1 Timoteo 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Pablojon, apóstolon i cha'añ Jesucristo, cha'añ ti' mandar Dios jiñi la caj Coltaya yic'ot lac Yum Jesucristo, jiñi woli bʌ lac pijtan,

² mic ts'ijbubeñet ili juñ, Timoteo, mero calobilet ti' t'añ Dios: La' aq'uentiquet i yutslel a pusic'al ch'oyol bʌ ti Dios lac Tat yic'ot ti Cristo Jesús jiñi lac Yum.

I yʌxtesʌbentelob i yoj cha'añ leco bʌ cʌntesa

³ Che' bʌ tsa' majliyon ti Macedonia, tsa' c su'beyet ti wocol t'añ cha'añ ma' cʌytʌl ya' ti Éfeso, tsa' c su'beyet cha'añ ma' tic' jiñi woli bʌ i techob leco bʌ cʌntesa,

⁴ su'beñob cha'añ ma'añic mi' chʌn ñopob i sajtemal i ñojte'elob yic'ot i juñilel i c'aba' tac i ñojte'elob mu' bʌ i yʌc'ob ti cʌlʌx t'añ, mach mejlic i wis coltañob cha'añ mi' tajob i bijlel Dios ba' mi' coltʌntel jiñi mu' bʌ i ñopob.

⁵ Che'ʌch woli c su'b cha'añ com mi' ñopob c'uxbiya mu' bʌ i p'ojlel che' sʌc lac pusic'al, che' ma'añic woli ti t'añ che' woli lac ñop Dios ti jump'ejl lac pusic'al,

⁶ pero lamital tsi' cʌyʌyob chuqui wen, cha'añ mi' cha' ñopob lolom jach bʌ t'añ,

⁷ yomob ochel ti xcʌntesa mandar, pero ma'añic mi' ch'ʌmbeñob isujm chuqui woli' yʌlob mi chuqui woli' cʌntesañob.

⁸ La cujil cha'añ jiñi mandar uts'atʌch, mi woli' c'ʌjñel ti toj;

⁹ la cujil, ma'añic tsa' ts'ijbunti jiñi mandar cha'añ mi' tijq'uelob jiñi toj bʌ wiñicob, pero tsa' ts'ijbunti cha'añ mi' tijq'uelob jiñi xñusa mandarob yic'ot xñusa t'añob yic'ot xñusa Diosob yic'ot xmulilob yic'ot xjontolilob yic'ot xp'ajoñelob, jiñi mu' bʌ i tsʌnsañob i tat, i ña' yic'ot i pi'ʌlob,

¹⁰ jiñi mu' bʌ i cha'leñob ts'i'lel yic'ot jiñi mu' bʌ i wʌlʌc pi'leñob i bʌ yic'ot jiñi mu' bʌ i xujch'iñob wiñicob x'ixicob yic'ot xlotob yic'ot xjop't'añob yic'ot yaño' bʌ woli jach bʌ i ñusañob jiñi toj bʌ cʌntesa,

¹¹ come che'ʌch mi' yʌl ti jiñi wen t'añ tsa' bʌ aq'uentiyon tic wenta, ch'oyol bʌ ti Dios am bʌ i yutslel.

I ye'tel Pablo

¹² Mic su'ben wocolix i yʌlʌ Cristo Jesús, lac Yum, jiñi tsa' bʌ i p'ʌt-esayon, come tsi' ña'ta xuc'ulon jiñi cha'añ tsi' wa'chocoyon ti ye'tel,

¹³ come ti yam bʌ ora xp'ajoñelon, tsa' j contraji jiñi xñopt'añob yic'ot tsa' c ts'a'leyob; pero tsa' p'untʌntiyon come tsa' c mele jiñi mach bʌ cujilic che' maxto añic tsa' c ñopo Cristo.

¹⁴ C'ax ca'bʌl tsa' ajñi i yutslel i pusic'al lac Yum tic tojlel come che' bʌ tsi' yʌq'ueyon c ñop, tsi' yʌq'ueyon j c'uxbiya ti Cristo Jesús.

¹⁵ Xuc'ul ili t'añ, uts'atʌch cha'añ mi lac jac' ti lac pejtelel: Cristo Jesús tsa' tili wʌ' ti pañimil cha'añ mi' coltañ xmulilob, joñon ñumen xmulilon bajche' yaño' bʌ.

¹⁶ Jiñi cha'añ Jesucristo tsi' p'untayon anquese ñumen xmulilon, cha'añ mi' pʌs i p'untaya ti' tojlel jiñi mu' bʌ caj i ñopob Jesús cha'añ mi' tajob i cuxtʌlel mach bʌ añic mi' jilel.

¹⁷ La' q'uejlic ti ñuc jiñi Rey am bʌ ti pejtelel ora, mach bʌ yujilic chʌmel, mach bʌ tsiquilic ti lac wut, jiñʌch jiñi cojach bʌ Dios am bʌ i ña'tʌbal, la' tsictiyic i ñuclel ti pejtelel ora. Amén.

¹⁸ Calobil Timoteo, che'ʌch woli c su'beñet cha'añ ma' cha'len wen bʌ guerra, cha'añ mi' ts'ʌctiyel chuqui tsa' wʌn ajli ti a tojlel.

¹⁹ Chʌn ñopo lac Yum, jac'ʌ jiñi toj bʌ t'añ am bʌ ti a pusic'al, lamital ma'añic tsi' jac'ʌyob i tic'ol i pusic'al, jiñi cha'añ tsi' cʌyʌ i ñopob, tsa' sajtiyob,

²⁰ jiñobʌch Himeneo yic'ot Alejandro, tsa'ix cʌc'ʌyob ti' wenta Satanás, cha'añ ma'añic mi yʌc'ob ti p'ajtʌl i c'aba' Cristo.