2 Corintios 12 - Jiñi Tsiji' bʌ Wen T'añ cha'añ Estudio

Wocol ti' bʌc'tal

¹ Isujm mach uts'atic che' mic su'b c bʌ ti ñuc, pero mi caj c su'b chuqui tac tsa' j q'uele ti espíritu yic'ot chuqui tsa' pʌsbentiyon ti lac Yum.

² Cʌmbil c cha'añ juntiquil wiñic ti Cristo. Añix chʌnlujump'ejl (14) ja'b tsa' pʌjyi letsel c'ʌlʌl ti' yuxlajmlel panchan, (mi yic'ot i bʌc'tal o mi loq'uem ti' bʌc'tal, mach cujilic, cojach Dios yujil).

³ Cujil cha'añ jiñi wiñic, (mi yic'ot i bʌc'tal o mi loq'uem ti' bʌc'tal, mach cujilic, cojach Dios yujil),

⁴ tsa' pʌjyi letsel c'ʌlʌl ti paraíso ba' tsi' yu'bi t'añ mucul bʌ isujmlel mach bʌ aq'uebilic jiñi wiñic cha'añ mi' cha' su'b.

⁵ Mic su'b i ñuclel ili wiñic, ma'añic mic su'b c bajñel ñuclel, jiñi jach j c'unlel mij q'uel ti ñuc.

⁶ Muq'uic c su'b c bʌ ti ñuc mach tontojoñic, come jiñi jach mic su'b chuqui isujm. Pero mach comic c su'b c ñuclel ame muq'uic i lon ña'tañob wiñicob ñumen ñucon bajche' mi' tsictiyel tic melbal yic'ot tic t'añ.

⁷ Cha'añ i ñuclel jiñi tsa' bʌ pʌsbentiyon ti lac Yum, ma'añic mi cu'bin c ñuclel. Tsa' aq'uentiyon wocol tic bʌc'tal ch'oyol bʌ ti Satanás cha'añ mi' tic'lañon ame ñumen ñuquic mij q'uel c bʌ bajche' yom;

⁸ cha'añ ili wocol, uxyajl tsa' j c'ajtibe lac Yum ti wocol t'añ cha'añ mi' lajmesʌbeñon c wocol.

⁹ Pero lac Yum tsi' su'beyon: “Jasʌl i yutslel c pusic'al ti a tojlel, come mi' ts'ʌctiyel c p'ʌtʌlel ti' c'unlel wiñic”. Jiñi cha'añ ti pejtelel c pusic'al mij q'uel ti ñuc j c'unlel cha'añ mi' yajñel i p'ʌtʌlel Cristo tic pusic'al.

¹⁰ Jiñi cha'añ tijicñayon che' añ j c'unlel yic'ot c ts'a'lentel yic'ot che' añ to chuqui yom c cha'añ yic'ot c tic'lʌntel yic'ot wocol mu' bʌ cu'bin cha'añ ti' c'uxbintel Cristo, come che' ba' ora c'uñon p'ʌtʌlon.

¹¹ Tsa' c su'bu c ñuclel che' bajche' tonto bʌ, jatetla tsa' la' ñijcayon c su'b, mach che'ic yom, yom mi la' su'b c ñuclel jatetla, anquese ma'añic c bajñel ñuclel, come mach ñucobic bajche'on jiñi mu' bʌ i lon cuyob i bʌ ti ñuc bʌ apóstolob.

¹² Che' ya'añon ti la' tojlel tsa' wen tsictiyi cha'añ apóstoloñʌch ti' isujm come tsa' la' q'uele ñuc bʌ c melbal yic'ot c p'ʌtʌlel ti' cuchol wocol. Dios tsi' tsictesa yic'ot i yejtal tac i p'ʌtʌlel yic'ot bʌbʌq'uen tac bʌ.

¹³ Junchajp jach mach bʌ añic tsa' mejli la' mel che' bajche' tsi' meleyob jiñi yam bʌ xñopt'añob: Ma'añic tsa' la coltayon ti la' chu'bʌañ. Ñusʌbeñonla ili c mul, come joñoñʌch ma'añic tsa' c'ajtibeyetla.

Pablo mi' su'b i yuxyajlel mi majlel ti Corinto

¹⁴ La' wilan i yuxyajlelix tsa' c chajpa c bʌ cha'añ mic tilel ba'añetla. Ma'añic chuqui mi caj j c'ajtibeñetla, come ma'añic woli c ña'tan c ch'ʌm chuqui añ la' cha'añ pero mic ña'tañetla. Come mach i wentajic la calobilob cha'añ mi' tempʌbeñob i chu'bʌañ i tat i ña'. I wentajʌch i tat i ña' cha'añ mi' tempʌbeñob i chu'bʌañ i yalobilob.

¹⁵ Mi caj cʌc' c bʌ yic'ot pejtelel c pusic'al yic'ot pejtelel c chu'bʌañ cha'añ mi la' taj la' wenlel, come ca'bʌl jax woli c chʌn c'uxbiñetla, anquese ma'añic woli la' c'uxbiñon che' bajche' ti ñaxan.

¹⁶ La' wujil cha'añ ma'añic chuqui tsa' c'ajtibeyetla. Pero mi la' wʌl mayajax tsa' c lotiyetla.

¹⁷ ¿Tsa' ba i chilbeyetla la' chu'bʌañ jiñi wiñicob tsa' bʌ c choco majlel ba'añetla?

¹⁸ Ti wocol t'añ tsa' c su'be majlel Tito. Tsa' c choco majlel juntiquil la quermañu yic'ot. ¿Tsa' ba i chilbeyetla la' chu'bʌañ Tito? Wen la' wujil jump'ejl lojon c pusic'al yic'ot jiñi Espíritu. Junlajal bajche' mic mel lojon que'tel.

¹⁹ ¿Mu' ba la' lon al woli c su'b lojon c bʌ ti toj cha'añ jach mi la' q'uelon ti uts'at? Mic cha'len lojon t'añ ti Cristo ti' tojlel Dios. C'uxbibilet bʌ la, tsa'ix c su'bu lojon ti pejtelel cha'añ mic xuc'chocoñetla.

²⁰ Mic cha'len bʌq'uen ame mach che'ic mic tajetla bajche' com j q'ueletla che' mic tilel ba'añetla, ame mach che'ic mi la' q'uelon ja'el bajche' la' wom. Tic'ʌl mi woliyetla ti leto, tsʌytsʌyña la' pusic'al cha'añ i wenlel la' pi'ʌlob. Tic'ʌl mi añ la' mich'ajel, o woli la' t'ox la' bʌ ti leto, o woliyetla ti u'yaj t'añ yic'ot wulwul t'añ, o c'ax ñuc woli la' pʌs la' bʌ, o woli la' contrajin la' bʌ.

²¹ Mic cha'len bʌq'uen ame mi' yʌc'on ti quisin Dios ti la' tojlel che' mic cha' tilel ba'añetla, ame mi cuc'tan jiñi tsa' bʌ i cha'leyob mulil mi ma'añic tsi' cʌyʌyob i bi'bi'lel yic'ot i ts'i'lel yic'ot i colosojlel.