1 Juan 1 - Jiñi Tsiji' bʌ Wen T'añ cha'añ Estudio

I TEJCHIBAL: JIÑI T'AÑ CHA'AÑ LAJ CUXTɅLEL ( 1.1-4 )

¹ Mic ts'ijbubeñetla ili juñ cha'añ mi cʌq'ueñetla la' cʌn jiñi T'añ am bʌ ti' cajibal, jiñʌch tsa' bʌ cu'bi lojon, tsa' bʌ j q'uele lojon tic wut, jiñi tsa' bʌ j q'uelbe lojon i ñuclel, jiñi tʌlʌl bʌ c cha'añ lojon. Jiñʌch jiñi T'añ mu' bʌ yʌq'ueñonla laj cuxtʌlel,

² —tsa' tsictiyi ti' cuxtʌlel, tsa' j q'uele lojon, woli c su'b lojon chuqui tsa' j q'uele lojon, woli c su'beñet lojon laj cuxtʌlel mach bʌ añic mi' jilel; ya' bʌ añ yic'ot lac Tat, tsa' bʌ pʌsbentiyon lojon—,

³ jiñi q'uelel bʌ c cha'añ lojon, yic'ot jiñi ñʌch'tʌbil bʌ c cha'añ lojon, jiñʌch mu' bʌ c su'b lojon cha'añ mi lac tem ochel ti' ñopol lac Tat yic'ot Jesucristo i Yalobil Dios.

⁴ woli c ts'ijban lojon ili juñ cha'añ mi' ts'ʌctiyel i tijicñʌyel lac pusic'al.

1. ÑAXAN BɅ I TSICTESɅNTEL ISUJMLEL ( 1.5—2.29 ) Dios jiñʌch i sʌclel

⁵ Jiñʌch tsa' bʌ cu'bi lojon ti' tojlel Jesús woli bʌ c su'b lojon: Dios i sʌclelʌch pañimil, ma'añic i yi'ic'lel mi ts'ita'ic.

⁶ Mi woli lac lon al tem ochemonla ti' ñopol Dios, lac lotʌch mi woliyonla ti xʌmbal ti ic'yoch'an bʌ pañimil, come che' jiñi ma'añic woli lac jac'ben isujmlel.

⁷ Pero mi woliyonla ti xʌmbal ti' sʌclel pañimil, che' bajche' mi' yajñel Dios ti' sʌclel pañimil, che' jiñi mi lac wen cʌn lac bʌ, i ch'ich'el Jesucristo i Yalobil Dios woli' sʌc-esañonla ti pejtelel mulil.

⁸ Mi woli la cʌl ma'añic lac mul, woli lac bajñel lotin lac bʌ ti lac pusic'al, che' jiñi ma'añic isujmlel ti lac pusic'al.

⁹ Mi woli lac su'ben lac mul Dios mu' bʌ i melonla ti toj, añ i xuc'tʌlel i pusic'al cha'añ mi' ñusʌbeñonla. Mi' pocbeñonla loq'uel pejtelel lac jontolil.

¹⁰ Mi woli la cʌl ma'añic tsa' lac cha'le mulil, woli laj cuy Dios ti xlot, che' jiñi mach ochemic i t'añ ti lac pusic'al.