1 Tesalonicenses 5 - Jiñi Tsiji' bʌ Wen T'añ cha'añ Estudio

¹ Hermañujob, mach mejlic c laj ts'ijbubeñetla baqui bʌ ora, baqui bʌ q'uiñ mi' caj ti ujtel,

² come jatetla la' wujilix cha'añ mi caj i tilel i q'uiñilel lac Yum che' bajche' xujch' ti ac'ʌlel;

³ ba' ora mi' yʌlob: “Ñʌch'ʌlix pañimil, ma'añic tsiquil bʌbʌq'uen bʌ”, che' jiñi ti jim bʌ ora mi caj i bʌc' jisʌntelob, lajal che' bajche' mi' bʌc' tejchel ti bajq'uel x'ixic cʌntʌbil bʌ i yalobil, mach mejlicob ti puts'el.

⁴ Pero jatetla, hermañujob, ma'añetixla ti ac'ʌlel, jiñi cha'añ, mach mejlic i tajetla i q'uiñilel lac Yum che' bajche' xujch'.

⁵ Come ti la' pejtelel añetla ti' sʌclel pañimil, i cha'añetla i sʌclel; ma'añetixla ti ac'ʌlel mi ti ic'yoch'an bʌ pañimil.

⁶ Jiñi cha'añ, mach yomic mi lac cha'len wʌyel che' bajche' yaño' bʌ, yom ch'ejlonla, yom yʌxʌl la co.

⁷ Come jiñi muc'o' bʌ ti wʌyel mi' wʌyelob che' ti ac'ʌlel, jiñi muc'o' bʌ ti yʌc'ʌjel mi' yʌc-añob ti ac'ʌlel.

⁸ Pero ñumeñix ac'ʌlel, añoñixla ti q'uiñil, jiñi cha'añ yom yʌxʌl la coj, la' lac xuc'chocon lac pusic'al ti jiñi woli bʌ lac ñop yic'ot c'uxbiya ame i tajonla laj contra, la' lac p'is ti' wenta laj coltʌntel woli bʌ lac pijtan ame cajiconla ti tsic pusic'al;

⁹ come Dios ma'añic tsi' yajcayonla cha'añ mi' yotsañonla ti' mich'ajel, pero tsi' yajcayonla cha'añ mi' yʌq'ueñonla laj coltʌntel ti lac Yum Jesucristo,

¹⁰ Jesús tsa' chʌmi cha'añonla cha'añ mi lac tem ajñel yic'ot, mi cuxulontola, o mi chʌmeñoñixla.

¹¹ Jiñi cha'añ, ñuq'uesʌben la' bʌ la' pusic'al, p'ʌt-esʌben la' bʌ la' pusic'al ti uts'at che' bajche' woli la' mel.

Pablo mi' xic'ben hermañujob

¹² Jiñi cha'añ, ti wocol t'añ mic su'beñet lojon hermañujob, cha'añ mi la' q'uel ti ñuc jiñi mu' bʌ i cha'leñob i ye'tel lac Yum ti la' tojlel, jiñi mu' bʌ i cʌntañetla ti lac Yum, yic'ot jiñi mu' bʌ i tiq'uetla.

¹³ Yom wen ñuc mi la' chʌn q'uelob yic'ot la' c'uxbiya, come woli' cha'libeñob i ye'tel lac Yum. Yom ñʌch'ʌl mi la' wajñel.

¹⁴ Mic su'beñet lojon ja'el, hermañujob, tiq'uila jiñi mu' bʌ i to'ol ñusañob q'uiñ ti t'añ, ñuq'uesʌbeñob i pusic'al jiñi c'uño' bʌ, coltañla jiñi mach bʌ añobic i p'ʌtʌlel, cuchbenla i sajtemal pejtelel wiñicob.

¹⁵ Q'uele la' bʌ cha'añ ma'añic mi la' q'uextan jontolil; yom mi la' chʌn mel chuqui uts'at yic'ot la' pi'ʌlob yic'ot pejtelel yaño' bʌ.

¹⁶ Chʌn tijicñesan la' pusic'al.

¹⁷ Chʌn cha'lenla oración.

¹⁸ Su'benla Dios wocolix i yʌlʌ cha'añ pejtelel chuqui jach mi' yujtel, come che'ʌch yom Dios ti Cristo Jesús.

¹⁹ Mach mi la' yʌp jiñi Espíritu.

²⁰ Mach mi la' q'uel ti lolom chuqui tac mi' su'bob jiñi x'alt'añob.

²¹ Yom mi la' wen ña'tan mi jiñʌch mero isujm bʌ woli bʌ ti sujbel; ts'ijbanla cʌytʌl ti la' pusic'al jiñi uts'at tac bʌ.

²² Mach yomic mi la' ñop jontolil mi junchajpic.

²³ Jiñi Dios mu' bʌ i yʌq'ueñonla i ñʌch'tʌlel lac pusic'al la' i laj sʌc-esañetla; la' cʌntʌntic la' ch'ujlel yic'ot la' pusic'al yic'ot la' bʌc'tal cha'añ ma'añic la' mul che' mi' tilel lac Yum Jesucristo.

²⁴ Jiñi woli bʌ i pʌyetla xuc'ulʌch, mi caj i mel che' bajche' mi' yʌl.

I YUJTIBAL: I YUTSLEL I T'AÑ ( 5.25-28 )

²⁵ Hermañujob, cha'lenla oración cha'añon lojon.

²⁶ Aq'uenla cortesía yic'ot ts'ujts'uya ti' sʌclel la pusic'al pejtelel la quermañujob.

²⁷ Mic xic'beñetla ti lac Yum, cha'añ mi la' pejcʌbeñob ili juñ pejtelel hermañujob i cha'año' bʌ Dios.

²⁸ La' ajñic la' wic'ot i yutslel i pusic'al lac Yum Jesucristo ti la' pejtelel. [Amén.]