1 Pedro 3 - Jiñi Tsiji' bʌ Wen T'añ cha'añ Estudio

Yom bʌ ti' tojlel xñujpuñelob

¹ X'ixicob, yom mi la' wʌc' la' bʌ ti uts'at ti' wenta la' ñoxi'al. Che' jiñi, mi ma'añic mi' ñopob la' ñoxi'al, mi caj i ñopob cha'añ uts'at bʌ la' melbal, mach cha'añic la' t'añ.

² Mi caj i q'uelob toj bʌ la' melbal che' mi la' jac'beñob ti uts'at.

³ Mach mero la' ch'ʌjlilic che' mi la' jal la' jol mi che' mi la' ch'ʌl la' bʌ ti oro yic'ot wen bʌ la' pislel.

⁴ Pero yom i ch'ʌjlil la' pusic'al mach bʌ añic mi' jilel, jiñʌch i yutslel yic'ot i ñʌch'tʌlel la' pusic'al. Jiñʌch c'ax uts'at bʌ ti' wut Dios.

⁵ Come che' ja'el ti oñiyi jiñi ch'ujul bʌ x'ixicob tsa' bʌ i pijtayob i wenlel ti Dios tsi' ch'ʌlʌyob i bʌ ja'el. Tsi' yʌc'ʌyob i bʌ ti uts'at ti' wenta i ñoxi'al.

⁶ Che'ʌch tsi' mele Sara. Tsi' jac'be i t'añ Abraham, tsi' pejca ti' yum. Jatetla i yalobiletla Sara, mi toj mi la' mel, mi ma'añic mi la' bʌc'ñan chuqui mi' yujtel.

⁷ Che' ja'el wiñicob, ajñenla ti uts'at yic'ot la' wijñam. Q'uelela ti ñuc jiñi x'ixic anquese ñumen c'un bajche'etla, pero temel mi la' wʌq'uentel la' cuxtʌlel ti' yutslel i pusic'al Dios. Che'ʌch yom mi la' mel ame mʌctʌyic la' woración.

Jiñi wen bʌ lac ña'tʌbal

⁸ Ti pejteletla yom junlajal la' pusic'al mi la' cha'len p'untaya. C'uxbin la' bʌ che' bajche' la' wijts'in la' bʌ. Yom uts la' pusic'al. Yom mi la' mel la' bʌ ti pec'.

⁹ Mach yomic mi la' q'uextan jontolil, mi a'leya. Yom mi la' wʌq'ueñob i yutslel la' t'añ la' pi'ʌlob, come ña'tʌbil la' cha'añ pʌybiletla cha'añ mi la' wʌq'uentel la' wenlel.

¹⁰ Come ts'ijbubil: “Majqui yom ajñel ti' tijicñʌyel i pusic'al, cha'añ uts'at mi' ñusan q'uiñ, la' i tic' i yac' ti jontolil, la' i tic' i yej ti lot.

¹¹ La' i cʌy jontolil. La' i mel chuqui uts'at. La' i sʌclan i wenlel i pi'ʌlob cha'añ ñʌch'ʌl mi' yajñel yic'otob.

¹² Come lac Yum woli' wen q'uel jiñi tojo' bʌ. Mi' yu'bibeñob i yoración. Pero mi' contrajin jiñi mu' bʌ i melob jontolil”.

¹³ Mi bʌxetla ti' melol chuqui uts'at, ¿am ba majqui mi caj i tic'lañetla?

¹⁴ Pero mi woli la' tic'lʌntel cha'añ ti' melol chuqui toj, yom tijicñayetla. Jiñi cha'añ mach la' cha'len bʌq'uen che' mi' cha'leñob bʌc'tesaya. Mach la' mel la' pusic'al.

¹⁵ Pero chʌn yumanla Cristo ti la' pusic'al. Yom chajpʌbil la' pusic'al ti pejtelel ora cha'añ mi la' su'ben la' pi'ʌlob baqui tilem la' pijtaya che' mi' c'ajtibeñetla. Su'benla ti uts bʌ t'añ yic'ot c'uxbiya.

¹⁶ Ajñenla ti uts'at cha'añ ma'añic mi' tejchel t'añ ti la' pusic'al. Che' jiñi mi caj i yu'biñob quisin la' contrajob mu' bʌ i [pʌq'uetla ti jontolil] che' mi' q'uelob wen bʌ la' melbal ti Cristo.

¹⁷ Mi yom Dios mi la cu'bin wocol, ña'tanla uts'at mi la cu'bin cha'añ wen bʌ lac melbal, mach cha'añic jontolil.

¹⁸ Come Cristo junyajl jach tsi' yu'bi wocol cha'añ mulil. Jiñi toj bʌ tsi' yʌc'ʌ i bʌ ti chʌmel cha'añ jiñi mach bʌ tojobic, cha'añ mi' pʌyonla ti' tojlel Dios. Isujmʌch tsa' tsʌnsʌnti ti' bʌc'tal, pero tsa' cha' cuxtʌyi ti jiñi espíritu;

¹⁹ yic'ot i yespíritu tsa' majli Cristo i su'beñob t'añ jiñi ch'ujlelʌlob ya' ti' yajñib chʌmeño' bʌ.

²⁰ Jiñobʌch sajtemo' bʌ mach bʌ añic tsi' jac'ʌyob ti yam bʌ ora, che' jal tsi' cha'le pijt Dios ti' yorajlel Noé che' bʌ woli to i mel colem barco. Waxʌctiquil jach tsa' coliyob ti ja'.

²¹ Jiñʌch i yejtal che' bajche' mi laj coltʌntel wʌle ti ch'ʌmja'. Ma'añic mi' poc loq'uel i lumil lac pʌchʌlel, pero mi' pʌsonla ti sʌc ti' wut Dios che' ñʌch'ʌl lac pusic'al cha'añ tsa' lac su'bu lac bʌ ti' tojlel Dios. Tsa'ix tejchiyonla ch'ojyel yic'ot Jesucristo.

²² Tsa'ix majli ti panchan ya' ti' ñoj Dios. Jiñi ángelob yic'ot yumʌlob, yic'ot año' bʌ i p'ʌtʌlel, mi' yumañob Jesús.