2 Corintios 10 - Jiñi Tsiji' bʌ Wen T'añ cha'añ Estudio

3. TSI' CHA' COLTA I BɅ PABLO ( 10.1—13.10 ) I p'ʌtʌlel i ye'tel Pablo

¹ Joñon Pablojon, ti wocol t'añ mic pejcañetla ti' yutslel i pusic'al yic'ot i c'uxbiya Cristo. Añ mu' bʌ i yʌlob lijicñayon jach che' ya'añon ti la' tojlel, pero ch'ejl abi mic pejcañetla ti juñ che' mach ya'ic añon la' wic'ot.

² Mij c'ajtibeñetla ti wocol t'añ mach mi la' ñijcañon ame ch'ejlic mic mel c bʌ che' ya'añon la' wic'ot. Woli c ña'tan ch'ejl mi caj c mel c bʌ ti' tojlel jiñi mu' bʌ i lon alob woli c mel lojon che' bajche' yom c bajñel pusic'al lojon.

³ Isujm, añon lojon tic bʌc'tal pero mach tic bajñel p'ʌtʌlelic lojon woliyon lojon ti guerra,

⁴ come jiñi que'tijib mu' bʌ j c'ʌn lojon ti guerra mach melbilic ti wiñicob, ca'bʌlʌch i p'ʌtʌlel tilem bʌ ti Dios cha'añ mic jemben lojon i ye'tel xi'ba,

⁵ mic jemben lojon pejtelel lolom jach bʌ i t'añ wiñicob, yic'ot pejtelel i ña'tʌbal mu' bʌ i mʌctañ yaño' bʌ ti' cʌñol isujmlel Dios, mic tic' lojon pejtelel chuqui mi' lon tejchel ti' bajñel pusic'al wiñicob x'ixicob cha'añ mi' jac'beñob i t'añ Cristo.

⁶ Chajpʌbilon lojon cha'añ mic mel lojon pejtelel mu' bʌ i ñusʌbeñob i t'añ Cristo che' bʌ jatetla ja'el tsa'ix la' jac'be i t'añ ti ts'ʌcʌl.

⁷ Woli la' q'uelon lojon che' bajche' i tilel wiñicob ti pañimil. Mi añ majqui mi' ña'tan ochem ti Cristo, la' i ña'tan ochemon lojon ti Cristo ja'el.

⁸ Ma'añic mic cha'len lojon quisin mi tsa' c su'bu lojon c bʌ ti ñuc cha'añ c p'ʌtʌlel lojon tsa' bʌ i yʌq'ueyon lojon lac Yum, come aq'uebilon lojon cha'añ mic la' colel majlel, mach cha'añic mic jisañetla.

⁹ Com mi la' ña'tan ma'añic woli c lon bʌc'tesañetla tic juñ tac.

¹⁰ Come añ mu' bʌ i yʌlob: Isujm, wen tsʌts, wen p'ʌtʌl i t'añ jiñi juñ tac, pero mach p'ʌtʌlic Pablo ti lac tojlel, mach ch'ejlic mu' ti t'añ.

¹¹ La' i ña'tañob ili wiñicob woliyo' bʌ ti t'añ, che'ʌch bajche' mic cha'len lojon t'añ tic juñ che' mach ya'ic añon lojon, che'ʌch ja'el mi caj c pʌs lojon c bʌ tic melbal che' ya'añon lojon.

¹² Mach comic c laj lojon c bʌ yic'ot jiñi mu' bʌ i bajñel su'bob i ñuclel, mach lajaloñic lojon yic'otob, mi' bajñel q'uelob i bʌ ti ñuc yic'ot i pi'ʌlob, mi' bajñel lajob i bʌ yic'ot i pi'ʌlob. Tonto jax bajche' mi' melob.

¹³ Pero joñon lojon ma'añic mic bajñel su'b lojon c bʌ ti ñuc, woli c ñop mel lojon chuqui yom Dios che' bajche' mi' pʌsbeñon lojon. Cujil tsi' pʌyʌyon lojon cha'añ mic melben lojon i ye'tel c'ʌlʌl ba'añetla. Tsi' yʌq'ueyon lojon c p'ʌtʌlel cha'añ mij cʌntesañetla.

¹⁴ Ma'añic woli c bajñel ñuq'uesan majlel lojon que'tel aq'uebilon bʌ lojon ti la' tojlel, come ñaxan tsa' c'oti c su'beñet lojon i wen t'añ Cristo.

¹⁵ Ma'añic woli j q'uel lojon c bʌ ti ñuc cha'añ i ye'tel yaño' bʌ, com lojon xuc'ul mi la' ñop Dios, che' jiñi mi caj i ñuc añ majlel que'tel ti la' tojlel che' bajche' tsi' p'isbeyon lojon Dios.

¹⁶ Che'ʌch yom mic su'b lojon jiñi wen t'añ ja'el ti yam bʌ lum tac ti la' junwejlel, mach ya'ic ba' woli ti e'tel yam bʌ, ame mij q'uel c bʌ ti ñuc cha'añ chuqui tac melbil i cha'añ.

¹⁷ Pero jiñi mu' bʌ i q'uel i bʌ ti ñuc, la' i q'uel i bʌ ti ñuc cha'añ tsa'ix i ñopo lac Yum.

¹⁸ Come mach jiñic mi' q'uejlel ti uts'at jiñi mu' bʌ i bajñel su'b i bʌ ti ñuc, cojach jiñi mu' bʌ i sujbel ti ñuc ti Dios.