1 Timoteo 3 - Jiñi Tsiji' bʌ Wen T'añ cha'añ Estudio

Che' bajche' yom jiñi mu' bʌ i melob i ye'tel lac Yum

¹ Xuc'ulʌch ili t'añ: Mi añ majqui yom i ye'tel ti xcʌntaya, woli' mulan wen bʌ e'tel.

² Mach yomic mi' tajbentel i sajtemal ti' t'añ yic'ot ti' melbal jiñi xcʌntaya, yom juntiquil jach i yijñam, yom mi' wen ña'tan pañimil, yom mi' tic' i bʌ, yom mi' mel chuqui toj, yom mi' ch'ʌm ti uts'at i jula' ti yotot, yom mi' wen cha'len cʌntesa;

³ mach yomic mi' mulan vino, mach yomic mi' jats' i pi'ʌlob, mach yomic mi' mulan taq'uiñ mach bʌ tilemic ti toj bʌ e'tel, yom uts i pusic'al, mach yomic mi' cha'len leto, mach yomic i ts'i'lel i wut cha'añ chu'bʌañʌl;

⁴ yom mi' cʌntan ti uts'at jiñi año' bʌ ti yotot, yom mi' ju'sʌbeñob i pusic'al i yalobilob cha'añ mi' yajñelob ti toj, cha'añ mi' p'isob ti' wenta i tat;

⁵ jiñi mach bʌ yujilic i cʌntan ti uts'at jiñi año' bʌ ti' yotot, ¿bajche' mi mejlel i cʌntan xñopt'añob i cha'año' bʌ Dios?

⁶ Mach yomic mi' yochel tsiji' bʌ hermano ti xcʌntaya, ame i chañ-esan i bʌ, che' jiñi mi' taj i mul che' bajche' tsi' taja i mul xi'ba che' bʌ tsi' chañ-esa i bʌ ti' tojlel Dios.

⁷ Che' ja'el yom mi' pʌs uts'at bʌ i melbal ti' tojlel jiñi mach bʌ xñopt'añobic, cha'añ ma'añic mi' q'uejlel ti lolom, che' ja'el ame yajlic ti' yac xi'ba.

Che' bajche' yilal yom jiñi diáconojob

⁸ Che' ja'el jiñi diáconojob, mu' bʌ i cha'leñob i ye'tel ti' tojlel xñopt'añob, yom tojob i melbal, mach yomic cha'chajpob i t'añ, mach yomic mi' mulañob ca'bʌl vino, mach yomic mi' mulan taq'uiñ mach bʌ tilemic ti toj bʌ e'tel;

⁹ yom ti' sʌclel i pusic'al mi' cʌntañob isujmlel mach bʌ tsictiyemic ti yam bʌ ora woli bʌ lac ñop.

¹⁰ Yom ñaxan mi' q'uejlel mi xuc'ulobʌch, mi ma'añic i mul, che' jiñi, la' i cha'leñob i ye'tel ti' tojlel xñopt'añob come ma'añic chuqui mi' tajbentelob ti t'añ.

¹¹ Che' ja'el i yijñamob, yom mi' yajñelob ti toj, mach yomic mi' cha'leñob jop't'añ, yom mi' wen ña'tañob pañimil, yom xuc'ulob ti pejtelel i melbal.

¹² Jiñi diáconojob yom juntiquil jach i yijñam, la' i cʌntan ti uts'at i yalobilob yic'ot i yotot.

¹³ Come jiñi mu' bʌ i melob i ye'tel ti uts'at, ca'bʌl mi' chobejtañob i ñuclel, che' ja'el mi' yutsi p'ojlel i xuc'tʌlel i pusic'al ti jiñi wen t'añ mu' bʌ lac ñop ti Cristo Jesús.

I ña'tʌbal Dios mach bʌ tsictiyemic ti yam bʌ ora

¹⁴ Woli c ts'ijbubeñet ili t'añ, anquese añ c pijtaya cha'añ mij c'otel ti ora ba'añet,

¹⁵ mi tsa' jal-ayon, mux i mejlel a ña'tan bajche' yom ma' wajñel ti' yotot Dios, jiñobʌch jiñi xñopt'añob i cha'año' bʌ jiñi cuxul bʌ Dios. Jiñi xñopt'añob jiñʌch i cucujlel yic'ot i yoyel i yotot Dios ba' mi' tsictiyel isujmlel.

¹⁶ Isujm wen ñuc laj cʌntesʌntel ti Dios mach bʌ tsictiyemic ti yam bʌ ora: Dios tsi' pʌsʌ i bʌ ti' bʌc'tal che' bajche' wiñic, tsa' pʌsle ti toj cha'añ jiñi Espíritu, tsa' q'uejli ti' wut ángelob, tsa' sujbi i c'aba' ti' tojlel gentilob, tsa' ñojpi ti pejtelel pañimil, tsa' pʌjyi letsel ti panchan.