1 Timoteo 6 - Jiñi Tsiji' bʌ Wen T'añ cha'añ Estudio

¹ Pejtelel x'e'telob año' bʌ ti' yum, la' i wen q'uelob ti ñuc i yum, ame p'ajlec i c'aba' Dios yic'ot i cʌntesa.

² Che' ja'el jiñi x'e'telob año' bʌ i yum woli bʌ i ñop Dios, mach yomic mi' ñusʌbeñob i t'añ cha'añ laj bʌ hermañujob, pero ñumen uts'at yom mi' melbeñob i ye'tel, come c'uxbibil bʌ hermano jiñi woli bʌ i coltañ ti e'tel. Cʌntesañob ti ili t'añ, xic'beñob cha'añ mi' jac'ob.

Jiñi isujm bʌ lac wenlel

³ Mi añ majqui mi' cha'len yam bʌ cʌntesa, cha'añ mach yomic i ñop toj bʌ i t'añ lac Yum Jesucristo yic'ot i cʌntesʌntel cha'añ ch'ujul mi' yajñel,

⁴ c'ax ñuc woli' pʌs i bʌ che' jiñi, sojquem i ña'tʌbal, ma'añic mi' ch'ʌmben isujm pañimil, mi' cʌlʌx pejcan i pi'ʌlob, mi' contrajiñob yic'ot i t'añ cha'añ mi' techbeñob tsʌytsʌyña bʌ i pusic'al yic'ot leto, yic'ot p'ajoñel, yic'ot mi' sʌclʌbeñob i mul,

⁵ mi' tech ca'bʌl a'leya ti' tojlel wiñicob año' bʌ i bi'bi'lel, tsa' bʌ i cʌyʌyob isujmlel, mi' lon ch'ujutesan Dios cha'añ jach ganar. [Tʌts'ʌ a bʌ ti' tojlelob.]

⁶ Che' mi lac jac'ben i t'añ Dios ti' tijicñʌyel lac pusic'al, jiñʌch mero ganar,

⁷ come ma'añic chuqui tsa' lac ch'ʌmʌ tilel ila ti pañimil, isujm ma'añic chuqui mi mejlel lac ch'ʌm majlel.

⁸ Jiñi cha'añ, che' añ lac waj yic'ot lac pislel, yom tijicñayonla yic'ot jiñi am bʌ lac cha'añ.

⁹ Jiñi yomo' bʌ i taj ca'bʌl i chu'bʌañ mi' jac'ob i pʌyol ti mulil, mi yochelob ti yac, ñijcʌbilob cha'añ i colosojlel i pusic'al mu' bʌ i yʌc'ob ti wocol, mi' sʌtob i bʌ, mi caj i jisʌntelob.

¹⁰ Come i mulʌntel taq'uiñ mi' tech pejtelel jontolil, jiñi mu' bʌ i mulan ca'bʌl taq'uiñ tsa'ix i cʌyʌyob i ñop lac Yum, tsi' yotsayob i bʌ ti ca'bʌl wocol.

Xuc'ul bʌ mʌloñel

¹¹ Pero jatet i wiñiquet bʌ Dios, puts'tan pejtelel mulil, chʌn tsajcan chuqui toj yic'ot chuqui ch'ujul, chʌn ñopo Dios ti xuc'ul yic'ot c'uxbiya, yic'ot i cuchol wocol ti uts'at, yic'ot uts bʌ a pusic'al.

¹² Cha'len wen bʌ guerra cha'añ chʌn xuc'ul ma' ñop, ch'ʌmʌ ti a wenta a cuxtʌlel mach bʌ añic mi' jilel, come jiñi cha'añ tsi' pʌyʌyet, come jiñi cha'añ tsa' su'bu a bʌ ti Cristo ti' tojlel ca'bʌlob.

¹³ Wersa mic su'beñet ti' wut Dios, jiñi mu' bʌ i yʌq'ueñ i cuxtʌlel pejtelel chuqui tac añ, yic'ot ti' wut Jesucristo, jiñi tsa' bʌ i su'bu i bʌ ti Dios ti' tojlel Poncio Pilato,

¹⁴ wen cʌntan jiñi mandar, cha'añ ma'añic mi bi'b-añ yic'ot cha'añ ma'añic mi' ts'a'lentel, c'ʌlʌl jinto mi' tsictiyel lac Yum Jesucristo.

¹⁵ Come Dios mi caj i yʌc' ti tsictiyel Cristo che' ti' yorajlel, jiñʌch tijicña bʌ Yumʌl, jiñi cojach bʌ am bʌ i p'ʌtʌlel, i Rey jiñi reyob, i Yum jiñi yumʌlob,

¹⁶ jiñi cojach bʌ mach bʌ añic mi' chʌmel, jiñi chumul bʌ ti' sʌclel ba' mach mejlic lac lʌc'tesan lac bʌ, jiñi mach bʌ q'uelbilic i cha'añ wiñicob mi juntiquilic, mach bʌ mejlic laj q'uel ja'el. La' q'uejlic ti ñuc, la' yumʌntic ti pejtelel ora. Amén.

¹⁷ Ixcu jiñi año' bʌ ca'bʌl i chu'bʌañ ti pañimil, tsʌts ma' su'beñob cha'añ ma'añic mi' chañ-esañob i bʌ, cha'añ ma'añic mi' yʌc'ob ti' pusic'al i chu'bʌañ yujil bʌ jilel, su'beñob cha'añ mi' chʌn ñopob jiñi cuxul bʌ Dios mu' bʌ i wen aq'ueñonla pejtelel chuqui tac yom cha'añ mi la cu'bin lac tijicñʌyel.

¹⁸ Su'beñob cha'añ mi' melob chuqui uts'at, cha'añ mi' p'ojlel wen bʌ i melbal, mach yomic chʌcob, yom mi' coltañob yaño' bʌ yic'ot i chu'bʌañ.

¹⁹ Che' jiñi woli' yʌc'ob ti tempʌyel i chu'bʌañ cha'añ jiñi tal to bʌ q'uiñ. Woli' wen ac'ob ti' pusic'al i cuxtʌlel mach bʌ yujilic jilel.

I yujtibal i tic'ojel Pablo ti' tojlel Timoteo

²⁰ Timoteo, wen cʌntan pejtelel chuqui tac aq'uebilet ti a wenta, mach a ñʌch'tan lolom jach bʌ i t'añ pañimil ti' tojlel jiñi mu' bʌ i cʌlʌx pejcañob i bʌ, jiñi mu' bʌ i lon ña'tañob ca'bʌlʌch i ña'tʌbal.

²¹ Lamital tsa'ix i cha' cʌyʌyob jiñi tsa' bʌ i ñopoyob cha'añ mi' jac'beñob i t'añ pañimil. La' ajñic a wic'ot i yutslel i pusic'al Dios. [Amén.]