' c su'beyetla ti yam bʌ ora: Che' mic cha' tilel ba'añetla, tsʌts mi caj c tiq'uetla. Anquese mach ya'ic añon woli c ts'ijbubeñetla che' bajche' ya'ʌch añon ti la' tojlel.

³ Come la' wom la' ña'tan mi Cristo woli' c'ʌmbeñon quej ti isujm, jiñi mach bʌ añic i c'unlel ajñel, p'ʌtʌl Cristo ti la' tojlel.

⁴ Anquese añ i c'unlel Cristo che' bʌ tsa' ch'ijle ti cruz, cuxul wʌle cha'añ ti' p'ʌtʌlel Dios. Joñon lojon ja'el c'uñon lojon ti Cristo. Pero cuxulon lojon yic'ot Cristo, cha'añ i p'ʌtʌlel Dios ti la' tojlel.

⁵ Ña'tan la' bʌ mi woli la' ñop Cristo ti isujm. Ña'tanla bajche' añetla. ¿Mach ba la' wujilic? Woli' yajñel Jesucristo ti la' tojlel mi isujm woli la' ñop. Mi ma'añic woli la' ñop, chocbiletla ti Dios.

⁶ Mi cʌl la' wujil i wiñicon lojon Dios ti isujm. Mach chocbiloñic lojon i cha'añ.

⁷ Mij c'ajtiben lojon Dios ti oración cha'añ ma'añic mi la' mel chuqui jontol. Com lojon mi la' mel chuqui uts'at, pero mach cha'añic mij q'uejlel lojon ti uts'at ti' wut wiñicob x'ixicob. Melela chuqui uts'at anquese mi j q'uejlel lojon che' bajche' chocbilon lojon ti Dios.

⁸ Come mach mejlic laj contrajin isujmlel Dios, cojach yom mi lac tsictesan.

⁹ Jiñi cha'añ tijicñayon lojon mi p'ʌtʌletla anquese c'uñon lojon. Mij c'ajtiben lojon Dios cha'añ mi' ts'ʌctiyel la' wenlel.

¹⁰ Jiñi cha'añ mic ts'ijbubeñetla ili t'añ che' mach ya'ic añon la' wic'ot, come mach comic cʌ'leñetla che' mic tilel yic'ot c p'ʌtʌlel tsa' bʌ i yʌq'ueyon lac Yum. Com jach j c'ʌn c p'ʌtʌlel cha'añ mic xuc'chocoñetla, mach cha'añic mic jisañetla.

I YUJTIBAL ( 13.11-14 ) I yutslel i t'añ yic'ot i yujtibal

¹¹ Wʌle quermañujob, ajñenla ti' tijicñʌyel la' pusic'al, la' ts'ʌctiyic la' wenlel, la' ñuq'uesʌntic la' pusic'al, ajñenla ti ñʌch'ʌl ti jump'ejl jach la' pusic'al. Che' jiñi, Dios mi caj i yajñel la' wic'ot, jiñi Dios mu' bʌ i c'uxbiñonla, mu' bʌ i yʌq'ueñonla i ñʌch'tʌlel lac pusic'al.

¹² Aq'uen la' bʌ cortesía, ts'ujts'un la' bʌ ti' sʌclel la' pusic'al.

¹³ Pejtelel i cha'año' bʌ Dios mi' yʌq'ueñetla cortesía.

¹⁴ La' ajñic ti la' tojlel ti la' pejtelel i yutslel i pusic'al lac Yum Jesucristo yic'ot i c'uxbiya Dios yic'ot jiñi Ch'ujul bʌ Espíritu, la caj Pi'leya. [Amén.]