1 Tesalonicenses 3 - Jiñi Tsiji' bʌ Wen T'añ cha'añ Estudio

¹ Ca'bʌl tsa' c mele c pusic'al cha'añ com cu'bin bajche' añetla, jiñi cha'añ tsa' c ña'ta j cʌytʌl tic bajñelil ya' ti Atenas,

² tsa' c choco majlel la quermañu Timoteo, x'e'tel i cha'añ Dios, c pi'ʌl lojon ti e'tel cha'añ i wen t'añ Cristo, tsa' c choco majlel cha'añ mi' xic'beñetla, yic'ot cha'añ mi' xuc'chocoñetla ti jiñi tsa' bʌ la' ñopo,

³ ame añic majqui mi' cajel ti wulwul t'añ i pusic'al cha'añ jiñi wocol woli bʌ la' ñusan; jatetla la' wujil cha'añ i tilelʌch mi la cu'bin wocol che' bajche' tsi' wʌn ña'ta Dios.

⁴ Che' bʌ ya'añon lojon la' wic'ot, tsa' c wʌn su'beyet lojon wersa mi caj lac ñusan wocol, che'ʌch tsa' ujti bajche' tsa' cʌlʌ lojon, ña'tʌbilʌch la' cha'añ.

⁵ Jiñi cha'añ ma'añic tsa' mejli c chʌn pijtan la' t'añ, tsa' c choco majlel juntiquil cha'añ mi cu'bin mi xuc'ul woli la' ñop, ame tsa'ic i xiq'uiyetla ti mulil jiñi xi'ba, ame lolomic jach que'tel lojon ti la' tojlel.

⁶ Che' bʌ tsa' cha' juli Timoteo ba'añon lojon, tsi' su'beyon lojon cha'añ xuc'ul woli la' ñop, woli la' c'uxbin la' bʌ, woli la' chʌn ña'tañon lojon ja'el ti uts'at, la' womix la' cha' q'uelon lojon che' bajche' com c cha' q'uelet lojon ja'el,

⁷ jiñi cha'añ, hermañujob, anquese añ c wocol lojon yic'ot c tic'lʌntel lojon, tsa' tili i ñuclel c pusic'al lojon che' bʌ tsa' cu'bi lojon cha'añ xuc'ul woli la' ñop;

⁸ wʌle tijicñayon lojon come xuc'ul woli la' wajñel ti lac Yum.

⁹ Jiñi cha'añ ca'bʌl mic su'ben lojon Dios wocolix i yʌlʌ cha'añetla, come tsa'ix ñumi ti p'is i tijicñʌyel lojon c pusic'al woli bʌ cu'bin lojon cha'añetla ti' tojlel Dios,

¹⁰ woli c chʌn cha'len lojon oración ti q'uiñil yic'ot ti ac'ʌlel ti jump'ejl lojon c pusic'al cha'añ mi mejlel c cha' tilel j q'uelet lojon, cha'añ mij cʌntesañet lojon ti chuqui tac añ to yom mi la' ñop.

¹¹ Wʌle la' i chajpʌbeñon lojon c bijlel Dios lac Tat yic'ot lac Yum Jesucristo, cha'añ mic tilel lojon ba'añetla.

¹² La' i yʌq'uetla ti colel lac Yum ti la' c'uxbiya yic'ot la' i p'ojlesʌbeñetla la' c'uxbiya cha'añ mi la' wen c'uxbin la' bʌ yic'ot cha'añ mi la' c'uxbin yaño' bʌ ja'el che' bajche' woli j c'uxbiñet lojon.

¹³ Che' jiñi, lac Yum mi caj i xuc'chocon la' pusic'al cha'añ ma'añic mi' tajtʌl mulil ti la' tojlel, cha'añ ch'ujul mi la' wajñel ti' tojlel Dios lac Tat che' mi' tilel lac Yum Jesucristo yic'ot pejtelel i cha'año' bʌ Dios. Amén.