2 Corintios 11 - Jiñi Tsiji' bʌ Wen T'añ cha'añ Estudio

Pablo yic'ot jiñi payxo apóstolob

¹ Uts'at mi tsa' la' ts'ita' cuchbeyon c t'añ, anquese tonto yu'bil.

² Com mi la' taj la' wenlel che' bajche' yom Dios, come tsa'ix c sijiyetla cha'añ mi la' taj juntiquil jach la' ñoxi'al, com cʌq'uetla ti' wenta Cristo che' bajche' tsiji' bʌ xch'oc.

³ Pero mic cha'len bʌq'uen ame sojquic la' ña'tʌbal cha'añ lot che' bajche' tsa' lotinti jiñi Eva ti lucum, che'ʌch ja'el mi' mejlel la' taj la' lotintel cha'añ mi' jilel i xuc'tʌlel la' pusic'al ti Cristo,

⁴ come mi tsa' tili juntiquil cha'tiquil i su'beñetla yam bʌ Jesús mach bʌ añic tsa' c su'bu lojon, o mi tsa' aq'uentiyetla yam bʌ espíritu mach bʌ jiñic tsa' bʌ aq'uentiyetla, o mi yam bʌ wen t'añ mach bʌ jiñic tsa' la' ñopo, tsiquil woli la' jac'beñob ti ora.

⁵ Mic ña'tan mach ñumen ñucobic che' bajche'on jiñi yaño' bʌ mu' bʌ i lon cuyob i bʌ ti ñuc bʌ apóstolob,

⁶ anquese mach ch'ejloñic ti t'añ, ca'bʌlʌch c ña'tʌbal che' bajche' tsa' wen tsictiyi ti pejtelel c melbal ya' ti la' tojlel.

⁷ ¿Tsa' ba c cha'le mulil che' bʌ tsa' c mele c bʌ ti pec' cha'añ mi la' taj la' ñuclel, che' bʌ tsa' c su'beyetla i wen t'añ Dios ti la' majtañ jach?

⁸ Tsa' c chilbeyob i yofrenda yam bʌ xñopt'añob yu'bil che' bʌ tsi' coltayoñob cha'añ mij coltañetla.

⁹ Che' ya'añon quic'otetla che' añ to chuqui yom c cha'añ, ma'añic chuqui tsa' j c'ajtibeyetla, come jiñi la quermañujob tsa' bʌ tiliyob ti Macedonia tsi' yʌq'ueyoñob chuqui añ to yom c cha'añ, che'ʌch tsa' c ñusa wocol ame mi la' wu'bin wocol cha'añon, che'ʌch mi caj c chʌn cha'len.

¹⁰ Mic su'beñetla cha'añ ti' isujmlel Cristo am bʌ tic pusic'al, ma'añic majqui mi caj i tic'on ti' su'bol jiñi wen t'añ ti pejtelel Acaya.

¹¹ ¿Chucoch? ¿Cha'añ ba ma'añic woli j c'uxbiñetla? Yujil Dios c'ux mi cubiñetla.

¹² Che' bajche' woli c mel mi caj c chʌn mel, cha'añ mic tsictesʌbeñob i lot jiñi mu' bʌ i bajñel su'bob i bʌ ti ñuc, come jiñi wiñicob mi' lon alob lajal woliyob ti e'tel che' bajche'on lojon,

¹³ come xlot bʌ apóstolob, x'e'telob mu' jach bʌ i cha'leñob lotiya, mi' lon su'bob i bʌ ti apóstolob i cha'añ Cristo.

¹⁴ I tilel che'ʌch mi' melob, come Satanás ja'el mi' cuy i bʌ ti ángel mu' bʌ i pʌs i c'ʌc'al.

¹⁵ I tilel che'ʌch mi' melob i wiñicob ja'el; mi' lon cuyob i bʌ ti toj bʌ x'e'telob, pero mi caj i jilelob cha'añ leco bʌ i melbal.

I wocol Pablo che' bajche' Apóstol

¹⁶ Mic cha' su'beñetla: Mach mi la' q'uelon ti tonto. Pero mi tontojon, pʌyʌyonla che' bajche' mi la' pʌy juntiquil tonto bʌ cha'añ mic ts'ita' su'b c ñuclel ja'el.

¹⁷ Mach tilemic ti lac Yum chuqui woli c su'b, pero woli c su'b che' bajche' juntiquil tonto bʌ mu' bʌ i su'b i bajñel ñuclel.

¹⁸ Añ ca'bʌlob mu' bʌ i su'bob i bʌ ti ñuc cha'añ chuqui tac mi' tajob ti pañimil, joñon ja'el mi caj c su'b c ñuclel.

¹⁹ Come tijicña mi la' wu'bibeñob i t'añ jiñi tontojo' bʌ, wen añ la' ña'tʌbal mi la' wʌl,

²⁰ mi la' cuchben che' añ majqui mi' yotsañetla ti majtañ e'tel, che' añ majqui mi' jisʌbeñetla, che' añ mu' bʌ i ch'ʌm la' chu'bʌañ, che' añ majqui mi' chañ-esan i bʌ, che' añ majqui mi' jats'etla ti la' choj.

²¹ Quisintic jax che' mic su'beñetla ili t'añ: ¡mach ch'ejloñic lojon che' bajche' jiñi yaño' bʌ! Mi añ i p'ʌtʌlel yam bʌ wiñic cha'añ mi' su'b i bʌ ti ñuc, añ c p'ʌtʌlel ja'el cha'añ mic su'b c bʌ ti ñuc, mic su'b jiñi t'añ che' bajche' juntiquil tonto bʌ.

²² ¿Hebreojo' ba ili wiñicob? Hebreojon ja'el. ¿Loq'uemo' ba ti' p'olbal Israel? Joñon ja'el. ¿I p'olbalo' ba Abraham? Joñon ja'el

²³ ¿X'e'telo' ba i cha'añ Cristo? Joñon ja'el. (Mic cha'len t'añ che' bajche' tonto bʌ). Ñumen ca'bʌl tsa' c cha'le e'tel. Ñumen ca'bʌl tsa' cu'bi asiyal. Ñumen ca'bʌl tsa' ñujp'iyon. Colel tsa' cʌlʌ chʌmel.

²⁴ Jo'yajl jiñi judíojob tsi' yʌc'ʌyoñob ti jajts'el, bolonlujump'ejl i cha'c'al (39) tsi' jats'ʌyoñob ti asiyal ti jujunyajl.

²⁵ Uxyajl tsa' jajts'iyon ti te'. Junyajl tsa' jujliyon ti xajlel. Uxyajl colel c chʌmel ya' ti mar che' bʌ tsa' jejmi barco. Tsa' c ñusa jump'ejl ac'ʌlel yic'ot jump'ejl q'uiñ ti ojlil mar.

²⁶ Ca'bʌl tsa' c cha'le ñajt bʌ xʌmbal. Tsa' cu'bi bʌbʌq'uen tac bʌ ti ja' yic'ot ti' tojlel xujch' yic'ot ti' tojlel c pi'ʌlob yic'ot ti' tojlel jiñi gentilob yic'ot ti tejclum yic'ot ti jochol bʌ lum, yic'ot ti mar, yic'ot ti' tojlel jiñi mu' bʌ i to'ol cuyob i bʌ ti la quermañujob,

²⁷ tsa' c cha'le e'tel, tsa' lujb-ayon. Ca'bʌl ac'ʌlel ma'añic tsa' wʌyiyon. Tsa' cu'bi wi'ñal yic'ot tiquinti', tsa' c cha'le ch'ajb, tsa' cu'bi tsʌñal, pits'ilon.

²⁸ Mach cojic jach tsa' cu'bi jiñi, pero ti jujump'ejl q'uiñ mic chʌn ña'tan i cʌntʌntel pejtelel xñopt'añob año' bʌ tic wenta.

²⁹ Che' añ la quermañu c'um bʌ mi' yu'bin pañimil, ¿mach ba c'uñic pañimil mi cu'bin ja'el? ¿Mach ba ch'ijiyemic c pusic'al che' añ majqui mi' yʌsʌntel ti mulil?

³⁰ Mi wersa yom mic su'b c bʌ ti ñuc, mic su'b ti ñuc j c'unlel.

³¹ Yujil Dios ma'añic woliyon ti lot. Jiñi Dios i Tatʌch lac Yum Jesucristo, mu' bʌ i sujbel ti uts'at ti pejtelel ora.

³² Ya' ti Damasco jiñi gobernador am bʌ i ye'tel ti' yumʌntel jiñi rey Aretas, tsi' yʌc'ʌ ti cʌntʌntel jiñi colem tejclum cha'añ mi' chucon,

³³ pero jiñi la quermañujob tsi' loc'sayoñob ti ventana. Tsi' jich'cʌchʌyoñob ju'bel ti colem chiquib ti' ñʌc' jiñi chañ bʌ ts'ajc. Che' jiñi, tsa' c puts'ta jiñi año' bʌ i ye'tel woli bʌ i chijtañoñob.