1 Pedro 2 - Jiñi Tsiji' bʌ Wen T'añ cha'añ Estudio

¹ Jiñi cha'añ cʌyʌla pejtelel la' jontolil yic'ot lotiya yic'ot i cha'chajplel la' pusic'al, yic'ot tsʌytsʌyña bʌ la' pusic'al cha'añ i wenlel la' pi'ʌlob, yic'ot pejtelel u'yaj t'añ.

² Yom lajaletla bajche' alʌl, poj ujtel to bʌ i yilan pañimil, mu' bʌ i c'ajtin i chu'. Che'ʌch yom mi la' c'ajtin la' chu' ti Espíritu mu' bʌ i we'san la' pusic'al ti isujmlel, cha'añ mi la' colel majlel ti la' coltʌntel,

³ mi sumuc tsa' la' wu'bi i yutslel lac Yum.

Jiñi cuxul bʌ Xajlel

⁴ Lʌc'tesan la' bʌ ba'añ Jesús, jiñi cuxul bʌ Xajlel, tsa' bʌ i choco wiñicob, pero Dios tsi' yajca come uts'atax mi' q'uel.

⁵ Jatetla ja'el lajaletla bajche' cuxul bʌ xajlel, woli la' wa'chocontel ti' yotot Dios, ch'ujul bʌ motomajetla i cha'añ Jesucristo cha'añ mi la' wʌq'uen ch'ujul bʌ i majtañ Dios mu' bʌ i mulan.

⁶ Come ts'ijbubil: “Awilan, woli cʌc' ti Sión jump'ejl uts'at bʌ Xajlel, yajcʌbil bʌ cha'añ i xujc otot. Jiñi mu' bʌ i ñop ma'añic mi' cajel ti quisin”, che'en.

⁷ Jatetla mu' bʌ la' ñop jiñi cuxul bʌ xajlel, c'ux mi la' wu'bin Jesús; pero jiñi mach bʌ añic mi' ñopob, mi' ts'ʌctiyel che' bajche' ts'ijbubil: Jiñʌch Xajlel chocbil bʌ i cha'añ jiñi xmel otot. Pero Dios tsi' yotsa ti' xujc otot.

⁸ Ts'ijbubil ja'el: “Jiñʌch Xajlel ba' mi' jats'ob i yoc wiñicob x'ixicob. Jiñʌch Ñuc bʌ Xajlel ba' mi' jats'ob i yoc come ma'añic tsi' jac'ʌyob jiñi wen t'añ”. Che'ʌch tsi' meleyob bajche' tsi' wʌn ña'ta Dios.

I tejclum Dios

⁹ Pero i yalobiletla, yajcʌbiletla. Ñuc bʌ motomajetla ti' tojlel jiñi Rey. Ch'ujul bʌ tejclumetla. I cha'añetla Dios cha'añ mi la' su'b majlel jiñi ñuc tac bʌ i melbal Dios, tsa' bʌ i pʌyʌyetla loq'uel ti ic'yoch'an bʌ pañimil. Tsi' yotsayetla ti' sʌclel i yumʌntel.

¹⁰ Ti yam bʌ ora mach i cha'añeticla Dios, pero wʌle i cha'añetla. Ti yam bʌ ora ma'añic majqui tsi' p'untayetla, pero wʌle tsa'ix i p'untayetla.

2. JIÑI YOM BɅ MI' MEL XÑOPT'AÑOB ( 2.11—4.6 ) Ajñenla che' bajche' x'e'telob i cha'añ Dios

¹¹ C'uxbibilet bʌ la, mic su'beñetla xñumelet jach la ti pañimil, yañʌch bʌ la' lumal, ti wocol t'añ mic su'beñetla cha'añ ma'añic mi la' jac'ben i colosojlel la' pusic'al mu' bʌ i cha'len guerra ti' contra la' ch'ujlel,

¹² pʌsʌ la' bʌ ti uts'at ti' tojlel jiñi gentilob, che' jiñi anquese mi' pʌq'uetla ti jontolil, mi caj i ña'tañob wen bʌ la' melbal che' mi' tsictiyel lac melbal ti lac pejtelel. Mi caj i su'bob i ñuclel Dios.

¹³ Cha'añ ti' caj lac Yum, otsan la' bʌ ti uts'at ti' wenta pejtelel año' bʌ i ye'tel ti la' tojlel, jiñi c'ax ñuc bʌ yumʌl,

¹⁴ yic'ot wiñicob wa'chocobilo' bʌ i cha'añ, cha'añ mi' yʌq'ueñob i toj i mul xjontolilob, yic'ot cha'añ mi' su'beñob i ñuclel jiñi mu' bʌ i melob chuqui wen.

¹⁵ Dios yom cha'añ mi la' mel chuqui wen cha'añ mi la' ñʌch'tesʌbeñob i tontojlel jiñi wiñicob mach bʌ añic mi' ch'ʌmbeñob isujm;

¹⁶ Libre añetla cha'añ mi la' mel chuqui uts'at, mach cha'añic mi la' cha'len mulil, come x'e'teletla i cha'añ Dios.

¹⁷ Q'uelela ti ñuc pejtelel wiñicob x'ixicob. C'uxbin la' wermañujob, bʌc'ñanla Dios, q'uelela ti ñuc jiñi yumʌlob.

¹⁸ X'e'telob, jac'benla i t'añ la' yum, mach cojic jach jiñi uts'ato' bʌ mu' bʌ i c'uxbiñetla pero jiñi tsʌtso' bʌ i t'añ ja'el.

¹⁹ Come uts'at mi' q'uelonla Dios mi uts'at mi laj cuch wocol che' tic'bilonla cha'añ i melol chuqui uts'at, che' ma'añic lac mul.

²⁰ Mi woli la' jajts'el cha'añ la' jontolil, ¿am ba la' ñuclel che' mi la' cuch jiñi wocol? Pero mi woli la' cuch wocol cha'añ i melol chuqui uts'at, Dios mi caj i q'ueletla ti uts'at.

²¹ Come pʌybiletla cha'añ mi la' wu'bin wocol; come Cristo ja'el tsi' yu'bi wocol cha'añonla, tsi' pʌsbeyonla bajche' yom mi lac mel, tsajcanla majlel.

²² Ma'añic tsi' cha'le mulil, ma'añic tsi' cha'le lot.

²³ Che' bʌ tsa' a'lenti, ma'añic tsi' q'uexta a'leya; che' bʌ tsa' aq'uenti wocol, ma'añic tsi' cha'le bʌc'tesaya, pero che' jach tsi' yʌc'ʌ i bʌ ti' wenta jiñi mu' bʌ i cha'len meloñel ti toj.

²⁴ I bajñel jach tsi' cuchu lac mul ti' bʌc'tal che' bʌ tsa' chʌmi ti te', cha'añ mi' jilel i p'ʌtʌlel mulil ti lac tojlel, cuxuloñixla cha'añ mi lac mel chuqui toj. Lajmesʌbiletla cha'añ tsa' lojwi lac Yum.

²⁵ Ti yam bʌ ora tsa' sajtiyetla che' bajche' sajtem bʌ tʌñʌme', pero tsa' la' sutq'ui la' bʌ cha'añ mi la' tsajcan majlel jiñi Xcʌnta tʌñʌme', jiñi Xcʌntaya mu' bʌ i coltañ la' ch'ujlel.