1 Juan 4 - Jiñi Tsiji' bʌ Wen T'añ cha'añ Estudio

I yEspíritu Dios yic'ot i yespíritu jiñi xcontra Cristo

¹ C'uxbibilet bʌ la, mach yomic mi la' ñop pejtelel espíritujob, ña'tanla mi ch'oyolob ti Dios, come ca'bʌl lot bʌ x'alt'añob tsa'ix i pucuyob i bʌ ti pañimil.

² Yom mi la' cʌmben i yEspíritu Dios. Ch'oyol ti Dios pejtelel espíritu mu' bʌ i yʌl cha'añ Jesucristo tsi' ch'ʌmʌ i bʌc'tal.

³ Pejtelel espíritu mach bʌ añic mi' su'b tsi' ch'ʌmʌ i bʌc'tal Jesús, mach ch'oyolic ti Dios, jiñobʌch xcontra Cristo, tsa' la' wu'bi mi caj i tilel, wʌle añix ti pañimil.

⁴ Calobilob, i cha'añetla Dios, tsa'ix la' t'uchta jiñi xlotob come ñumen ñuc jiñi am bʌ ti la' pusic'al bajche' jiñi am bʌ ti pañimil.

⁵ Yaño' bʌ i cha'añobʌch pañimil; jiñi cha'añ i t'añ jach pañimil mi' yʌlob, jiñi i cha'año' bʌ pañimil mi' ñʌch'tʌbeñob i t'añ.

⁶ Joñonla i cha'añonla Dios. Jiñi mu' bʌ i cʌn Dios, mi' yu'bin lac t'añ. Jiñi mach bʌ añic mi' cʌn Dios ma'añic mi' yu'bin lac t'añ. Che' jiñi mi laj cʌn jiñi Espíritu mu' bʌ i su'b isujmlel yic'ot jiñi espíritu mu' bʌ i cha'len lot.

3. I YUXMOJTLEL I TSICTESɅNTEL ISUJMLEL ( 4.7—5.12 ) Dios xc'uxbiyajʌch

⁷ C'uxbibilet bʌ la, la' laj c'uxbin lac bʌ ti lac pejtelel, come ch'oyol ti Dios jiñi c'uxbiya, majqui mi' cha'len c'uxbiya, tsa'ix i yila pañimil ti Dios, i cʌñʌyʌch Dios.

⁸ Jiñi mach bʌ yujilic c'uxbiya mach i cʌñʌyic Dios. Come Dios xc'uxbiyajʌch.

⁹ Tsi' pʌsbeyonla i c'uxbiya Dios che' bʌ tsi' choco tilel ti pañimil cojach bʌ i Yalobil cha'añ mi lac taj laj cuxtʌlel ti Jesús.

¹⁰ Jiñʌch mero c'uxbiya. Mach joñoñicla tsa' laj c'uxbi Dios pero jiñi tsi' c'uxbiyonla, tsi' choco tilel i Yalobil cha'añ mi' toj lac mul, cha'añ mi' lajmel i mich'ajel ti lac tojlel.

¹¹ C'uxbibilet bʌ la, mi che'ʌch tsi' c'uxbiyonla Dios, che'ʌch yom mi laj c'uxbin lac bʌ ti lac pejtelel.

¹² Maxto añic mi' juntiquil tsa' bʌ i q'uele Dios, che' woli laj c'uxbin lac bʌ, Dios mi' yajñel ti joñonla, che' jiñi wolix i ts'ʌctiyel majlel i c'uxbiya ti lac pusic'al.

¹³ Che' jiñi, la cujil woli la cajñel ti Dios, la cujil woli' yajñel Dios ti joñonla, come tsa'ix i yʌq'ueyonla i yEspíritu.

¹⁴ Lac Tat tsi' choco tilel i Yalobil, i yaj Coltaya pañimil. Tsa'ix j q'uele lojon, che'ʌch mic su'b lojon ja'el.

¹⁵ Majqui jach mi' su'b i Yalobilʌch Dios jiñi Jesús, Dios mi' yajñel ti' pusic'al, jiñi wiñic mi' yajñel ti Dios ja'el.

¹⁶ Tsa'ix laj cʌmbe i c'uxbiya Dios, tsa'ix lac ñopo ja'el xc'uxbiyajʌch Dios. Jiñi yujil bʌ c'uxbiya mi' yajñel ti Dios. Dios mi' yajñel ti jiñi wiñic.

¹⁷ Wen la cujilix c'uxbiya che' ma'añic mi lac bʌc'ñʌben i q'uiñilel tojmulil, come wʌ' ti pañimil lajalonla bajche' Jesús.

¹⁸ Ma'añic bʌq'uen che' añ c'uxbiya, che' ts'ʌcʌl laj c'uxbiya mi' laj loq'uel lac bʌq'uen, jiñi mu' bʌ i bʌc'ñan tojmulil añ ca'bʌl i wocol, come jiñi mu' bʌ ti bʌq'uen maxto wen yujilic c'uxbiya.

¹⁹ Jiñi cha'añ mi laj c'uxbin Dios, come ñaxan tsi' c'uxbiyonla.

²⁰ Mi añ mu' bʌ i yʌl: Wolij c'uxbin Dios, pero mi woli' ts'a'len i yermañu, xlotʌch, come mi mach c'uxic mi yu'bin i yermañu woli bʌ i q'uele, ¿bajche' mi mejlel i c'uxbin Dios mach bʌ añic tsi' q'uele?

²¹ Dios tsi' yʌq'ueyonla ili mandar: Jiñi mu' bʌ i c'uxbin Dios, la' i c'uxbin i yermañu ja'el.