1 Timoteo 4 - Jiñi Tsiji' bʌ Wen T'añ cha'añ Estudio

I wʌn tsictesʌntel jiñi leco bʌ cʌntesa

¹ Jiñi Espíritu mi' cʌntesañonla, cha'añ añ lamital mu' bʌ caj i cha' cʌy i ñopob jiñi wen t'añ ti wi'il bʌ q'uiñ, mi caj i jac'beñob espíritujob mu' bʌ i cha'leñob lot yic'ot i cʌntesa xi'bajob.

² Mi' caj i jac'beñob wiñicob cha'chajpob jax bʌ i pusic'al yic'ot xlotob, come chʌmeñob i pusic'al ti mulil.

³ Mi' lon tic'ob ñujpuñijel yic'ot ja'el i c'uxol we'elʌl tsa' bʌ i mele Dios cha'añ mi' c'uxob jiñi xñopt'añob mu' bʌ i cʌñob isujmlel, mu' bʌ i su'beñob Dios wocolix i yʌlʌ.

⁴ Come uts'atʌch pejtelel tsa' bʌ i mele Dios. Mach yomic mi lac ch'ajban, yom tijicña mi laj c'ux mi tsa'ix lac su'be Dios wocolix i yʌlʌ;

⁵ come sʌc-esʌbilix che' mi lac ch'ʌm yic'ot i t'añ Dios yic'ot oración.

Juntiquil wen bʌ x'e'tel ti Jesucristo

⁶ Mi woli' a su'beñob hermañujob ili cʌntesa, che' jiñi xuc'ul bʌ x'e'telet i cha'añ Jesucristo, mʌc'lʌbilet ti jiñi wen t'añ tsa' bʌ a ñopo yic'ot wen bʌ cʌntesa tsa' bʌ a tsajca.

⁷ Mach ma' ñopben i sajtemal la' ñojte'elob yic'ot i tsucul t'añ, come sojquem jax. Chajpan a pusic'al cha'añ ch'ujul ma' wajñel,

⁸ come mi lac taj ts'ita' lac wenlel che' mi laj cʌntan lac bʌc'tal, pero ca'bʌl mi lac taj che' ch'ujul mi la cajñel, come añ xuc'ul bʌ i t'añ cha'añ mi' coltañonla wʌle yic'ot ti jiñi tal to bʌ ora.

⁹ Xuc'ulʌch ili t'añ, yom mi' ñopob ti' pejtelelob.

¹⁰ Jiñi cha'añ woliyonla ti wersa e'tel anquese yic'ot wocol, come woli lac pijtan jiñi cuxul bʌ Dios, i Yaj Coltaya pejtelel wiñicob, pero mero i cha'añob jiñi woli bʌ i ñopob.

¹¹ Cha' cʌntesan ti mandar jiñi woli bʌ c su'beñet.

¹² Mach a wʌc' a bʌ ti ts'a'lentel ti' tojlel wiñicob cha'añ ch'itoñ wiñiquet to, pʌsbeñob ti a melbal bajche' yom mi' cha'leñob t'añ xñopt'añob, yic'ot bajche' yom mi' yajñelob ti uts'at yic'ot c'uxbiya ti jump'ejl jach i pusic'al, yic'ot i xuc'tʌlel i pusic'al ti Cristo, yic'ot i sʌclel i pusic'al.

¹³ Chʌn pejcʌbeñob i ts'ijbujel Dios, chʌn cha'len subt'añ yic'ot cʌntesa jinto mij c'otel.

¹⁴ Wen cʌntan a c'ʌjñibal tsa' bʌ aq'uentiyet che' bajche' wʌn albil, jiñʌch che' bʌ tsi' yʌc'ʌyob i c'ʌb ti a jol jiñi ancianojob.

¹⁵ Chʌn mele a we'tel; yom bʌxet ti' melol cha'añ mi' laj q'uelob uts'at woli a wajñel.

¹⁶ Cʌntan a bʌ, chʌn cha'len cʌntesa ti toj; chʌn ajñen ti isujmlel, come che' jiñi mi caj a coltañ a bʌ yic'ot jiñi mu' bʌ i yu'biñob a t'añ.