1 Timoteo 5 - Jiñi Tsiji' bʌ Wen T'añ cha'añ Estudio

Jiñi yom bʌ mi lac mel ti' tojlel yaño' bʌ

¹ Mach la' wʌ'len ñoxix bʌ, yom ma' xic'ben ti uts'at che' bajche' mi lac pejcan lac tat; xic'beñob ch'itoñ wiñicob che' bajche' la quijts'iñob;

² xic'beñob jiñi ñoxix bʌ x'ixicob che' bajche' lac ña'; yic'ot jiñi xch'octacob che' bajche' la quijts'iñob yic'ot pejtelel i sʌclel a pusic'al.

³ Q'uele ti ñuc jiñi me'ba' x'ixicob mi ti isujm me'ba'ʌch.

⁴ Pero mi añ juntiquil me'ba' x'ixic añʌch bʌ i yalobilob, mi i butsob, yom mi' ña'tañob cha'añ i wentajobʌch cha'añ mi' cʌntañob i tat i ña', la' i q'uextʌbeñob i wenlel jiñi tsa' bʌ i cosayob; come che'ʌch yom Dios, uts'at bʌ mi' q'uel.

⁵ Coltañla jiñi mero me'ba' x'ixic tsa' bʌ cʌle ti' bajñelil, woli bʌ i pijtan chuqui mi caj i taj ti Dios, woli bʌ i chʌn cha'len oración ti q'uiñil yic'ot ti ac'ʌlel.

⁶ Pero jiñi me'ba' x'ixic mu' bʌ i mel bajche' jach yom i bajñel pusic'al, chʌmeñix yilal anquese lon cuxul to.

⁷ Su'beñob ili t'añ ti mandar, cha'añ mi' yajñelob ti toj;

⁸ pero mi añ juntiquil mach bʌ añic mi' cʌntan jiñi mero i pi'ʌlob yic'ot jiñi año' bʌ ti' yotot, tsa'ix i cʌyʌ i ñop, ñumen lecojʌch che' bajche' juntiquil mach bʌ añic mi' ñop Dios.

⁹ Mach ma' chucben i c'aba' ti juñ jiñi me'ba' x'ixic maxto bʌ añic uxc'al i ja'bilel, yom jiñi tsa' bʌ ajñi yic'ot i ñoxi'al ti xuc'ul.

¹⁰ Yom mi' tsictiyel ti' tojlel i pi'ʌlob mi añ wen bʌ i melbal: Mi tsi' cosa i yalobilob, mi tsi' cha'le p'untaya, mi tsi' pocbeyob i yoc i cha'año' bʌ Dios, mi tsi' colta jiñi tsa' bʌ i tajayob wocol, mi tsi' yʌc'ʌ i bʌ ti pejtelel wen bʌ i melbal.

¹¹ Pero mach a chucben i c'aba' ti juñ jiñi xch'oc to bʌ me'ba' x'ixicob, come che' mi' jac'ob chuqui yomob i pusic'al, mi' tʌts'ob i bʌ ti Cristo, mi caj i mulañob i cha'yajlel ñujpuñijel,

¹² che' jiñi mi' tajob i mul, che' mi' jemob i t'añ tsa' bʌ i ñaxan su'buyob ti' tojlel Cristo.

¹³ Yic'ot ja'el mi' ñʌm-añob ti buchtʌl, mi' pam ñumelob ti jula'; mach cojic jach mi' ñʌm-añob ti buchtʌl, pero mi' cha'leñob jop't'añ ja'el, mi yotsañob i bʌ ba' mach i wentajobic, mi' cha' alob chuqui mach yomix chʌn alol.

¹⁴ Jiñi cha'añ, yom mi' cha' cha'leñob ñujpuñijel jiñi xch'oc to bʌ me'ba' x'ixicob, la' i cosañob i yalobil, la' i cʌntañob i yotot; che' jiñi, mach mejlic i wis wajleñonla laj contra.

¹⁵ Come lamital tsa'ix i cha' sutq'uiyob i bʌ i tsajcañob Satanás.

¹⁶ Mi añ me'ba' x'ixic ti' wenta juntiquil xñopt'añ, la' i coltañ, che' jiñi ma'añic mi' yochel ti' wenta pejtelel jiñi xñopt'añob mu' bʌ i tempañob i bʌ, jasʌl che' mi' coltañob jiñi mero me'ba' x'ixicob.

¹⁷ Jiñi ancianojob mu' bʌ i cha'leñob i ye'tel ti uts'at, yom mi' q'uejlelob ti wen ñuc, pero ñumen to jiñi mu' bʌ i cha'leñob e'tel ti subt'añ yic'ot ti cʌntesa.

¹⁸ Come i Ts'ijbujel Dios mi' yʌl: “Mach ma' cʌchben i yej tat wacax che' woli' t'uchtʌben loq'uel i wut trigo”, Mi' yʌl ja'el: “Yom mi' yʌq'uentel i tojol jiñi x'e'tel ti uts'at”. che'en.

¹⁹ Mach a ñop t'añ ti' contra anciano, cojach mi añ cha'tiquil o uxtiquil testigojob.

²⁰ Jiñi mu' bʌ i chʌn cha'leñob mulil, tiq'uiyob ti' tojlel pejtelel hermañujob, cha'añ che' jiñi mi' cajelob ti bʌq'uen jiñi yaño' bʌ.

²¹ Ti' tojlel Dios yic'ot lac Yum Jesucristo, yic'ot yajcʌbilo' bʌ i yángelob, mic su'beñet ti mandar cha'añ ma' jac' ili cʌntesa ti toj, mach yomic jelchojc ma' cha'len c'uxbiya.

²² Mach a bʌc' wa'chocon wiñic ti' ye'tel lac Yum, mach a wotsan a bʌ ba' woli' cha'leñob mulil yaño' bʌ. Chʌcʌ q'uele a bʌ cha'añ chʌn sʌquet.

²³ Mach cojic jach ja' yom ma' chʌn jap, pero japʌ ts'ita' vino cha'añ a ñʌc', come ca'bʌl mi' tajet c'am-ʌjel.

²⁴ Añ mu' bʌ i pʌjyelob ti meloñel come tsiquil i mul ti' wut pejtelelob, pero yaño' bʌ mach bʌ tsiquilic i mul mi caj i tojob ti wi'il bʌ q'uiñ.

²⁵ Che' ja'el, jiñi wen bʌ lac melbal ora mi' tsictiyel; jiñi mach bʌ añic mi' bʌc' tsictiyel, mach ti pejtelic ora mi' mujquel.