1 Tesalonicenses 4 - Jiñi Tsiji' bʌ Wen T'añ cha'añ Estudio

2. XIC'OJEL TI' CHAJP TI' CHAJP ( 4.1—5.24 ) Lac melbal mu' bʌ i mulan Dios

¹ Wʌle, hermañujob, mic su'beñetla ti wocol t'añ yic'ot mic xic'beñetla ti lac Yum Jesús, cha'añ mi la' wajñel che' bajche' tsa' j cʌntesayetla che' bajche' yom Dios, cha'añ mi la' chʌn cha'len wersa la' mel che' bajche' woli la' mel wʌle.

² Come la' wujilix bajche' yom mi la' wajñel che' bajche' tsa' c su'beyet lojon ti lac Yum Jesús.

³ Yom Dios mi la' sʌc-esʌntel, mach yomic mi la' cha'len ts'i'lel;

⁴ ti jujuntiquiletla yom mi la' ña'tan bajche' yom mi la' pʌy la' wijñam ti' sʌclel la' pusic'al yic'ot c'uxbiya;

⁵ mach yic'otic i colosojlel la' pusic'al che' bajche' jiñi sajtemo' bʌ mach bʌ añic mi' ñopob Dios;

⁶ mach yomic mi la' lotin la' pi'ʌlob mi ts'ita'ic yic'ot mach yomic mi la' pʌc' ti mulil, come lac Yum mi' yʌq'ueñ i toj i mul pejtelel mu' bʌ i melob bajche' jiñi che' bajche' tsa'ix c su'beyet lojon.

⁷ Ma'añic tsi' pʌyʌyonla Dios cha'añ mi la cajñel ti lac bi'bi'lel, tsi' pʌyʌyonla cha'añ mi lac sʌc-esʌntel.

⁸ Jiñi cha'añ, majqui jach mi' ñusan ili mandar, mach wiñiquic woli' ts'a'len, pero woli' ts'a'len Dios mu' bʌ i yʌq'ueñonla Ch'ujul bʌ Espíritu.

⁹ Mach wersajic mic ts'ijbubeñetla bajche' yom mi la' c'uxbin la' bʌ, come cʌntesʌbiletla i cha'añ Dios cha'añ mi la' c'uxbin la' bʌ;

¹⁰ che'ʌch, woli la' c'uxbin ja'el jiñi hermañujob ti pejtelel Macedonia. Pero ti wocol t'añ mic su'beñet lojon, hermañujob, la' chʌn p'ojlic majlel la' c'uxbiya;

¹¹ cha'lenla wersa cha'añ ñʌch'ʌl mi la' wajñel, yom bʌxetla ti' melol la' we'tel ti jujuntiquiletla, cha'lenla e'tel ti la' c'ʌb che' bajche' tsa' c su'beyet lojon,

¹² cha'añ toj mi la' pʌsben majlel yaño' bʌ, che' jiñi ma'añic chuqui añ to yom la' cha'añ.

Che' mi' cha' tilel lac Yum

¹³ Hermañujob, com lojon cha'añ mi la' ch'ʌmben isujmlel jiñi mu' bʌ i chʌmelob, cha'añ che' jiñi ma'añic mi la' mel la' pusic'al che' bajche' yaño' bʌ mach bʌ añobic i pijtaya.

¹⁴ Mi muc'ʌch lac ñop cha'añ Jesús tsa' chʌmi yic'ot tsa' ch'ojyi, che' jiñi, Dios mi caj i cha' pʌy tilel yic'ot Jesús, jiñi tsa' bʌ chʌmiyob ti Jesús.

¹⁵ Jiñi cha'añ woli c su'beñet lojon yic'ot i T'añ lac Yum: Joñonla cuxulonto bʌ la, mi wʌ' to añonla che' mi' cha' tilel lac Yum, mach ñaxañoñicla mi caj lac letsel majlel ti' tojel i wut jiñi chʌmeño' bʌ.

¹⁶ Come jiñi lac Yum mi caj i ju'bel tilel ti panchan mi caj i yʌc' mandar, jiñi ñuc bʌ ángel mi' cajel ti t'añ, mi caj i yu'bintel i trompeta Dios; ñaxan mi caj i ch'ojyelob jiñi chʌmeño' bʌ i cha'año' bʌ Cristo.

¹⁷ Ti wi'il joñonla cuxulonto bʌ la wʌ' ti pañimil mi caj lac tem letsel majlel la quic'ot jiñi tsa' bʌ chʌmiyob, ya' ti tocal mi caj lac majlel lac taj lac Yum, che' jiñi mi caj la cajñel yic'ot lac Yum ti pejtelel ora.

¹⁸ Jiñi cha'añ, tem ñuq'uesʌben la' bʌ la' pusic'al yic'ot ili t'añ.