1 Pedro 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-12 ) I yutslel i t'añ

¹ Pedrojon, apóstolon i cha'añ Jesucristo. Mic ts'ijbubeñetla ili juñ, xñumelet jach bʌ la, pujquemet bʌ la ti Ponto, ti Galacia, ti Capadocia, ti Asia yic'ot ti Bitinia.

² Yajcʌbiletla che' bajche' tsi' wʌn ña'ta Dios lac Tat. Jiñi Espíritu woli' sʌc-esañetla cha'añ mi la' jac'ben Jesucristo, yic'ot ja'el cha'añ mi la' tsijcʌntel ti' ch'ich'el Jesucristo. La' p'ojlesʌntic i yutslel yic'ot i ñʌch'tʌlel la' pusic'al.

Jiñi cuxul bʌ lac pijtaya

³ La' sujbic i ñuclel Dios i Tat lac Yum Jesucristo, come ca'bʌl tsi' p'untayonla che' bʌ tsi' yʌq'ueyonla lac cha' ilan pañimil cha'añ jiñi cuxul bʌ lac pijtaya, cha'añ tsa' cha' tejchi ch'ojyel Jesucristo ba'añ chʌmeño' bʌ.

⁴ Come Dios mi caj i yʌq'ueñonla jiñi lotbebilon bʌ la ti panchan ba' ma'añic mi' jilel, ba' ma'añic mi' bi'b-añ, ba' ma'añic mi' tsuculʌyel,

⁵ come Dios woli' cʌntañetla ti ñuc bʌ i p'ʌtʌlel ti la' pejtelel mu' bʌ la' ñop, c'ʌlʌl ti jiñi cojix bʌ q'uiñ che' mi caj i tsictiyel la' coltʌntel tsa' bʌ i wʌn chajpʌbeyetla.

⁶ Jiñi cha'añ tijicñayetla, come poj jumuc' jach mi la' wu'bin wocol ti' chajp ti' chajp,

⁷ cha'añ mi' tsictiyel mi xuc'ul woli la' ñop, ñumen uts'at i xuc'tʌlel la' pusic'al ti Cristo bajche' oro mu' bʌ i jilel, woli la' ñusan wocol che' bajche' mi' ñumel oro ti c'ajc cha'añ mi' q'uejlel mi mero orojʌch, che' tsa'ix ñumi la' wocol, mi caj i sujbel la' ñuclel, mi caj la' c'uxbintel, mi caj la' q'uejlel ti ñuc che' mi' tsictiyel Jesucristo,

⁸ jatetla ma'añic tsa' la' q'uele Jesús, pero mi la' c'uxbin, ma'añic woli la' q'uel wʌle, pero woli la' ñop, jiñi cha'añ ma'añic i p'isol i tijicñʌyel la' pusic'al tilem bʌ ti panchan,

⁹ come woli la' taj la' coltʌntel ti la' ch'ujlel cha'añ tsa' la' ñopo.

¹⁰ Jiñi x'alt'añob tsi' wʌn su'buyob, cha'añ mi caj la' taj i yutslel i pusic'al Dios, tsi' ñopo i ch'ʌmbeñob isujm bajche' mi caj i yujtel jiñi la' coltʌntel,

¹¹ tsi' sajcayob ti juñ cha'añ mi' ña'tañob baqui bʌ ora mi' caj ti ujtel jiñi tsa' bʌ i yʌlʌ i yEspíritu Cristo am bʌ ti' pusic'alob, come i yEspíritu Cristo tsi' wʌn su'buyob i wocol Cristo, yic'ot i ñuclel mu' bʌ caj i taj che' ujtemix i wocol.

¹² Dios tsi' pʌsbeyob chuqui mi' caj i su'bob mach cha'añic i bajñel c'ʌjñibal tsi' cha'leyob t'añ, pero jiñʌch cha'añ mi' cʌntesʌntel yaño' bʌ. Wʌle tsa'ix la' wu'bi jiñi jach bʌ t'añ tic tojlel lojon. Tsa' c su'beyetla jiñi wen t'añ yic'ot jiñi Ch'ujul bʌ Espíritu chocbil bʌ tilel ti panchan. Jiñi ángelob wersa yom i ch'ʌmbeñob isujm.

1. TSIJI' BɅ LAJ CUXTɅLEL TI CRISTO ( 1.13—2.10 ) Pʌybilonla cha'añ mi la cajñel ti ch'ujul

¹³ Jiñi cha'añ, chajpan la' pusic'al, yom yʌxʌl la' woj. Junyajlel xuc'chocon la' bʌ ti pijtaya, come mi caj la' wʌq'uentel i yutslel la' pusic'al che' mi' tsictiyel Jesucristo.

¹⁴ Yom lajaletla bajche' alobob mu' bʌ i wen jac'ob t'añ, mach mi la' chʌn mel che' bajche' ti yam bʌ ora che' maxto añic la' ña'tʌbal, che' bʌ tsa' la' jac'ʌ i colosojlel la' pusic'al.

¹⁵ Ch'ujul jiñi tsa' bʌ i pʌyʌyetla, jiñi cha'añ yom ch'ujuletla ja'el ti pejtelel la' melbal.

¹⁶ Come ts'ijbubil: “Ajñenla ti ch'ujul, come ch'ujulon”, che'en lac Yum.

¹⁷ Mi woli la' pejcan ti la' Tat jiñi mu' bʌ i mel pejtelel wiñicob ti toj, jiñi mu' bʌ caj i meletla ti jujuntiquil che' bajche' añ la' melbal, ajñenla ti bʌq'uen che' wʌ' to añetla ba' mach mero la' lumalic.

¹⁸ Come ña'tʌbil la' cha'añ, mʌmbiletla cha'añ ma'añic mi la' chʌn ñop jiñi lolom jach bʌ tsa' bʌ la ñopo ti la' ñojte'el; mach mʌmbileticla ti jiñi yujil tac bʌ jilel che' bajche' oro yic'ot sʌsʌc taq'uiñ.

¹⁹ Pero mʌmbiletla ti' ch'ich'el Cristo letsem bʌ i tojol, che' bajche' juncojt alʌ tat tʌñʌme' mach bʌ añic i chʌmel mi i bi'bi'lel.

²⁰ Tsa' wa'choconti Jesús che' maxto añic tsa' mejli pañimil, pero tsa' tsictiyi ti jiñi cojix bʌ q'uiñ tac am bʌ wʌle cha'añ mi' coltañetla.

²¹ Cha'añ ti' caj Jesús mi la' ñop Dios, jiñi tsa' bʌ i teche ch'ojyel Jesús ba'añ chʌmeño' bʌ; tsi' yʌq'ue i ñuclel, jiñi cha'añ cʌyʌletla ti Dios, añ la' pijtaya ti Dios.

²² Tsa'ix la' sʌc-esa la' pusic'al ti' jac'ol isujmlel, jiñi cha'añ mi la' c'uxbin la' wermañujob ti isujm. Wen c'uxbin la' bʌ ti jump'ejl la' pusic'al.

²³ Come ma'añic tsa' la' cha' ila pañimil ti pac' yujil bʌ jilel, pero ti pac' mach bʌ yujilic jilel, jiñi cuxul bʌ i t'añ Dios mu' bʌ i yajñel ti pejtelel ora.

²⁴ Come ts'ijbubil: “Pejtelel wiñicob x'ixicob lajalob bajche' pimel. Pejtelel i ñuclel wiñicob x'ixicob lajalʌch bajche' i ñich pimel. Mi' tiquin pimel, mi' yajlel ju'bel i ñich,

²⁵ pero i t'añ lac Yum mi' yajñel ti pejtelel ora”. Che'ʌch mi' yʌl jiñi wen t'añ tsa' bʌ c su'beyetla.