1 Timoteo 2 - Jiñi Tsiji' bʌ Wen T'añ cha'añ Estudio

Che' bajche' yom melol oración

¹ Ñaxan mic xic'beñetla, c'ajtibenla Dios chuqui tac añ to yom la' cha'añ, cha'lenla oración, pejcʌbenla Dios wiñicob x'ixicob, su'benla Dios wocolix i yʌlʌ cha'añ pejtelelob,

² melbenla oración yumʌlob yic'ot pejtelel año' bʌ i ye'tel, cha'añ ñʌch'ʌl mi la cajñel ti' tijicñʌyel lac pusic'al, ti wen ch'ujul yic'ot ti wen toj.

³ Come jiñʌch uts'at bʌ. Che'ʌch yom Dios, la Caj Coltaya,

⁴ come yom i coltañ pejtelel wiñicob x'ixicob, yic'ot cha'añ mi' cʌmbeñob isujmlel.

⁵ Come juntiquil jach Dios yic'ot juntiquil jach la caj ñusa t'añ ti' tojlel Dios, jiñʌch jiñi wiñic Cristo Jesús,

⁶ tsi' yʌc'ʌ i bʌ cha'añ mi' mʌn pejtelel año' bʌ ti pañimil, jiñʌch i ye'tel tsa' bʌ ajq'ui ti cʌjñel che' ti' yorajlel.

⁷ Jiñi cha'añ tsa' wa'chocontiyon ti subt'añ yic'ot chocbilon majlel ti subt'añ (isujm chuqui woli c su'b come añon ti Cristo, mach c lotic). Xcʌntesajon ti' tojlel jiñi gentilob cha'añ mi' cʌñob isujmlel, yic'ot cha'añ mi' ñopob Dios.

⁸ Jiñi cha'añ, com mi' melob oración wiñicob baqui jach añob, la' i letsañob i c'ʌb ti' sʌclel i pusic'al, mach yomic mich'ajel mi leto.

⁹ Che' ja'el jiñi x'ixicob la' i xojob i pislel bajche' yom, mach cha'añic mi' pʌsob i bʌ ti' tojlel wiñicob; i p'isol jach yom mi' ch'ʌlob i bʌ, mach yomic ñumen ti p'is mi' ch'ʌlob i jol, mach yomic ñumen ti p'is mi' ch'ʌlob i bʌ ti oro, mi ti jiñic c'ax letsem bʌ i tojol ujʌl, mi jiñic ti c'ax letsem bʌ i tojol pisil,

¹⁰ pero la' i pʌsob wen bʌ i melbal che' bajche' yom, come jiñʌch mero i ch'ʌjlil x'ixicob mu' bʌ i pʌsob cha'añ ochemob ti Dios.

¹¹ Jiñi x'ixicob, la' i yu'biñob i cʌntesʌntel ti ñʌch'ʌl, la' i melob i bʌ ti pec'.

¹² Mach comic mi' cha'len cʌntesa jiñi x'ixicob, mach yomic mi' cha'leñob yumʌntel ti' tojlel wiñicob, pero yom ñʌch'ʌl mi' yajñelob x'ixicob.

¹³ Come ñaxan tsa' mejli Adán, wi'il jiñi Eva;

¹⁴ Adán mach ñaxañic tsa' lotinti, pero jiñi x'ixic ñaxan tsa' lotinti, che'ʌch tsi' ñusʌbe i t'añ Dios.

¹⁵ Pero mi caj i coltʌntelob x'ixicob cha'añ ti' yʌc'ol alʌlob ti pañimil, mi xuc'ul mi' chʌn ñopob, mi xuc'ulob ti' c'uxbiya, mi ch'ujulob, mi ma'añic mi' chañ-esañob i bʌ.