1 Tesalonicenses 2 - Jiñi Tsiji' bʌ Wen T'añ cha'añ Estudio

1. I YE'TEL PABLO YA' TI TESALÓNICA ( 2.1—3.13 ) I chʌn ña'tʌntel

¹ Come la' wujil hermañujob, mach lolomic jach tsa' c jula'tayet lojon.

² Anquese tsa' c ñaxan u'bi lojon wocol yic'ot tic'lʌntel ya' ti Filipos, pero ch'ejlon lojon ti Dios, tsa' c su'beyetla i wen t'añ anquese añ ca'bʌl j contrajintel lojon.

³ Che' bʌ tsa' c xic'beyet lojon, mach i sojquemalic mi i bi'bi'lelic c t'añ lojon, mach lotic woliyon lojon.

⁴ Dios tsi' q'ueleyon lojon ti uts'at che' bʌ tsi' yʌq'ueyon lojon que'tel cha'añ jiñi wen t'añ, jiñi cha'añ mic su'b lojon; ma'añic woli c sʌclan lojon j c'uxbintel ti' tojlel wiñicob, cojach ti' tojlel Dios, come jiñʌch mu' bʌ i q'uelbeñon lojon c pusic'al.

⁵ Come ña'tʌbil la' cha'añ ma'añic tsa' c pejcayetla ti' t'ojol jax bʌ t'añ cha'añ mic taj lojon c wenlel ti la' tojlel, ma'añic tsa' c wis tsʌjyu lojon chu'bʌañʌl; testigojʌch Dios tsa' bʌ i q'uelbeyon lojon c melbal.

⁶ Ma'añic tsa' c sʌcla lojon c su'bentel c ñuclel ti wiñicob, mi ti la' tojlelic, mi ti' tojlelic yaño' bʌ, anquese muc'ʌch mejlel j c'ajtin lojon chuqui com lojon, come apóstolon lojon chocbilon lojon majlel ti subt'añ i cha'añ Cristo.

⁷ Pero uts tsa' ajñiyon lojon ti la' tojlel che' bajche' x'ixic mu' bʌ i c'uxbin i yalobilob.

⁸ Che'ʌch tsa' c wen c'uxbiyet lojon che' bʌ tsa' c su'beyet lojon i wen t'añ Dios, mach cojic jach jiñi, pero chajpʌbilon lojon ja'el cha'añ mic tsʌnsʌntel lojon cha'añetla, come wen c'uxbibiletla c cha'añ lojon.

⁹ C'ajal to la' cha'añ, hermañujob, tsa' c cha'le lojon wocol e'tel ti q'uiñil ti ac'ʌlel, cha'añ ma'añic mi' c'ojyel la' mʌc'lañon lojon che' bʌ tsa' c su'beyet lojon i wen t'añ Dios.

¹⁰ Testigojetla bajche' tsa' c mele lojon, testigojʌch Dios ja'el, xuc'ul c melbal lojon, toj ja'el. Ma'añic c mul lojon ti la' tojlel mu' bʌ la' ñop.

¹¹ La' wujil tsa' ajñiyon lojon ti la' tojlel che' bajche' la' tat mu' bʌ i cʌntan i yalobilob, tsa' c xic'beyet lojon, tsa' c ñuq'uesʌbeyetla la' pusic'al ti jujuntiquiletla,

¹² tsa' c xic'beyet lojon cha'añ mi la' wajñel ti uts'at che' bajche' yom Dios tsa' bʌ i pʌyʌyetla ochel ti' yumʌntel ti panchan.

¹³ Jiñi cha'añ joñon lojon ja'el woli c chʌn su'ben lojon Dios wocolix i yʌlʌ, come che' bʌ tsa' la' ñopo i t'añ Dios, tsa' bʌ la' wu'bi tic tojlel lojon, tsa' la' ñopo mach i t'añic wiñicob, pero i t'añʌch Dios woli bʌ i mel i ye'tel ti la' pusic'al xñopt'añet bʌ la.

¹⁴ Jatetla, hermañujob, tsa' caji la' tsajcan jiñi xñopt'añob ti Cristo Jesús, i cha'año' bʌ Dios, mu' bʌ i tempañob i bʌ ti Judea; come lajal tsa' la' wu'bi wocol ti' c'ʌb la' pi'ʌlob che' bajche' jiñi hermañujob ti Judea ti' c'ʌb judíojob,

¹⁵ tsa' bʌ i tsʌnsayob lac Yum Jesús yic'ot x'alt'añob i cha'añ, tsi' chocoyon lojon loq'uel; ma'añic mi' melob mu' bʌ i mulan Dios, woli' contrajiñob pejtelel wiñicob,

¹⁶ jiñi judíojob woli' tic'on lojon ti subt'añ ti' tojlel jiñi gentilob ame coltʌnticob; tsa'ix ñumiyob ti p'is i mul, jiñi cha'añ wolix i yu'biñob i mich'ajel Dios mach bʌ yujilic lajmel.

Che' mach ya'ic añ Pablo ti' tojlel xñopt'añob

¹⁷ Hermañujob, mach jalix mi caj lac cha' q'uel lac bʌ, anquese mach ya'ic añon lojon quic'otetla, pero añetla tic pusic'al lojon, com lojon tilel, come wersa com j q'uel lojon la' wut;

¹⁸ Jiñi cha'añ com lojon majlel ba'añetla, joñon Pablojon, isujm junyajl cha'yajl tsa' c ñopo tilel ba'añetla; pero Satanás tsi' mʌctayon lojon.

¹⁹ Come ¿chuqui c pijt lojon? ¿Chuqui jiñi c tijicñʌyel lojon? ¿Chuqui jiñi c ñuclel lojon? ¿Mach ba jateticla ti' tojlel lac Yum Jesucristo che' mi' tilel?

²⁰ Come c ñuclelet lojon, c tijicñʌyelet lojon.