1 Juan 3 - Jiñi Tsiji' bʌ Wen T'añ cha'añ Estudio

2. I CHA'MOJTLEL I TSICTESɅNTEL ISUJMLEL ( 3.1—4.6 ) I yalobilob Dios

¹ Ca'bʌl tsi' c'uxbiyonla lac Tat, jiñi cha'añ mi lac pejcʌntel ti' yalobil Dios, melel i yalobilonla; jiñi cha'añ ma'añic mi' cʌñonla i cha'año' bʌ pañimil, come mach i cʌñʌyobic Dios.

² C'uxbibilo' bʌ, i yalobiloñixla Dios, maxto tsictiyemic bajche' mi caj la cujtel; pero la cujil che' mi' tsictiyel Cristo mi caj la cajñel lajal bajche' Cristo, come mi caj laj q'uel che' bajche' yilal.

³ Jiñi mu' bʌ i pijtan chuqui mi' caj ti ujtel che' mi' tilel Cristo, mi' sʌc-esan i pusic'al cha'añ sʌc mi' yajñel che' bajche' Jesús.

⁴ Pejtelel majqui jach mi' cha'len mulil, woli' ñusan mandar, come jiñi mulil jiñʌch i ñusʌntel mandar.

⁵ La' wujil tsa' tsictiyi Cristo cha'añ mi' ch'ʌm majlel lac mul, pero Cristo ma'añic i mul.

⁶ Jiñi mu' bʌ i chʌn ajñel ti Cristo, ma'añic mi' cha'len mulil. Jiñi mu' bʌ i cha'len mulil, ma'añic tsi' q'uele Cristo, mach i cʌñʌyic ja'el.

⁷ Alobob, mach mi la' jac'beñob i lot wiñicob mi juntiquilic, jiñi mu' bʌ i mel chuqui toj, tojʌch che' bajche' toj Cristo.

⁸ Jiñi mu' bʌ i cha'len mulil i cha'añʌch xi'ba, come jiñi xi'ba woli' chʌn cha'len mulil c'ʌlʌl ti' cajibal. Jiñi cha'añ tsa' tsictiyi i Yalobil Dios cha'añ mi' jisʌben i ye'tel xi'ba.

⁹ Jiñi tsa'ix bʌ i yila pañimil ti Dios ma'añix mi' chʌn cha'len mulil, come woli' yajñel i yEspíritu Dios ti' pusic'al; mach mejlic i chʌn cha'len mulil, come tsa'ix i yila pañimil ti Dios.

¹⁰ Che' jiñi, tsiquil majqui i yalobilob Dios yic'ot majqui i yalobilob xi'ba. Come majqui jach ma'añic mi' mel chuqui toj yic'ot ma'añic mi' c'uxbin i yermañu mach i cha'añic Dios.

¹¹ Jiñi t'añ tsa' bʌ la' wu'bi c'ʌlʌl ti' cajibal, jiñʌch iliyi: Yom mi laj c'uxbin lac bʌ ti lac pejtelel.

¹² Mach yomic lajalonla bajche' Caín tsa' bʌ i tsʌnsa i yijts'in. ¿Chucoch tsi' tsʌnsa? Come Caín jontol i melbal pero toj i melbal i yijts'in.

¹³ Quermañujob, mach yomic mi' toj sajtel la' pusic'al mi ts'a' mi' q'ueletla i cha'año' bʌ pañimil.

¹⁴ Anquese chʌmeñonla ti yam bʌ ora, pero la cujil añix laj cuxtʌlel come woli laj c'uxbin la quermañujob. Jiñi mach bʌ añic mi' c'uxbin [i yermañu] añ to ti' p'ʌtʌlel chʌmel.

¹⁵ Majqui jach mi' ts'a'len i yermañu, xtsʌnsajʌch, la' wujil ma'añic xtsʌnsa am bʌ i cuxtʌlel mach bʌ añic mi' jilel.

¹⁶ Che'ʌch tsa' laj cʌmbe i c'uxbiya Dios, che' bʌ Jesús tsi' yʌc'ʌ i bʌ ti chʌmel cha'añonla, che'ʌch yom mi la cʌc' lac bʌ ti chʌmel ja'el cha'añ la quermañujob.

¹⁷ Pero jiñi am bʌ i chu'bʌañ ti pañimil, che' mi q'uel i yermañu añ to chuqui yom i cha'añ, che' bʌ ma'añic mi coltañ ¿bajche' mi' yajñel i c'uxbiya Dios ti' pusic'al?

¹⁸ Calobilob, mach yomic mi lac cha'len c'uxbiya ti lac t'añ jach mi ti lac su'bal jach, la' lac cha'len c'uxbiya ti isujm ti lac melbal.

¹⁹ Che' jiñi mi lac ña'tan añonla ti isujmlel, xuc'ul lac pusic'al ti' tojlel Dios,

²⁰ pero mi woli' tic'onla lac pusic'al, ñumen ñuc Dios bajche' lac pusic'al, yujil pejtelel chuqui añ.

²¹ C'uxbibilo' bʌ, mi ma'añic woli' tic'onla lac pusic'al, xuc'ulonla ti Dios.

²² Chuqui jach mi laj c'ajtiben, mi caj la cʌq'uentel ti Dios, come woli lac jac'ben i mandar, yic'ot mi lac mel chuqui mi' mulan Dios.

²³ Jiñʌch i mandar: Yom mi lac ñopben i c'aba' Jesucristo i Yalobil Dios yic'ot yom mi laj c'uxbin lac bʌ ti lac pejtelel, che' bajche' tsi' yʌq'ueyonla mandar.

²⁴ Jiñi mu' bʌ i jac'ben i mandar mi' yajñel ti Dios. Dios mi' yajñel ti jiñi wiñic ja'el. Cʌntesʌbilonla cha'añ jiñi Espíritu tsa' bʌ i yʌq'ueyonla, la cujil woli' yajñel Dios ti joñonla.