1 Pedro 4 - Jiñi Tsiji' bʌ Wen T'añ cha'añ Estudio

Uts'at bʌ x'e'tel ti' yutslel Dios

¹ Cristo tsi' cuchu wocol ti' bʌc'tal cha'añonla, jiñi cha'añ yom chajpʌbil la' pusic'al cha'añ mi la' cuch wocol ja'el che' bajche' Cristo. Come majqui jach tsi' cuchu wocol ti' bʌc'tal che' bajche' Cristo tsa'ix i cʌyʌ i mul.

² Jiñi cha'añ ma'añix mi' chʌn jac' i colosojlel i pusic'al che' bajche' yaño' bʌ, come tsa'ix i cʌyʌ tsucul bʌ i pusic'al cha'añ mi' mel bajche' yom Dios mach che'ic bajche' yom i pusic'al.

³ Jasʌlix jiñi q'uiñ tac tsa' bʌ la' ñusa ti' melol mulil che' bajche' jiñi sajtemo' bʌ mu' bʌ i jac'ob i colosojlel i pusic'al yic'ot i ts'i'lel, mi' cha'leñob chuqui jisil yic'ot yʌc'ʌjel yic'ot leco bʌ q'uiñijel, yic'ot lemoñel. Mi' melob leco bʌ i q'uiñilel i dios te' tac.

⁴ Mi' toj sajtelob i pusic'al cha'añ ma'añix woli la' tsajcañob ti jontolil, jiñi cha'añ mi' p'ajetla;

⁵ pero mi caj i melob i bʌ yic'ot Dios jiñi mu' bʌ caj i mel jiñi cuxulo' bʌ yic'ot chʌmeño' bʌ.

⁶ Cha'añ ti' caj iliyi tsa' su'bentiyob jiñi wen t'añ jiñi tsa'ix bʌ chʌmiyob, tsa' chʌmiyob i bʌc'tal che' bajche' mi' chʌmelob pejtelel wiñicob x'ixicob, cha'añ cuxul mi' yajñelob ti espíritu che' bajche' Dios.

3. JIÑI XÑOPT'AÑOB CHE' TI' JILIBAL PAÑIMIL ( 4.7-19 ) Jiñi e'tel ti' tojlel yaño' bʌ

⁷ Lʌc'ʌlix i jilibal pejtelel chuqui tac añ; jiñi cha'añ yom mi la' wen ña'tan pañimil, chʌcʌ q'uele la' bʌ, chʌn cha'lenla oración.

⁸ Jiñi cha'añ, yom mi la' wen c'uxbin la' bʌ; come jiñi ñumen ñuc bʌ jiñʌch che' mi laj c'uxbin lac pi'ʌlob come che' añ laj c'uxbiya mi laj cuch ca'bʌl mulil.

⁹ Pʌyʌla ochel la' pi'ʌlob ti la' wotot, mach yomic mi la' cha'len wulwul t'añ ti' tojlel mi juntiquilic.

¹⁰ Dios tsi' yʌq'ueyetla la' c'ʌjñibal ti jujuntiquiletla ti' yutslel i pusic'al cha'añ mi la' coltañ la' pi'ʌlob, cha'añ mi' tajob i wenlel ti Dios ja'el yic'ot i c'ʌjñibal ti' chajp ti' chajp.

¹¹ Majqui jach mi' cha'len t'añ, la' i cha'len t'añ che' bajche' cʌntesʌbil ti' t'añ Dios. Majqui jach mi' coltañ i pi'ʌlob, la' i coltañob yic'ot i p'ʌtʌlel mu' bʌ i yʌq'ueñ Dios, cha'añ mi' tsictiyel i ñuclel Dios ti Jesucristo ti pejtelel chuqui mi' yujtel. La' tsictiyic i ñuclel yic'ot i p'ʌtʌlel ti pejtelel ora. Amén.

Woli bʌ i tem cuchob i wocol Cristo

¹² C'uxbibilet bʌ la, mach yomic mi' toj sajtel la' pusic'al che' mi' tilel i yilʌbentel la' pusic'al che' bajche' c'ajc. Mach yomic leco mi la' q'uel.

¹³ Tijicñesan la' pusic'al come woli la' taj wocol che' bajche' Cristo, che' jiñi c'ax tijicñajax mi caj la' wu'bin che' mi' tsictiyel i ñuclel Cristo.

¹⁴ Mi woli la' wʌ'lentel cha'añ i c'aba' Cristo, yom tijicñayetla, come woli' yajñel ti la' pusic'al i yEspíritu Dios am bʌ i ñuclel. [Isujm woli' ts'a'leñob Dios jiñi wiñicob pero jatetla woli la' su'b i ñuclel].

¹⁵ Jiñi cha'añ, mach yomic mi la' taj wocol cha'añ ti' melol mulil, mi tsʌnsa, mi xujch' mi i ñusʌntel mandar, mi yam bʌ jontolil. Mach yomic mi la' wotsan la' bʌ ba' mach la' wentajic;

¹⁶ pero mi añ majqui woli yu'bin wocol cha'añ ti' ñopol Cristo, mach i cha'len quisin, la' i su'b i ñuclel Dios cha'añ woli' coltʌntel ti Cristo.

¹⁷ Come i yorajlelix mi' melob i bʌ i cha'año' bʌ Dios; mi ñaxan mi' melonla, ¿bajche' mi caj i yujtelob jiñi mach bʌ añic mi' jac'ob i wen t'añ Dios?

¹⁸ Mi wocol mi' coltʌntelob jiñi toj bʌ wiñicob, ¿bajche' mi caj i yujtelob jiñi xñusa t'añob yic'ot xmulilob?

¹⁹ Jiñi cha'añ, la' i melob chuqui uts'at jiñi mu' bʌ i yu'biñob wocol che' bajche' yom Dios. La' i yʌc'ob i bʌ ti' c'ʌb Dios, jiñi xuc'ul bʌ Xmel pañimil.